UtshovChapter 35
35.1
वैशंपायन उवाच
स तां दृष्ट्वा विशालाक्षीं राजपुत्रीं सखीं सखा
प्रहसन्नब्रवीद्राजन्कुत्रागमनमित्युत
Vaishampayana uvacha
Sa tam drishtva vishalakshim rajaputrim sakhim sakha
Prahasannabravidrajankutragamanamityuta
35.2
तमब्रवीद्राजपुत्री समुपेत्य नरर्षभम्
प्रणयं भावयन्ती स्म सखीमध्य इदं वचः
Tamabravidrajaputri samupetya nararshabham
Pranayam bhavayanti sma sakhimadhya idam vachah
35.3
गावो राष्ट्रस्य कुरुभिः काल्यन्ते नो बृहन्नडे
तान्विजेतुं मम भ्राता प्रयास्यति धनुर्धरः
Gavo rashtrasya kurubhih kalyante no brihannade
Tanvijetum mama bhrata prayasyati dhanurdharah
35.4
नचिरं च हतस्तस्य संग्रामे रथसारथिः
तेन नास्ति समः सूतो योऽस्य सारथ्यमाचरेत्
Nachiram cha hatastasya sangrame rathasarathih
Tena nasti samah suto yosya sarathyamacharet
35.5
तस्मै प्रयतमानाय सारथ्यर्थं बृहन्नडे
आचचक्षे हयज्ञाने सैरन्ध्री कौशलं तव
Tasmai prayatamanaya sarathyartham brihannade
Achachakshe hayagyane sairandhri kaushalam tava
35.6
सा सारथ्यं मम भ्रातुः कुरु साधु बृहन्नडे
पुरा दूरतरं गावो ह्रियन्ते कुरुभिर्हि नः
Sa sarathyam mama bhratuh kuru sadhu brihannade
Pura durataram gavo hriyante kurubhirhi nah
35.7
अथैतद्वचनं मेऽद्य नियुक्ता न करिष्यसि
प्रणयादुच्यमाना त्वं परित्यक्ष्यामि जीवितम्
Athaitadvachanam medya niyukta na karishyasi
Pranayaduchyamana tvam parityakshyami jivitam
35.8
एवमुक्तस्तु सुश्रोण्या तया सख्या परंतपः
जगाम राजपुत्रस्य सकाशममितौजसः
Evamuktastu sushronya taya sakhya parantapah
Jagama rajaputrasya sakashamamitaujasah
35.9
तं सा व्रजन्तं त्वरितं प्रभिन्नमिव कुञ्जरम्
अन्वगच्छद्विशालाक्षी शिशुर्गजवधूरिव
Tam sa vrajantam tvaritam prabhinnamiva kunjaram
Anvagachchhadvishalakshi shishurgajavadhuriva
35.10
दूरादेव तु तं प्रेक्ष्य राजपुत्रोऽभ्यभाषत
त्वया सारथिना पार्थः खाण्डवेऽग्निमतर्पयत्
Duradeva tu tam prekshya rajaputrobhyabhashata
Tvaya sarathina parthah khandavegnimatarpayat
35.11
पृथिवीमजयत्कृत्स्नां कुन्तीपुत्रो धनंजयः
सैरन्ध्री त्वां समाचष्ट सा हि जानाति पाण्डवान्
Prithivimajayatkritsnam kuntiputro dhananjayah
Sairandhri tvam samachashta sa hi janati pandavan
35.12
संयच्छ मामकानश्वांस्तथैव त्वं बृहन्नडे
कुरुभिर्योत्स्यमानस्य गोधनानि परीप्सतः
Sanyachchha mamakanashvanstathaiva tvam brihannade
Kurubhiryotsyamanasya godhanani paripsatah
35.13
अर्जुनस्य किलासीस्त्वं सारथिर्दयितः पुरा
त्वयाजयत्सहायेन पृथिवीं पाण्डवर्षभः
Arjunasya kilasistvam sarathirdayitah pura
Tvayajayatsahayena prithivim pandavarshabhah
35.14
एवमुक्ता प्रत्युवाच राजपुत्रं बृहन्नडा
का शक्तिर्मम सारथ्यं कर्तुं संग्राममूर्धनि
Evamukta pratyuvacha rajaputram brihannada
Ka shaktirmama sarathyam kartum sangramamurdhani
35.15
गीतं वा यदि वा नृत्तं वादित्रं वा पृथग्विधम्
तत्करिष्यामि भद्रं ते सारथ्यं तु कुतो मयि
Gitam va yadi va nrittam vaditram va prithagvidham
Tatkarishyami bhadram te sarathyam tu kuto mayi
35.16
उत्तर उवाच
बृहन्नडे गायनो वा नर्तनो वा पुनर्भव
क्षिप्रं मे रथमास्थाय निगृह्णीष्व हयोत्तमान्
Uttara uvacha
Brihannade gayano va nartano va punarbhava
Kshipram me rathamasthaya nigrihnishva hayottaman
35.17
वैशंपायन उवाच
स तत्र नर्मसंयुक्तमकरोत्पाण्डवो बहु
उत्तरायाः प्रमुखतः सर्वं जानन्नरिंदम
Vaishampayana uvacha
Sa tatra narmasanyuktamakarotpandavo bahu
Uttarayah pramukhatah sarvam janannarindama
35.18
ऊर्ध्वमुत्क्षिप्य कवचं शरीरे प्रत्यमुञ्चत
कुमार्यस्तत्र तं दृष्ट्वा प्राहसन्पृथुलोचनाः
Urdhvamutkshipya kavacham sharire pratyamunchata
Kumaryastatra tam drishtva prahasanprithulochanah
35.19
स तु दृष्ट्वा विमुह्यन्तं स्वयमेवोत्तरस्ततः
कवचेन महार्हेण समनह्यद्बृहन्नडाम्
Sa tu drishtva vimuhyantam svayamevottarastatah
Kavachena maharhena samanahyadbrihannadam
35.20
स बिभ्रत्कवचं चाग्र्यं स्वयमप्यंशुमत्प्रभम्
ध्वजं च सिंहमुच्छ्रित्य सारथ्ये समकल्पयत्
Sa bibhratkavacham chagryam svayamapyanshumatprabham
Dhvajam cha sinhamuchchhritya sarathye samakalpayat
35.21
धनूंषि च महार्हाणि बाणांश्च रुचिरान्बहून्
आदाय प्रययौ वीरः स बृहन्नडसारथिः
Dhanunshi cha maharhani bananshcha ruchiranbahun
Adaya prayayau virah sa brihannadasarathih
35.22
अथोत्तरा च कन्याश्च सख्यस्तामब्रुवंस्तदा
बृहन्नडे आनयेथा वासांसि रुचिराणि नः
Athottara cha kanyashcha sakhyastamabruvanstada
Brihannade anayetha vasansi ruchirani nah
35.23
पाञ्चालिकार्थं सूक्ष्माणि चित्राणि विविधानि च
विजित्य संग्रामगतान्भीष्मद्रोणमुखान्कुरून्
Panchalikartham sukshmani chitrani vividhani cha
Vijitya sangramagatanbhishmadronamukhankurun
35.24
अथ ता ब्रुवतीः कन्याः सहिताः पाण्डुनन्दनः
प्रत्युवाच हसन्पार्थो मेघदुन्दुभिनिःस्वनः
Atha ta bruvatih kanyah sahitah pandunandanah
Pratyuvacha hasanpartho meghadundubhinihsvanah
35.25
यद्युत्तरोऽयं संग्रामे विजेष्यति महारथान्
अथाहरिष्ये वासांसि दिव्यानि रुचिराणि च
Yadyuttaroyam sangrame vijeshyati maharathan
Athaharishye vasansi divyani ruchirani cha
35.26
एवमुक्त्वा तु बीभत्सुस्ततः प्राचोदयद्धयान्
कुरूनभिमुखाञ्शूरो नानाध्वजपताकिनः
Evamuktva tu bibhatsustatah prachodayaddhayan
Kurunabhimukhanshuro nanadhvajapatakinah