অধ্যায় 34

34.1

উত্তর উবাচ
অদ্যাহমনুগচ্ছেয়ং দৃঢধন্বা গবাং পদম্
যদি মে সারথিঃ কশ্চিদ্ভবেদশ্বেষু কোবিদঃ

তমেব নাধিগচ্ছামি যো মে যন্তা ভবেন্নরঃ
পশ্যধ্বং সারথিং ক্ষিপ্রং মম যুক্তং প্রয়াস্যতঃ

অষ্টাবিংশতিরাত্রং বা মাসং বা নূনমন্ততঃ
যত্তদাসীন্মহদ্যুদ্ধং তত্র মে সারথির্হতঃ

স লভেয়ং যদি ত্বন্যং হয়য়ানবিদং নরম্
ত্বরাবানদ্য যাত্বাহং সমুচ্ছ্রিতমহাধ্বজম্

বিগাহ্য তত্পরানীকং গজবাজিরথাকুলম্
শস্ত্রপ্রতাপনির্বীর্যান্কুরূঞ্জিত্বানয়ে পশূন্

দুর্যোধনং শাংতনবং কর্ণং বৈকর্তনং কৃপম্
দ্রোণং চ সহ পুত্রেণ মহেষ্বাসান্সমাগতান্

বিত্রাসয়িত্বা সংগ্রামে দানবানিব বজ্রভৃৎ
অনেনৈব মুহূর্তেন পুনঃ প্রত্যানয়ে পশূন্

শূন্যমাসাদ্য কুরবঃ প্রয়ান্ত্যাদায় গোধনম্
কিং নু শক্যং ময়া কর্তুং যদহং তত্র নাভবম্

পশ্যেয়ুরদ্য মে বীর্যং কুরবস্তে সমাগতাঃ
কিং নু পার্থোঽর্জুনঃ সাক্ষাদয়মস্মান্প্রবাধতে

বৈশংপায়ন উবাচ
তস্য তদ্বচনং স্ত্রীষু ভাষতঃ স্ম পুনঃ পুনঃ
নামর্ষয়ত পাঞ্চালী বীভত্সোঃ পরিকীর্তনম্

অথৈনমুপসংগম্য স্ত্রীমধ্যাত্সা তপস্বিনী
ব্রীডমানেব শনকৈরিদং বচনমব্রবীৎ

যোঽসৌ বৃহদ্বারণাভো যুবা সুপ্রিয়দর্শনঃ
বৃহন্নডেতি বিখ্যাতঃ পার্থস্যাসীত্স সারথিঃ

ধনুষ্যনবরশ্চাসীত্তস্য শিষ্যো মহাত্মনঃ
দৃষ্টপূর্বো ময়া বীর চরন্ত্যা পাণ্ডবান্প্রতি

যদা তত্পাবকো দাবমদহত্খাণ্ডবং মহৎ
অর্জুনস্য তদানেন সংগৃহীতা হয়োত্তমাঃ

তেন সারথিনা পার্থঃ সর্বভূতানি সর্বশঃ
অজয়ত্খাণ্ডবপ্রস্থে ন হি যন্তাস্তি তাদৃশঃ

যেয়ং কুমারী সুশ্রোণী ভগিনী তে যবীয়সী
অস্যাঃ স বচনং বীর করিষ্যতি ন সংশয়ঃ

যদি বৈ সারথিঃ স স্যাত্কুরূন্সর্বানসংশয়ম্
জিত্বা গাশ্চ সমাদায় ধ্রুবমাগমনং ভবেৎ

এবমুক্তঃ স সৈরন্ধ্র্যা ভগিনীং প্রত্যভাষত
গচ্ছ ত্বমনবদ্যাঙ্গি তামানয় বৃহন্নডাম্

সা ভ্রাত্রা প্রেষিতা শীঘ্রমগচ্ছন্নর্তনাগৃহম্
যত্রাস্তে স মহাবাহুশ্ছন্নঃ সত্রেণ পাণ্ডবঃ