Utshovঅধ্যায় 37
37.1
বৈশংপায়ন উবাচ
তং দৃষ্ট্বা ক্লীববেষেণ রথস্থং নরপুংগবম্
শমীমভিমুখং যান্তং রথমারোপ্য চোত্তরম্
37.2
ভীষ্মদ্রোণমুখাস্তত্র কুরূণাং রথসত্তমাঃ
বিত্রস্তমনসঃ সর্বে ধনংজয়কৃতাদ্ভয়াৎ
37.3
তানবেক্ষ্য হতোত্সাহানুত্পাতানপি চাদ্ভুতান্
গুরুঃ শস্ত্রভৃতাং শ্রেষ্ঠো ভারদ্বাজোঽভ্যভাষত
37.4
চলাশ্চ বাতাঃ সংবান্তি রূক্ষাঃ পরুষনিঃস্বনাঃ
ভস্মবর্ণপ্রকাশেন তমসা সংবৃতং নভঃ
37.5
রূক্ষবর্ণাশ্চ জলদা দৃশ্যন্তেঽদ্ভুতদর্শনাঃ
নিঃসরন্তি চ কোশেভ্যঃ শস্ত্রাণি বিবিধানি চ
37.6
শিবাশ্চ বিনদন্ত্যেতা দীপ্তায়াং দিশি দারুণাঃ
হয়াশ্চাশ্রূণি মুঞ্চন্তি ধ্বজাঃ কম্পন্ত্যকম্পিতাঃ
37.7
যাদৃশান্যত্র রূপাণি সংদৃশ্যন্তে বহূন্যপি
যত্তা ভবন্তস্তিষ্ঠন্তু স্যাদ্যুদ্ধং সমুপস্থিতম্
37.8
রক্ষধ্বমপি চাত্মানং ব্যূহধ্বং বাহিনীমপি
বৈশসং চ প্রতীক্ষধ্বং রক্ষধ্বং চাপি গোধনম্
37.9
এষ বীরো মহেষ্বাসঃ সর্বশস্ত্রভৃতাং বরঃ
আগতঃ ক্লীববেষেণ পার্থো নাস্ত্যত্র সংশয়ঃ
37.10
স এষ পার্থো বিক্রান্তঃ সব্যসাচী পরংতপঃ
নায়ুদ্ধেন নিবর্তেত সর্বৈরপি মরুদ্গণৈঃ
37.11
ক্লেশিতশ্চ বনে শূরো বাসবেন চ শিক্ষিতঃ
অমর্ষবশমাপন্নো যোত্স্যতে নাত্র সংশয়ঃ
37.12
নেহাস্য প্রতিয়োদ্ধারমহং পশ্যামি কৌরবাঃ
মহাদেবোঽপি পার্থেন শ্রূয়তে যুধি তোষিতঃ
37.13
কর্ণ উবাচ
সদা ভবান্ফল্গুনস্য গুণৈরস্মান্বিকত্থসে
ন চার্জুনঃ কলা পূর্ণা মম দুর্যোধনস্য বা
37.14
দুর্যোধন উবাচ
যদ্যেষ পার্থো রাধেয় কৃতং কার্যং ভবেন্মম
জ্ঞাতাঃ পুনশ্চরিষ্যন্তি দ্বাদশান্যান্হি বত্সরান্
37.15
অথৈষ কশ্চিদেবান্যঃ ক্লীববেষেণ মানবঃ
শরৈরেনং সুনিশিতৈঃ পাতয়িষ্যামি ভূতলে
37.16
বৈশংপায়ন উবাচ
তস্মিন্ব্রুবতি তদ্বাক্যং ধার্তরাষ্ট্রে পরংতপে
ভীষ্মো দ্রোণঃ কৃপো দ্রৌণিঃ পৌরুষং তদপূজয়ন্