UtshovChapter 37
37.1
वैशंपायन उवाच
तं दृष्ट्वा क्लीबवेषेण रथस्थं नरपुंगवम्
शमीमभिमुखं यान्तं रथमारोप्य चोत्तरम्
Vaishampayana uvacha
Tam drishtva klibaveshena rathastham narapungavam
Shamimabhimukham yantam rathamaropya chottaram
37.2
भीष्मद्रोणमुखास्तत्र कुरूणां रथसत्तमाः
वित्रस्तमनसः सर्वे धनंजयकृताद्भयात्
Bhishmadronamukhastatra kurunam rathasattamah
Vitrastamanasah sarve dhananjayakritadbhayat
37.3
तानवेक्ष्य हतोत्साहानुत्पातानपि चाद्भुतान्
गुरुः शस्त्रभृतां श्रेष्ठो भारद्वाजोऽभ्यभाषत
Tanavekshya hatotsahanutpatanapi chadbhutan
Guruh shastrabhritam shreshtho bharadvajobhyabhashata
37.4
चलाश्च वाताः संवान्ति रूक्षाः परुषनिःस्वनाः
भस्मवर्णप्रकाशेन तमसा संवृतं नभः
Chalashcha vatah sanvanti rukshah parushanihsvanah
Bhasmavarnaprakashena tamasa sanvritam nabhah
37.5
रूक्षवर्णाश्च जलदा दृश्यन्तेऽद्भुतदर्शनाः
निःसरन्ति च कोशेभ्यः शस्त्राणि विविधानि च
Rukshavarnashcha jalada drishyantedbhutadarshanah
Nihsaranti cha koshebhyah shastrani vividhani cha
37.6
शिवाश्च विनदन्त्येता दीप्तायां दिशि दारुणाः
हयाश्चाश्रूणि मुञ्चन्ति ध्वजाः कम्पन्त्यकम्पिताः
Shivashcha vinadantyeta diptayam dishi darunah
Hayashchashruni munchanti dhvajah kampantyakampitah
37.7
यादृशान्यत्र रूपाणि संदृश्यन्ते बहून्यपि
यत्ता भवन्तस्तिष्ठन्तु स्याद्युद्धं समुपस्थितम्
Yadrishanyatra rupani sandrishyante bahunyapi
Yatta bhavantastishthantu syadyuddham samupasthitam
37.8
रक्षध्वमपि चात्मानं व्यूहध्वं वाहिनीमपि
वैशसं च प्रतीक्षध्वं रक्षध्वं चापि गोधनम्
Rakshadhvamapi chatmanam vyuhadhvam vahinimapi
Vaishasam cha pratikshadhvam rakshadhvam chapi godhanam
37.9
एष वीरो महेष्वासः सर्वशस्त्रभृतां वरः
आगतः क्लीबवेषेण पार्थो नास्त्यत्र संशयः
Esha viro maheshvasah sarvashastrabhritam varah
Agatah klibaveshena partho nastyatra sanshayah
37.10
स एष पार्थो विक्रान्तः सव्यसाची परंतपः
नायुद्धेन निवर्तेत सर्वैरपि मरुद्गणैः
Sa esha partho vikrantah savyasachi parantapah
Nayuddhena nivarteta sarvairapi marudganaih
37.11
क्लेशितश्च वने शूरो वासवेन च शिक्षितः
अमर्षवशमापन्नो योत्स्यते नात्र संशयः
Kleshitashcha vane shuro vasavena cha shikshitah
Amarshavashamapanno yotsyate natra sanshayah
37.12
नेहास्य प्रतियोद्धारमहं पश्यामि कौरवाः
महादेवोऽपि पार्थेन श्रूयते युधि तोषितः
Nehasya pratiyoddharamaham pashyami kauravah
Mahadevopi parthena shruyate yudhi toshitah
37.13
कर्ण उवाच
सदा भवान्फल्गुनस्य गुणैरस्मान्विकत्थसे
न चार्जुनः कला पूर्णा मम दुर्योधनस्य वा
Karna uvacha
Sada bhavanphalgunasya gunairasmanvikatthase
Na charjunah kala purna mama duryodhanasya va
37.14
दुर्योधन उवाच
यद्येष पार्थो राधेय कृतं कार्यं भवेन्मम
ज्ञाताः पुनश्चरिष्यन्ति द्वादशान्यान्हि वत्सरान्
Duryodhana uvacha
Yadyesha partho radheya kritam karyam bhavenmama
Gyatah punashcharishyanti dvadashanyanhi vatsaran
37.15
अथैष कश्चिदेवान्यः क्लीबवेषेण मानवः
शरैरेनं सुनिशितैः पातयिष्यामि भूतले
Athaisha kashchidevanyah klibaveshena manavah
Sharairenam sunishitaih patayishyami bhutale
37.16
वैशंपायन उवाच
तस्मिन्ब्रुवति तद्वाक्यं धार्तराष्ट्रे परंतपे
भीष्मो द्रोणः कृपो द्रौणिः पौरुषं तदपूजयन्
Vaishampayana uvacha
Tasminbruvati tadvakyam dhartarashtre parantape
Bhishmo dronah kripo draunih paurusham tadapujayan