UtshovChapter 36
36.1
वैशंपायन उवाच
स राजधान्या निर्याय वैराटिः पृथिवींजयः
प्रयाहीत्यब्रवीत्सूतं यत्र ते कुरवो गताः
Vaishampayana uvacha
Sa rajadhanya niryaya vairatih prithivinjayah
Prayahityabravitsutam yatra te kuravo gatah
36.2
समवेतान्कुरून्यावज्जिगीषूनवजित्य वै
गाश्चैषां क्षिप्रमादाय पुनरायामि स्वं पुरम्
Samavetankurunyavajjigishunavajitya vai
Gashchaisham kshipramadaya punarayami svam puram
36.3
ततस्तांश्चोदयामास सदश्वान्पाण्डुनन्दनः
ते हया नरसिंहेन चोदिता वातरंहसः
आलिखन्त इवाकाशमूहुः काञ्चनमालिनः
Tatastanshchodayamasa sadashvanpandunandanah
Te haya narasinhena chodita vataranhasah
Alikhanta ivakashamuhuh kanchanamalinah
36.4
नातिदूरमथो यात्वा मत्स्यपुत्रधनंजयौ
अवेक्षेताममित्रघ्नौ कुरूणां बलिनां बलम्
श्मशानमभितो गत्वा आससाद कुरूनथ
Natiduramatho yatva matsyaputradhananjayau
Avekshetamamitraghnau kurunam balinam balam
Shmashanamabhito gatva asasada kurunatha
36.5
तदनीकं महत्तेषां विबभौ सागरस्वनम्
सर्पमाणमिवाकाशे वनं बहुलपादपम्
Tadanikam mahattesham vibabhau sagarasvanam
Sarpamanamivakashe vanam bahulapadapam
36.6
ददृशे पार्थिवो रेणुर्जनितस्तेन सर्पता
दृष्टिप्रणाशो भूतानां दिवस्पृङ्नरसत्तम
Dadrishe parthivo renurjanitastena sarpata
Drishtipranasho bhutanam divasprinnarasattama
36.7
तदनीकं महद्दृष्ट्वा गजाश्वरथसंकुलम्
कर्णदुर्योधनकृपैर्गुप्तं शांतनवेन च
Tadanikam mahaddrishtva gajashvarathasankulam
Karnaduryodhanakripairguptam shantanavena cha
36.8
द्रोणेन च सपुत्रेण महेष्वासेन धीमता
हृष्टरोमा भयोद्विग्नः पार्थं वैराटिरब्रवीत्
Dronena cha saputrena maheshvasena dhimata
Hrishtaroma bhayodvignah partham vairatirabravit
36.9
नोत्सहे कुरुभिर्योद्धुं रोमहर्षं हि पश्य मे
बहुप्रवीरमत्युग्रं देवैरपि दुरासदम्
प्रतियोद्धुं न शक्ष्यामि कुरुसैन्यमनन्तकम्
Notsahe kurubhiryoddhum romaharsham hi pashya me
Bahupraviramatyugram devairapi durasadam
Pratiyoddhum na shakshyami kurusainyamanantakam
36.10
नाशंसे भारतीं सेनां प्रवेष्टुं भीमकार्मुकाम्
रथनागाश्वकलिलां पत्तिध्वजसमाकुलाम्
दृष्ट्वैव हि परानाजावात्मा प्रव्यथतीव मे
Nashanse bharatim senam praveshtum bhimakarmukam
Rathanagashvakalilam pattidhvajasamakulam
Drishtvaiva hi paranajavatma pravyathativa me
36.11
यत्र द्रोणश्च भीष्मश्च कृपः कर्णो विविंशतिः
अश्वत्थामा विकर्णश्च सोमदत्तोऽथ बाह्लिकः
Yatra dronashcha bhishmashcha kripah karno vivinshatih
Ashvatthama vikarnashcha somadattotha bahlikah
36.12
दुर्योधनस्तथा वीरो राजा च रथिनां वरः
द्युतिमन्तो महेष्वासाः सर्वे युद्धविशारदाः
Duryodhanastatha viro raja cha rathinam varah
Dyutimanto maheshvasah sarve yuddhavisharadah
36.13
दृष्ट्वैव हि कुरूनेतान्व्यूढानीकान्प्रहारिणः
हृषितानि च रोमाणि कश्मलं चागतं मम
Drishtvaiva hi kurunetanvyudhanikanpraharinah
Hrishitani cha romani kashmalam chagatam mama
36.14
वैशंपायन उवाच
अवियातो वियातस्य मौर्ख्याद्धूर्तस्य पश्यतः
परिदेवयते मन्दः सकाशे सव्यसाचिनः
Vaishampayana uvacha
Aviyato viyatasya maurkhyaddhurtasya pashyatah
Paridevayate mandah sakashe savyasachinah
36.15
त्रिगर्तान्मे पिता यातः शून्ये संप्रणिधाय माम्
सर्वां सेनामुपादाय न मे सन्तीह सैनिकाः
Trigartanme pita yatah shunye sampranidhaya mam
Sarvam senamupadaya na me santiha sainikah
36.16
सोऽहमेको बहून्बालः कृतास्त्रानकृतश्रमः
प्रतियोद्धुं न शक्ष्यामि निवर्तस्व बृहन्नडे
Sohameko bahunbalah kritastranakritashramah
Pratiyoddhum na shakshyami nivartasva brihannade
36.17
अर्जुन उवाच
भयेन दीनरूपोऽसि द्विषतां हर्षवर्धनः
न च तावत्कृतं किंचित्परैः कर्म रणाजिरे
Arjuna uvacha
Bhayena dinaruposi dvishatam harshavardhanah
Na cha tavatkritam kinchitparaih karma ranajire
36.18
स्वयमेव च मामात्थ वह मां कौरवान्प्रति
सोऽहं त्वां तत्र नेष्यामि यत्रैते बहुला ध्वजाः
Svayameva cha mamattha vaha mam kauravanprati
Soham tvam tatra neshyami yatraite bahula dhvajah
36.19
मध्यमामिषगृध्राणां कुरूणामाततायिनाम्
नेष्यामि त्वां महाबाहो पृथिव्यामपि युध्यताम्
Madhyamamishagridhranam kurunamatatayinam
Neshyami tvam mahabaho prithivyamapi yudhyatam
36.20
तथा स्त्रीषु प्रतिश्रुत्य पौरुषं पुरुषेषु च
कत्थमानोऽभिनिर्याय किमर्थं न युयुत्ससे
Tatha strishu pratishrutya paurusham purusheshu cha
Katthamanobhiniryaya kimartham na yuyutsase
36.21
न चेद्विजित्य गास्तास्त्वं गृहान्वै प्रतियास्यसि
प्रहसिष्यन्ति वीर त्वां नरा नार्यश्च संगताः
Na chedvijitya gastastvam grihanvai pratiyasyasi
Prahasishyanti vira tvam nara naryashcha sangatah
36.22
अहमप्यत्र सैरन्ध्र्या स्तुतः सारथ्यकर्मणि
न हि शक्ष्याम्यनिर्जित्य गाः प्रयातुं पुरं प्रति
Ahamapyatra sairandhrya stutah sarathyakarmani
Na hi shakshyamyanirjitya gah prayatum puram prati
36.23
स्तोत्रेण चैव सैरन्ध्र्यास्तव वाक्येन तेन च
कथं न युध्येयमहं कुरून्सर्वान्स्थिरो भव
Stotrena chaiva sairandhryastava vakyena tena cha
Katham na yudhyeyamaham kurunsarvansthiro bhava
36.24
उत्तर उवाच
कामं हरन्तु मत्स्यानां भूयांसं कुरवो धनम्
प्रहसन्तु च मां नार्यो नरा वापि बृहन्नडे
Uttara uvacha
Kamam harantu matsyanam bhuyansam kuravo dhanam
Prahasantu cha mam naryo nara vapi brihannade
36.25
वैशंपायन उवाच
इत्युक्त्वा प्राद्रवद्भीतो रथात्प्रस्कन्द्य कुण्डली
त्यक्त्वा मानं स मन्दात्मा विसृज्य सशरं धनुः
Vaishampayana uvacha
Ityuktva pradravadbhito rathatpraskandya kundali
Tyaktva manam sa mandatma visrijya sasharam dhanuh
36.26
बृहन्नडोवाच
नैष पूर्वैः स्मृतो धर्मः क्षत्रियस्य पलायनम्
श्रेयस्ते मरणं युद्धे न भीतस्य पलायनम्
Brihannadovacha
Naisha purvaih smrito dharmah kshatriyasya palayanam
Shreyaste maranam yuddhe na bhitasya palayanam
36.27
वैशंपायन उवाच
एवमुक्त्वा तु कौन्तेयः सोऽवप्लुत्य रथोत्तमात्
तमन्वधावद्धावन्तं राजपुत्रं धनंजयः
दीर्घां वेणीं विधुन्वानः साधु रक्ते च वाससी
Vaishampayana uvacha
Evamuktva tu kaunteyah sovaplutya rathottamat
Tamanvadhavaddhavantam rajaputram dhananjayah
Dirgham venim vidhunvanah sadhu rakte cha vasasi
36.28
विधूय वेणीं धावन्तमजानन्तोऽर्जुनं तदा
सैनिकाः प्राहसन्केचित्तथारूपमवेक्ष्य तम्
Vidhuya venim dhavantamajanantorjunam tada
Sainikah prahasankechittatharupamavekshya tam
36.29
तं शीघ्रमभिधावन्तं संप्रेक्ष्य कुरवोऽब्रुवन्
क एष वेषप्रच्छन्नो भस्मनेव हुताशनः
Tam shighramabhidhavantam samprekshya kuravobruvan
Ka esha veshaprachchhanno bhasmaneva hutashanah
36.30
किंचिदस्य यथा पुंसः किंचिदस्य यथा स्त्रियः
सारूप्यमर्जुनस्येव क्लीबरूपं बिभर्ति च
Kinchidasya yatha punsah kinchidasya yatha striyah
Sarupyamarjunasyeva klibarupam bibharti cha
36.31
तदेवैतच्छिरोग्रीवं तौ बाहू परिघोपमौ
तद्वदेवास्य विक्रान्तं नायमन्यो धनंजयात्
Tadevaitachchhirogrivam tau bahu parighopamau
Tadvadevasya vikrantam nayamanyo dhananjayat
36.32
अमरेष्विव देवेन्द्रो मानुषेषु धनंजयः
एकः कोऽस्मानुपायायादन्यो लोके धनंजयात्
Amareshviva devendro manusheshu dhananjayah
Ekah kosmanupayayadanyo loke dhananjayat
36.33
एकः पुत्रो विराटस्य शून्ये संनिहितः पुरे
स एष किल निर्यातो बालभावान्न पौरुषात्
Ekah putro viratasya shunye sannihitah pure
Sa esha kila niryato balabhavanna paurushat
36.34
सत्रेण नूनं छन्नं हि चरन्तं पार्थमर्जुनम्
उत्तरः सारथिं कृत्वा निर्यातो नगराद्बहिः
Satrena nunam chhannam hi charantam parthamarjunam
Uttarah sarathim kritva niryato nagaradbahih
36.35
स नो मन्ये ध्वजान्दृष्ट्वा भीत एष पलायति
तं नूनमेष धावन्तं जिघृक्षति धनंजयः
Sa no manye dhvajandrishtva bhita esha palayati
Tam nunamesha dhavantam jighrikshati dhananjayah
36.36
इति स्म कुरवः सर्वे विमृशन्तः पृथक्पृथक्
न च व्यवसितुं किंचिदुत्तरं शक्नुवन्ति ते
छन्नं तथा तं सत्रेण पाण्डवं प्रेक्ष्य भारत
Iti sma kuravah sarve vimrishantah prithakprithak
Na cha vyavasitum kinchiduttaram shaknuvanti te
Chhannam tatha tam satrena pandavam prekshya bharata
36.37
उत्तरं तु प्रधावन्तमनुद्रुत्य धनंजयः
गत्वा पदशतं तूर्णं केशपक्षे परामृशत्
Uttaram tu pradhavantamanudrutya dhananjayah
Gatva padashatam turnam keshapakshe paramrishat
36.38
सोऽर्जुनेन परामृष्टः पर्यदेवयदार्तवत्
बहुलं कृपणं चैव विराटस्य सुतस्तदा
Sorjunena paramrishtah paryadevayadartavat
Bahulam kripanam chaiva viratasya sutastada
36.39
शातकुम्भस्य शुद्धस्य शतं निष्कान्ददामि ते
मणीनष्टौ च वैडूर्यान्हेमबद्धान्महाप्रभान्
Shatakumbhasya shuddhasya shatam nishkandadami te
Maninashtau cha vaiduryanhemabaddhanmahaprabhan
36.40
हेमदण्डप्रतिच्छन्नं रथं युक्तं च सुव्रजैः
मत्तांश्च दश मातङ्गान्मुञ्च मां त्वं बृहन्नडे
Hemadandapratichchhannam ratham yuktam cha suvrajaih
Mattanshcha dasha matanganmuncha mam tvam brihannade
36.41
वैशंपायन उवाच
एवमादीनि वाक्यानि विलपन्तमचेतसम्
प्रहस्य पुरुषव्याघ्रो रथस्यान्तिकमानयत्
Vaishampayana uvacha
Evamadini vakyani vilapantamachetasam
Prahasya purushavyaghro rathasyantikamanayat
36.42
अथैनमब्रवीत्पार्थो भयार्तं नष्टचेतसम्
यदि नोत्सहसे योद्धुं शत्रुभिः शत्रुकर्शन
एहि मे त्वं हयान्यच्छ युध्यमानस्य शत्रुभिः
Athainamabravitpartho bhayartam nashtachetasam
Yadi notsahase yoddhum shatrubhih shatrukarshana
Ehi me tvam hayanyachchha yudhyamanasya shatrubhih
36.43
प्रयाह्येतद्रथानीकं मद्बाहुबलरक्षितः
अप्रधृष्यतमं घोरं गुप्तं वीरैर्महारथैः
Prayahyetadrathanikam madbahubalarakshitah
Apradhrishyatamam ghoram guptam virairmaharathaih
36.44
मा भैस्त्वं राजपुत्राग्र्य क्षत्रियोऽसि परंतप
अहं वै कुरुभिर्योत्स्याम्यवजेष्यामि ते पशून्
Ma bhaistvam rajaputragrya kshatriyosi parantapa
Aham vai kurubhiryotsyamyavajeshyami te pashun
36.45
प्रविश्यैतद्रथानीकमप्रधृष्यं दुरासदम्
यन्ता भूस्त्वं नरश्रेष्ठ योत्स्येऽहं कुरुभिः सह
Pravishyaitadrathanikamapradhrishyam durasadam
Yanta bhustvam narashreshtha yotsyeham kurubhih saha
36.46
एवं ब्रुवाणो बीभत्सुर्वैराटिमपराजितः
समाश्वास्य मुहूर्तं तमुत्तरं भरतर्षभ
Evam bruvano bibhatsurvairatimaparajitah
Samashvasya muhurtam tamuttaram bharatarshabha
36.47
तत एनं विचेष्टन्तमकामं भयपीडितम्
रथमारोपयामास पार्थः प्रहरतां वरः
Tata enam vicheshtantamakamam bhayapiditam
Rathamaropayamasa parthah praharatam varah