অধ্যায় 33

33.1

বৈশংপায়ন উবাচ
যাতে ত্রিগর্তং মত্স্যে তু পশূংস্তান্স্বান্পরীপ্সতি
দুর্যোধনঃ সহামাত্যো বিরাটমুপয়াদথ

ভীষ্মো দ্রোণশ্চ কর্ণশ্চ কৃপশ্চ পরমাস্ত্রবিৎ
দ্রৌণিশ্চ সৌবলশ্চৈব তথা দুঃশাসনঃ প্রভুঃ

বিবিংশতির্বিকর্ণশ্চ চিত্রসেনশ্চ বীর্যবান্
দুর্মুখো দুঃসহশ্চৈব যে চৈবান্যে মহারথাঃ

এতে মত্স্যানুপাগম্য বিরাটস্য মহীপতেঃ
ঘোষান্বিদ্রাব্য তরসা গোধনং জহ্রুরোজসা

ষষ্টিং গবাং সহস্রাণি কুরবঃ কালয়ন্তি তে
মহতা রথবংশেন পরিবার্য সমন্ততঃ

গোপালানাং তু ঘোষেষু হন্যতাং তৈর্মহারথৈঃ
আরাবঃ সুমহানাসীত্সংপ্রহারে ভয়ংকরে

গবাধ্যক্ষস্তু সংত্রস্তো রথমাস্থায় সত্বরঃ
জগাম নগরায়ৈব পরিক্রোশংস্তদার্তবৎ

স প্রবিশ্য পুরং রাজ্ঞো নৃপবেশ্মাভ্যয়াত্ততঃ
অবতীর্য রথাত্তূর্ণমাখ্যাতুং প্রবিবেশ হ

দৃষ্ট্বা ভূমিংজয়ং নাম পুত্রং মত্স্যস্য মানিনম্
তস্মৈ তত্সর্বমাচষ্ট রাষ্ট্রস্য পশুকর্ষণম্

ষষ্টিং গবাং সহস্রাণি কুরবঃ কালয়ন্তি তে
তদ্বিজেতুং সমুত্তিষ্ঠ গোধনং রাষ্ট্রবর্ধনম্

রাজপুত্র হিতপ্রেপ্সুঃ ক্ষিপ্রং নির্যাহি বৈ স্বয়ম্
ত্বাং হি মত্স্যো মহীপালঃ শূন্যপালমিহাকরোৎ

ত্বয়া পরিষদো মধ্যে শ্লাঘতে স নরাধিপঃ
পুত্রো মমানুরূপশ্চ শূরশ্চেতি কুলোদ্বহঃ

ইষ্বস্ত্রে নিপুণো যোধঃ সদা বীরশ্চ মে সুতঃ
তস্য তত্সত্যমেবাস্তু মনুষ্যেন্দ্রস্য ভাষিতম্

আবর্তয় কুরূঞ্জিত্বা পশূন্পশুমতাং বর
নির্দহৈষামনীকানি ভীমেন শরতেজসা

ধনুশ্চ্যুতৈ রুক্মপুঙ্খৈঃ শরৈঃ সংনতপর্বভিঃ
দ্বিষতাং ভিন্ধ্যনীকানি গজানামিব যূথপঃ

পাশোপধানাং জ্যাতন্ত্রীং চাপদণ্ডাং মহাস্বনাম্
শরবর্ণাং ধনুর্বীণাং শত্রুমধ্যে প্রবাদয়

শ্বেতা রজতসংকাশা রথে যুজ্যন্তু তে হয়াঃ
ধ্বজং চ সিংহং সৌবর্ণমুচ্ছ্রয়ন্তু তবাভিভোঃ

রুক্মপুঙ্খাঃ প্রসন্নাগ্রা মুক্তা হস্তবতা ত্বয়া
ছাদয়ন্তু শরাঃ সূর্যং রাজ্ঞামায়ুর্নিরোধিনঃ

রণে জিত্বা কুরূন্সর্বান্বজ্রপাণিরিবাসুরান্
যশো মহদবাপ্য ত্বং প্রবিশেদং পুরং পুনঃ

ত্বং হি রাষ্ট্রস্য পরমা গতির্মত্স্যপতেঃ সুতঃ
গতিমন্তো ভবন্ত্বদ্য সর্বে বিষয়বাসিনঃ

স্ত্রীমধ্য উক্তস্তেনাসৌ তদ্বাক্যমভয়ংকরম্
অন্তঃপুরে শ্লাঘমান ইদং বচনমব্রবীৎ