UtshovChapter 34
34.1
उत्तर उवाच
अद्याहमनुगच्छेयं दृढधन्वा गवां पदम्
यदि मे सारथिः कश्चिद्भवेदश्वेषु कोविदः
Uttara uvacha
Adyahamanugachchheyam dridhadhanva gavam padam
Yadi me sarathih kashchidbhavedashveshu kovidah
34.2
तमेव नाधिगच्छामि यो मे यन्ता भवेन्नरः
पश्यध्वं सारथिं क्षिप्रं मम युक्तं प्रयास्यतः
Tameva nadhigachchhami yo me yanta bhavennarah
Pashyadhvam sarathim kshipram mama yuktam prayasyatah
34.3
अष्टाविंशतिरात्रं वा मासं वा नूनमन्ततः
यत्तदासीन्महद्युद्धं तत्र मे सारथिर्हतः
Ashtavinshatiratram va masam va nunamantatah
Yattadasinmahadyuddham tatra me sarathirhatah
34.4
स लभेयं यदि त्वन्यं हययानविदं नरम्
त्वरावानद्य यात्वाहं समुच्छ्रितमहाध्वजम्
Sa labheyam yadi tvanyam hayayanavidam naram
Tvaravanadya yatvaham samuchchhritamahadhvajam
34.5
विगाह्य तत्परानीकं गजवाजिरथाकुलम्
शस्त्रप्रतापनिर्वीर्यान्कुरूञ्जित्वानये पशून्
Vigahya tatparanikam gajavajirathakulam
Shastrapratapanirviryankurunjitvanaye pashun
34.6
दुर्योधनं शांतनवं कर्णं वैकर्तनं कृपम्
द्रोणं च सह पुत्रेण महेष्वासान्समागतान्
Duryodhanam shantanavam karnam vaikartanam kripam
Dronam cha saha putrena maheshvasansamagatan
34.7
वित्रासयित्वा संग्रामे दानवानिव वज्रभृत्
अनेनैव मुहूर्तेन पुनः प्रत्यानये पशून्
Vitrasayitva sangrame danavaniva vajrabhrit
Anenaiva muhurtena punah pratyanaye pashun
34.8
शून्यमासाद्य कुरवः प्रयान्त्यादाय गोधनम्
किं नु शक्यं मया कर्तुं यदहं तत्र नाभवम्
Shunyamasadya kuravah prayantyadaya godhanam
Kim nu shakyam maya kartum yadaham tatra nabhavam
34.9
पश्येयुरद्य मे वीर्यं कुरवस्ते समागताः
किं नु पार्थोऽर्जुनः साक्षादयमस्मान्प्रबाधते
Pashyeyuradya me viryam kuravaste samagatah
Kim nu parthorjunah sakshadayamasmanprabadhate
34.10
वैशंपायन उवाच
तस्य तद्वचनं स्त्रीषु भाषतः स्म पुनः पुनः
नामर्षयत पाञ्चाली बीभत्सोः परिकीर्तनम्
Vaishampayana uvacha
Tasya tadvachanam strishu bhashatah sma punah punah
Namarshayata panchali bibhatsoh parikirtanam
34.11
अथैनमुपसंगम्य स्त्रीमध्यात्सा तपस्विनी
व्रीडमानेव शनकैरिदं वचनमब्रवीत्
Athainamupasangamya strimadhyatsa tapasvini
Vridamaneva shanakairidam vachanamabravit
34.12
योऽसौ बृहद्वारणाभो युवा सुप्रियदर्शनः
बृहन्नडेति विख्यातः पार्थस्यासीत्स सारथिः
Yosau brihadvaranabho yuva supriyadarshanah
Brihannadeti vikhyatah parthasyasitsa sarathih
34.13
धनुष्यनवरश्चासीत्तस्य शिष्यो महात्मनः
दृष्टपूर्वो मया वीर चरन्त्या पाण्डवान्प्रति
Dhanushyanavarashchasittasya shishyo mahatmanah
Drishtapurvo maya vira charantya pandavanprati
34.14
यदा तत्पावको दावमदहत्खाण्डवं महत्
अर्जुनस्य तदानेन संगृहीता हयोत्तमाः
Yada tatpavako davamadahatkhandavam mahat
Arjunasya tadanena sangrihita hayottamah
34.15
तेन सारथिना पार्थः सर्वभूतानि सर्वशः
अजयत्खाण्डवप्रस्थे न हि यन्तास्ति तादृशः
Tena sarathina parthah sarvabhutani sarvashah
Ajayatkhandavaprasthe na hi yantasti tadrishah
34.16
येयं कुमारी सुश्रोणी भगिनी ते यवीयसी
अस्याः स वचनं वीर करिष्यति न संशयः
Yeyam kumari sushroni bhagini te yaviyasi
Asyah sa vachanam vira karishyati na sanshayah
34.17
यदि वै सारथिः स स्यात्कुरून्सर्वानसंशयम्
जित्वा गाश्च समादाय ध्रुवमागमनं भवेत्
Yadi vai sarathih sa syatkurunsarvanasanshayam
Jitva gashcha samadaya dhruvamagamanam bhavet
34.18
एवमुक्तः स सैरन्ध्र्या भगिनीं प्रत्यभाषत
गच्छ त्वमनवद्याङ्गि तामानय बृहन्नडाम्
Evamuktah sa sairandhrya bhaginim pratyabhashata
Gachchha tvamanavadyangi tamanaya brihannadam
34.19
सा भ्रात्रा प्रेषिता शीघ्रमगच्छन्नर्तनागृहम्
यत्रास्ते स महाबाहुश्छन्नः सत्रेण पाण्डवः
Sa bhratra preshita shighramagachchhannartanagriham
Yatraste sa mahabahushchhannah satrena pandavah