UtshovChapter 33
33.1
वैशंपायन उवाच
याते त्रिगर्तं मत्स्ये तु पशूंस्तान्स्वान्परीप्सति
दुर्योधनः सहामात्यो विराटमुपयादथ
Vaishampayana uvacha
Yate trigartam matsye tu pashunstansvanparipsati
Duryodhanah sahamatyo viratamupayadatha
33.2
भीष्मो द्रोणश्च कर्णश्च कृपश्च परमास्त्रवित्
द्रौणिश्च सौबलश्चैव तथा दुःशासनः प्रभुः
Bhishmo dronashcha karnashcha kripashcha paramastravit
Draunishcha saubalashchaiva tatha duhshasanah prabhuh
33.3
विविंशतिर्विकर्णश्च चित्रसेनश्च वीर्यवान्
दुर्मुखो दुःसहश्चैव ये चैवान्ये महारथाः
Vivinshatirvikarnashcha chitrasenashcha viryavan
Durmukho duhsahashchaiva ye chaivanye maharathah
33.4
एते मत्स्यानुपागम्य विराटस्य महीपतेः
घोषान्विद्राव्य तरसा गोधनं जह्रुरोजसा
Ete matsyanupagamya viratasya mahipateh
Ghoshanvidravya tarasa godhanam jahrurojasa
33.5
षष्टिं गवां सहस्राणि कुरवः कालयन्ति ते
महता रथवंशेन परिवार्य समन्ततः
Shashtim gavam sahasrani kuravah kalayanti te
Mahata rathavanshena parivarya samantatah
33.6
गोपालानां तु घोषेषु हन्यतां तैर्महारथैः
आरावः सुमहानासीत्संप्रहारे भयंकरे
Gopalanam tu ghosheshu hanyatam tairmaharathaih
Aravah sumahanasitsamprahare bhayankare
33.7
गवाध्यक्षस्तु संत्रस्तो रथमास्थाय सत्वरः
जगाम नगरायैव परिक्रोशंस्तदार्तवत्
Gavadhyakshastu santrasto rathamasthaya satvarah
Jagama nagarayaiva parikroshanstadartavat
33.8
स प्रविश्य पुरं राज्ञो नृपवेश्माभ्ययात्ततः
अवतीर्य रथात्तूर्णमाख्यातुं प्रविवेश ह
Sa pravishya puram ragyo nripaveshmabhyayattatah
Avatirya rathatturnamakhyatum pravivesha ha
33.9
दृष्ट्वा भूमिंजयं नाम पुत्रं मत्स्यस्य मानिनम्
तस्मै तत्सर्वमाचष्ट राष्ट्रस्य पशुकर्षणम्
Drishtva bhuminjayam nama putram matsyasya maninam
Tasmai tatsarvamachashta rashtrasya pashukarshanam
33.10
षष्टिं गवां सहस्राणि कुरवः कालयन्ति ते
तद्विजेतुं समुत्तिष्ठ गोधनं राष्ट्रवर्धनम्
Shashtim gavam sahasrani kuravah kalayanti te
Tadvijetum samuttishtha godhanam rashtravardhanam
33.11
राजपुत्र हितप्रेप्सुः क्षिप्रं निर्याहि वै स्वयम्
त्वां हि मत्स्यो महीपालः शून्यपालमिहाकरोत्
Rajaputra hitaprepsuh kshipram niryahi vai svayam
Tvam hi matsyo mahipalah shunyapalamihakarot
33.12
त्वया परिषदो मध्ये श्लाघते स नराधिपः
पुत्रो ममानुरूपश्च शूरश्चेति कुलोद्वहः
Tvaya parishado madhye shlaghate sa naradhipah
Putro mamanurupashcha shurashcheti kulodvahah
33.13
इष्वस्त्रे निपुणो योधः सदा वीरश्च मे सुतः
तस्य तत्सत्यमेवास्तु मनुष्येन्द्रस्य भाषितम्
Ishvastre nipuno yodhah sada virashcha me sutah
Tasya tatsatyamevastu manushyendrasya bhashitam
33.14
आवर्तय कुरूञ्जित्वा पशून्पशुमतां वर
निर्दहैषामनीकानि भीमेन शरतेजसा
Avartaya kurunjitva pashunpashumatam vara
Nirdahaishamanikani bhimena sharatejasa
33.15
धनुश्च्युतै रुक्मपुङ्खैः शरैः संनतपर्वभिः
द्विषतां भिन्ध्यनीकानि गजानामिव यूथपः
Dhanushchyutai rukmapunkhaih sharaih sannataparvabhih
Dvishatam bhindhyanikani gajanamiva yuthapah
33.16
पाशोपधानां ज्यातन्त्रीं चापदण्डां महास्वनाम्
शरवर्णां धनुर्वीणां शत्रुमध्ये प्रवादय
Pashopadhanam jyatantrim chapadandam mahasvanam
Sharavarnam dhanurvinam shatrumadhye pravadaya
33.17
श्वेता रजतसंकाशा रथे युज्यन्तु ते हयाः
ध्वजं च सिंहं सौवर्णमुच्छ्रयन्तु तवाभिभोः
Shveta rajatasankasha rathe yujyantu te hayah
Dhvajam cha sinham sauvarnamuchchhrayantu tavabhibhoh
33.18
रुक्मपुङ्खाः प्रसन्नाग्रा मुक्ता हस्तवता त्वया
छादयन्तु शराः सूर्यं राज्ञामायुर्निरोधिनः
Rukmapunkhah prasannagra mukta hastavata tvaya
Chhadayantu sharah suryam ragyamayurnirodhinah
33.19
रणे जित्वा कुरून्सर्वान्वज्रपाणिरिवासुरान्
यशो महदवाप्य त्वं प्रविशेदं पुरं पुनः
Rane jitva kurunsarvanvajrapanirivasuran
Yasho mahadavapya tvam pravishedam puram punah
33.20
त्वं हि राष्ट्रस्य परमा गतिर्मत्स्यपतेः सुतः
गतिमन्तो भवन्त्वद्य सर्वे विषयवासिनः
Tvam hi rashtrasya parama gatirmatsyapateh sutah
Gatimanto bhavantvadya sarve vishayavasinah
33.21
स्त्रीमध्य उक्तस्तेनासौ तद्वाक्यमभयंकरम्
अन्तःपुरे श्लाघमान इदं वचनमब्रवीत्
Strimadhya uktastenasau tadvakyamabhayankaram
Antahpure shlaghamana idam vachanamabravit