Utshovঅধ্যায় 32
32.1
বৈশংপায়ন উবাচ
তমসাভিপ্লুতে লোকে রজসা চৈব ভারত
ব্যতিষ্ঠন্বৈ মুহূর্তং তু ব্যূঢানীকাঃ প্রহারিণঃ
32.2
ততোঽন্ধকারং প্রণুদন্নুদতিষ্ঠত চন্দ্রমাঃ
কুর্বাণো বিমলাং রাত্রিং নন্দয়ন্ক্ষত্রিয়ান্যুধি
32.3
ততঃ প্রকাশমাসাদ্য পুনর্যুদ্ধমবর্তত
ঘোররূপং ততস্তে স্ম নাবেক্ষন্ত পরস্পরম্
32.4
ততঃ সুশর্মা ত্রৈগর্তঃ সহ ভ্রাত্রা যবীয়সা
অভ্যদ্রবন্মত্স্যরাজং রথব্রাতেন সর্বশঃ
32.5
ততো রথাভ্যাং প্রস্কন্দ্য ভ্রাতরৌ ক্ষত্রিয়র্ষভৌ
গদাপাণী সুসংরব্ধৌ সমভ্যদ্রবতাং হয়ান্
32.6
তথৈব তেষাং তু বলানি তানি; ক্রুদ্ধান্যথান্যোন্যমভিদ্রবন্তি
গদাসিখড্গৈশ্চ পরশ্বধৈশ্চ; প্রাসৈশ্চ তীক্ষ্ণাগ্রসুপীতধারৈঃ
32.7
বলং তু মত্স্যস্য বলেন রাজা; সর্বং ত্রিগর্তাধিপতিঃ সুশর্মা
প্রমথ্য জিত্বা চ প্রসহ্য মত্স্যং; বিরাটমোজস্বিনমভ্যধাবৎ
32.8
তৌ নিহত্য পৃথগ্ধুর্যাবুভৌ চ পার্ষ্ণিসারথী
বিরথং মত্স্যরাজানং জীবগ্রাহমগৃহ্ণতাম্
32.9
তমুন্মথ্য সুশর্মা তু রুদতীং বধুকামিব
স্যন্দনং স্বং সমারোপ্য প্রয়য়ৌ শীঘ্রবাহনঃ
32.10
তস্মিন্গৃহীতে বিরথে বিরাটে বলবত্তরে
প্রাদ্রবন্ত ভয়ান্মত্স্যাস্ত্রিগর্তৈরর্দিতা ভৃশম্
32.11
তেষু সংত্রাস্যমানেষু কুন্তীপুত্রো যুধিষ্ঠিরঃ
অভ্যভাষন্মহাবাহুং ভীমসেনমরিংদমম্
32.12
মত্স্যরাজঃ পরামৃষ্টস্ত্রিগর্তেন সুশর্মণা
তং মোক্ষয় মহাবাহো ন গচ্ছেদ্দ্বিষতাং বশম্
32.13
উষিতাঃ স্মঃ সুখং সর্বে সর্বকামৈঃ সুপূজিতাঃ
ভীমসেন ত্বয়া কার্যা তস্য বাসস্য নিষ্কৃতিঃ
32.14
ভীমসেন উবাচ
অহমেনং পরিত্রাস্যে শাসনাত্তব পার্থিব
পশ্য মে সুমহত্কর্ম যুধ্যতঃ সহ শত্রুভিঃ
32.15
স্ববাহুবলমাশ্রিত্য তিষ্ঠ ত্বং ভ্রাতৃভিঃ সহ
একান্তমাশ্রিতো রাজন্পশ্য মেঽদ্য পরাক্রমম্
32.16
সুস্কন্ধোঽয়ং মহাবৃক্ষো গদারূপ ইব স্থিতঃ
এনমেব সমারুজ্য দ্রাবয়িষ্যামি শাত্রবান্
32.17
বৈশংপায়ন উবাচ
তং মত্তমিব মাতঙ্গং বীক্ষমাণং বনস্পতিম্
অব্রবীদ্ভ্রাতরং বীরং ধর্মরাজো যুধিষ্ঠিরঃ
32.18
মা ভীম সাহসং কার্ষীস্তিষ্ঠত্বেষ বনস্পতিঃ
মা ত্বা বৃক্ষেণ কর্মাণি কুর্বাণমতিমানুষম্
জনাঃ সমববুধ্যেরন্ভীমোঽয়মিতি ভারত
32.19
অন্যদেবায়ুধং কিংচিত্প্রতিপদ্যস্ব মানুষম্
চাপং বা যদি বা শক্তিং নিস্ত্রিংশং বা পরশ্বধম্
32.20
যদেব মানুষং ভীম ভবেদন্যৈরলক্ষিতম্
তদেবায়ুধমাদায় মোক্ষয়াশু মহীপতিম্
32.21
যমৌ চ চক্ররক্ষৌ তে ভবিতারৌ মহাবলৌ
ব্যূহতঃ সমরে তাত মত্স্যরাজং পরীপ্সতঃ
32.22
ততঃ সমস্তাস্তে সর্বে তুরগানভ্যচোদয়ন্
দিব্যমস্ত্রং বিকুর্বাণাস্ত্রিগর্তান্প্রত্যমর্ষণাঃ
32.23
তান্নিবৃত্তরথান্দৃষ্ট্বা পাণ্ডবান্সা মহাচমূঃ
বৈরাটী পরমক্রুদ্ধা যুয়ুধে পরমাদ্ভুতম্
32.24
সহস্রং ন্যবধীত্তত্র কুন্তীপুত্রো যুধিষ্ঠিরঃ
ভীমঃ সপ্তশতান্যোধান্পরলোকমদর্শয়ৎ
নকুলশ্চাপি সপ্তৈব শতানি প্রাহিণোচ্ছরৈঃ
32.25
শতানি ত্রীণি শূরাণাং সহদেবঃ প্রতাপবান্
যুধিষ্ঠিরসমাদিষ্টো নিজঘ্নে পুরুষর্ষভঃ
ভিত্ত্বা তাং মহতীং সেনাং ত্রিগর্তানাং নরর্ষভ
32.26
ততো যুধিষ্ঠিরো রাজা ত্বরমাণো মহারথঃ
অভিদ্রুত্য সুশর্মাণং শরৈরভ্যতুদদ্ভৃশম্
32.27
সুশর্মাপি সুসংক্রুদ্ধস্ত্বরমাণো যুধিষ্ঠিরম্
অবিধ্যন্নবভির্বাণৈশ্চতুর্ভিশ্চতুরো হয়ান্
32.28
ততো রাজন্নাশুকারী কুন্তীপুত্রো বৃকোদরঃ
সমাসাদ্য সুশর্মাণমশ্বানস্য ব্যপোথয়ৎ
32.29
পৃষ্ঠগোপৌ চ তস্যাথ হত্বা পরমসায়কৈঃ
অথাস্য সারথিং ক্রুদ্ধো রথোপস্থাদপাহরৎ
32.30
চক্ররক্ষশ্চ শূরশ্চ শোণাশ্বো নাম বিশ্রুতঃ
স ভয়াদ্দ্বৈরথং দৃষ্ট্বা ত্রৈগর্তং প্রাজহত্তদা
32.31
ততো বিরাটঃ প্রস্কন্দ্য রথাদথ সুশর্মণঃ
গদামস্য পরামৃশ্য তমেবাজঘ্নিবান্বলী
স চচার গদাপাণির্বৃদ্ধোঽপি তরুণো যথা
32.32
ভীমস্তু ভীমসংকাশো রথাত্প্রস্কন্দ্য কুণ্ডলী
ত্রিগর্তরাজমাদত্ত সিংহঃ ক্ষুদ্রমৃগং যথা
32.33
তস্মিন্গৃহীতে বিরথে ত্রিগর্তানাং মহারথে
অভজ্যত বলং সর্বং ত্রৈগর্তং তদ্ভয়াতুরম্
32.34
নিবর্ত্য গাস্ততঃ সর্বাঃ পাণ্ডুপুত্রা মহাবলাঃ
অবজিত্য সুশর্মাণং ধনং চাদায় সর্বশঃ
32.35
স্ববাহুবলসংপন্না হ্রীনিষেধা যতব্রতাঃ
সংগ্রামশিরসো মধ্যে তাং রাত্রিং সুখিনোঽবসন্
32.36
ততো বিরাটঃ কৌন্তেয়ানতিমানুষবিক্রমান্
অর্চয়ামাস বিত্তেন মানেন চ মহারথান্
32.37
বিরাট উবাচ
যথৈব মম রত্নানি যুষ্মাকং তানি বৈ তথা
কার্যং কুরুত তৈঃ সর্বে যথাকামং যথাসুখম্
32.38
দদান্যলংকৃতাঃ কন্যা বসূনি বিবিধানি চ
মনসশ্চাপ্যভিপ্রেতং যদ্বঃ শত্রুনিবর্হণাঃ
32.39
যুষ্মাকং বিক্রমাদদ্য মুক্তোঽহং স্বস্তিমানিহ
তস্মাদ্ভবন্তো মত্স্যানামীশ্বরাঃ সর্ব এব হি
32.40
বৈশংপায়ন উবাচ
তথাভিবাদিনং মত্স্যং কৌরবেয়াঃ পৃথক্পৃথক্
ঊচুঃ প্রাঞ্জলয়ঃ সর্বে যুধিষ্ঠিরপুরোগমাঃ
32.41
প্রতিনন্দাম তে বাক্যং সর্বং চৈব বিশাং পতে
এতেনৈব প্রতীতাঃ স্মো যত্ত্বং মুক্তোঽদ্য শত্রুভিঃ
32.42
অথাব্রবীত্প্রীতমনা মত্স্যরাজো যুধিষ্ঠিরম্
পুনরেব মহাবাহুর্বিরাটো রাজসত্তমঃ
এহি ত্বামভিষেক্ষ্যামি মত্স্যরাজোঽস্তু নো ভবান্
32.43
মনসশ্চাপ্যভিপ্রেতং যত্তে শত্রুনিবর্হণ
তত্তেঽহং সংপ্রদাস্যামি সর্বমর্হতি নো ভবান্
32.44
রত্নানি গাঃ সুবর্ণং চ মণিমুক্তমথাপি বা
বৈয়াঘ্রপদ্য বিপ্রেন্দ্র সর্বথৈব নমোঽস্তু তে
32.45
ত্বত্কৃতে হ্যদ্য পশ্যামি রাজ্যমাত্মানমেব চ
যতশ্চ জাতঃ সংরম্ভঃ স চ শত্রুর্বশং গতঃ
32.46
ততো যুধিষ্ঠিরো মত্স্যং পুনরেবাভ্যভাষত
প্রতিনন্দামি তে বাক্যং মনোজ্ঞং মত্স্য ভাষসে
32.47
আনৃশংস্যপরো নিত্যং সুসুখঃ সততং ভব
গচ্ছন্তু দূতাস্ত্বরিতং নগরং তব পার্থিব
সুহৃদাং প্রিয়মাখ্যাতুং ঘোষয়ন্তু চ তে জয়ম্
32.48
ততস্তদ্বচনান্মত্স্যো দূতান্রাজা সমাদিশৎ
আচক্ষধ্বং পুরং গত্বা সংগ্রামে বিজয়ং মম
32.49
কুমারাঃ সমলংকৃত্য পর্যাগচ্ছন্তু মে পুরাৎ
বাদিত্রাণি চ সর্বাণি গণিকাশ্চ স্বলংকৃতাঃ
32.50
তে গত্বা কেবলাং রাত্রিমথ সূর্যোদয়ং প্রতি
বিরাটস্য পুরাভ্যাশে দূতা জয়মঘোষয়ন্