অধ্যায় 31

31.1

বৈশংপায়ন উবাচ
নির্যায় নগরাচ্ছূরা ব্যূঢানীকাঃ প্রহারিণঃ
ত্রিগর্তানস্পৃশন্মত্স্যাঃ সূর্যে পরিণতে সতি

31.2

তে ত্রিগর্তাশ্চ মত্স্যাশ্চ সংরব্ধা যুদ্ধদুর্মদাঃ
অন্যোন্যমভিগর্জন্তো গোষু গৃদ্ধা মহাবলাঃ

31.3

ভীমাশ্চ মত্তমাতঙ্গাস্তোমরাঙ্কুশচোদিতাঃ
গ্রামণীয়ৈঃ সমারূঢাঃ কুশলৈর্হস্তিসাদিভিঃ

31.4

তেষাং সমাগমো ঘোরস্তুমুলো লোমহর্ষণঃ
দেবাসুরসমো রাজন্নাসীত্সূর্যে বিলম্বতি

31.5

উদতিষ্ঠদ্রজো ভৌমং ন প্রজ্ঞায়ত কিংচন
পক্ষিণশ্চাপতন্ভূমৌ সৈন্যেন রজসাবৃতাঃ

31.6

ইষুভির্ব্যতিসংয়দ্ভিরাদিত্যোঽন্তরধীয়ত
খদ্যোতৈরিব সংয়ুক্তমন্তরিক্ষং ব্যরাজত

31.7

রুক্মপৃষ্ঠানি চাপানি ব্যতিষক্তানি ধন্বিনাম্
পততাং লোকবীরাণাং সব্যদক্ষিণমস্যতাম্

31.8

রথা রথৈঃ সমাজগ্মুঃ পাদাতৈশ্চ পদাতয়ঃ
সাদিভিঃ সাদিনশ্চৈব গজৈশ্চাপি মহাগজাঃ

31.9

অসিভিঃ পট্টিশৈঃ প্রাসৈঃ শক্তিভিস্তোমরৈরপি
সংরব্ধাঃ সমরে রাজন্নিজঘ্নুরিতরেতরম্

31.10

নিঘ্নন্তঃ সমরেঽন্যোন্যং শূরাঃ পরিঘবাহবঃ
ন শেকুরভিসংরব্ধাঃ শূরান্কর্তুং পরাঙ্মুখান্

31.11

কৢপ্তোত্তরোষ্ঠং সুনসং কৢপ্তকেশমলংকৃতম্
অদৃশ্যত শিরশ্ছিন্নং রজোধ্বস্তং সকুণ্ডলম্

31.12

অদৃশ্যংস্তত্র গাত্রাণি শরৈশ্ছিন্নানি ভাগশঃ
শালস্কন্ধনিকাশানি ক্ষত্রিয়াণাং মহামৃধে

31.13

নাগভোগনিকাশৈশ্চ বাহুভিশ্চন্দনোক্ষিতৈঃ
আকীর্ণা বসুধা তত্র শিরোভিশ্চ সকুণ্ডলৈঃ

31.14

উপশাম্যদ্রজো ভৌমং রুধিরেণ প্রসর্পতা
কশ্মলং প্রাবিশদ্ঘোরং নির্মর্যাদমবর্তত

31.15

শতানীকঃ শতং হত্বা বিশালাক্ষশ্চতুঃশতম্
প্রবিষ্টৌ মহতীং সেনাং ত্রিগর্তানাং মহারথৌ
আর্চ্ছেতাং বহুসংরব্ধৌ কেশাকেশি নখানখি

31.16

লক্ষয়িত্বা ত্রিগর্তানাং তৌ প্রবিষ্টৌ রথব্রজম্
জগ্মতুঃ সূর্যদত্তশ্চ মদিরাশ্বশ্চ পৃষ্ঠতঃ

31.17

বিরাটস্তত্র সংগ্রামে হত্বা পঞ্চশতান্রথান্
হয়ানাং চ শতান্যত্র হত্বা পঞ্চ মহারথান্

31.18

চরন্স বিবিধান্মার্গান্রথেষু রথয়ূথপঃ
ত্রিগর্তানাং সুশর্মাণমার্চ্ছদ্রুক্মরথং রণে

31.19

তৌ ব্যাবহরতাং তত্র মহাত্মানৌ মহাবলৌ
অন্যোন্যমভিগর্জন্তৌ গোষ্ঠে গোবৃষভাবিব

31.20

ততো রথাভ্যাং রথিনৌ ব্যতিয়ায় সমন্ততঃ
শরান্ব্যসৃজতাং শীঘ্রং তোয়ধারা ঘনাবিব

31.21

অন্যোন্যং চাতিসংরব্ধৌ বিচেরতুরমর্ষণৌ
কৃতাস্ত্রৌ নিশিতৈর্বাণৈরসিশক্তিগদাভৃতৌ

31.22

ততো রাজা সুশর্মাণং বিব্যাধ দশভিঃ শরৈঃ
পঞ্চভিঃ পঞ্চভিশ্চাস্য বিব্যাধ চতুরো হয়ান্

31.23

তথৈব মত্স্যরাজানং সুশর্মা যুদ্ধদুর্মদঃ
পঞ্চাশতা শিতৈর্বাণৈর্বিব্যাধ পরমাস্ত্রবিৎ

31.24

ততঃ সৈন্যং সমাবৃত্য মত্স্যরাজসুশর্মণোঃ
নাভ্যজানংস্তদান্যোন্যং প্রদোষে রজসাবৃতে

Contains text from DharmicData, made available under the Open Database License (ODbL). Simple meanings are written by AI and can contain mistakes.