Utshovঅধ্যায় 38
38.1
বৈশংপায়ন উবাচ
তাং শমীমুপসংগম্য পার্থো বৈরাটিমব্রবীৎ
সুকুমারং সমাজ্ঞাতং সংগ্রামে নাতিকোবিদম্
38.2
সমাদিষ্টো ময়া ক্ষিপ্রং ধনূংষ্যবহরোত্তর
নেমানি হি ত্বদীয়ানি সোঢুং শক্ষ্যন্তি মে বলম্
38.3
ভারং বাপি গুরুং হর্তুং কুঞ্জরং বা প্রমর্দিতুম্
মম বা বাহুবিক্ষেপং শত্রূনিহ বিজেষ্যতঃ
38.4
তস্মাদ্ভূমিংজয়ারোহ শমীমেতাং পলাশিনীম্
অস্যাং হি পাণ্ডুপুত্রাণাং ধনূংষি নিহিতান্যুত
38.5
যুধিষ্ঠিরস্য ভীমস্য বীভত্সোর্যময়োস্তথা
ধ্বজাঃ শরাশ্চ শূরাণাং দিব্যানি কবচানি চ
38.6
অত্র চৈতন্মহাবীর্যং ধনুঃ পার্থস্য গাণ্ডিবম্
একং শতসহস্রেণ সংমিতং রাষ্ট্রবর্ধনম্
38.7
ব্যায়ামসহমত্যর্থং তৃণরাজসমং মহৎ
সর্বায়ুধমহামাত্রং শত্রুসংবাধকারকম্
38.8
সুবর্ণবিকৃতং দিব্যং শ্লক্ষ্ণমায়তমব্রণম্
অলং ভারং গুরুং বোঢুং দারুণং চারুদর্শনম্
তাদৃশান্যেব সর্বাণি বলবন্তি দৃঢানি চ
38.9
উত্তর উবাচ
অস্মিন্বৃক্ষে কিলোদ্বদ্ধং শরীরমিতি নঃ শ্রুতম্
তদহং রাজপুত্রঃ সন্স্পৃশেয়ং পাণিনা কথম্
38.10
নৈবংবিধং ময়া যুক্তমালব্ধুং ক্ষত্রয়োনিনা
মহতা রাজপুত্রেণ মন্ত্রয়জ্ঞবিদা সতা
38.11
স্পৃষ্টবন্তং শরীরং মাং শববাহমিবাশুচিম্
কথং বা ব্যবহার্যং বৈ কুর্বীথাস্ত্বং বৃহন্নডে
38.12
বৃহন্নডোবাচ
ব্যবহার্যশ্চ রাজেন্দ্র শুচিশ্চৈব ভবিষ্যসি
ধনূংষ্যেতানি মা ভৈস্ত্বং শরীরং নাত্র বিদ্যতে
38.13
দায়াদং মত্স্যরাজস্য কুলে জাতং মনস্বিনম্
কথং ত্বা নিন্দিতং কর্ম কারয়েয়ং নৃপাত্মজ
38.14
বৈশংপায়ন উবাচ
এবমুক্তঃ স পার্থেন রথাত্প্রস্কন্দ্য কুণ্ডলী
আরুরোহ শমীবৃক্ষং বৈরাটিরবশস্তদা
38.15
তমন্বশাসচ্ছত্রুঘ্নো রথে তিষ্ঠন্ধনংজয়ঃ
পরিবেষ্টনমেতেষাং ক্ষিপ্রং চৈব ব্যপানুদ
38.16
তথা সংনহনান্যেষাং পরিমুচ্য সমন্ততঃ
অপশ্যদ্গাণ্ডিবং তত্র চতুর্ভিরপরৈঃ সহ
38.17
তেষাং বিমুচ্যমানানাং ধনুষামর্কবর্চসাম্
বিনিশ্চেরুঃ প্রভা দিব্যা গ্রহাণামুদয়েষ্বিব
38.18
স তেষাং রূপমালোক্য ভোগিনামিব জৃম্ভতাম্
হৃষ্টরোমা ভয়োদ্বিগ্নঃ ক্ষণেন সমপদ্যত
38.19
সংস্পৃশ্য তানি চাপানি ভানুমন্তি বৃহন্তি চ
বৈরাটিরর্জুনং রাজন্নিদং বচনমব্রবীৎ
38.20
উত্তর উবাচ
বিন্দবো জাতরূপস্য শতং যস্মিন্নিপাতিতাঃ
সহস্রকোটি সৌবর্ণাঃ কস্যৈতদ্ধনুরুত্তমম্
38.21
বারণা যস্য সৌবর্ণাঃ পৃষ্ঠে ভাসন্তি দংশিতাঃ
সুপার্শ্বং সুগ্রহং চৈব কস্যৈতদ্ধনুরুত্তমম্
38.22
তপনীয়স্য শুদ্ধস্য ষষ্টির্যস্যেন্দ্রগোপকাঃ
পৃষ্ঠে বিভক্তাঃ শোভন্তে কস্যৈতদ্ধনুরুত্তমম্
38.23
সূর্যা যত্র চ সৌবর্ণাস্ত্রয়ো ভাসন্তি দংশিতাঃ
তেজসা প্রজ্বলন্তো হি কস্যৈতদ্ধনুরুত্তমম্
38.24
শালভা যত্র সৌবর্ণাস্তপনীয়বিচিত্রিতাঃ
সুবর্ণমণিচিত্রং চ কস্যৈতদ্ধনুরুত্তমম্
38.25
ইমে চ কস্য নারাচাঃ সহস্রা লোমবাহিনঃ
সমন্তাত্কলধৌতাগ্রা উপাসঙ্গে হিরণ্ময়ে
38.26
বিপাঠাঃ পৃথবঃ কস্য গার্ধ্রপত্রাঃ শিলাশিতাঃ
হারিদ্রবর্ণাঃ সুনসাঃ পীতাঃ সর্বায়সাঃ শরাঃ
38.27
কস্যায়মসিতাবাপঃ পঞ্চশার্দূললক্ষণঃ
বরাহকর্ণব্যামিশ্রঃ শরান্ধারয়তে দশ
38.28
কস্যেমে পৃথবো দীর্ঘাঃ সর্বপারশবাঃ শরাঃ
শতানি সপ্ত তিষ্ঠন্তি নারাচা রুধিরাশনাঃ
38.29
কস্যেমে শুকপত্রাভৈঃ পূর্বৈরর্ধৈঃ সুবাসসঃ
উত্তরৈরায়সৈঃ পীতৈর্হেমপুঙ্খৈঃ শিলাশিতৈঃ
38.30
কস্যায়ং সায়কো দীর্ঘঃ শিলীপৃষ্ঠঃ শিলীমুখঃ
বৈয়াঘ্রকোশে নিহিতো হেমচিত্রত্সরুর্মহান্
38.31
সুফলশ্চিত্রকোশশ্চ কিঙ্কিণীসায়কো মহান্
কস্য হেমত্সরুর্দিব্যঃ খড্গঃ পরমনির্ব্রণঃ
38.32
কস্যায়ং বিমলঃ খড্গো গব্যে কোশে সমর্পিতঃ
হেমত্সরুরনাধৃষ্যো নৈষধ্যো ভারসাধনঃ
38.33
কস্য পাঞ্চনখে কোশে সায়কো হেমবিগ্রহঃ
প্রমাণরূপসংপন্নঃ পীত আকাশসংনিভঃ
38.34
কস্য হেমময়ে কোশে সুতপ্তে পাবকপ্রভে
নিস্ত্রিংশোঽয়ং গুরুঃ পীতঃ সৈক্যঃ পরমনির্ব্রণঃ
38.35
নির্দিশস্ব যথাতত্ত্বং ময়া পৃষ্টা বৃহন্নডে
বিস্ময়ো মে পরো জাতো দৃষ্ট্বা সর্বমিদং মহৎ
38.36
বৃহন্নডোবাচ
যন্মাং পূর্বমিহাপৃচ্ছঃ শত্রুসেনানিবর্হণম্
গাণ্ডীবমেতত্পার্থস্য লোকেষু বিদিতং ধনুঃ
38.37
সর্বায়ুধমহামাত্রং শাতকুম্ভপরিষ্কৃতম্
এতত্তদর্জুনস্যাসীদ্গাণ্ডীবং পরমায়ুধম্
38.38
যত্তচ্ছতসহস্রেণ সংমিতং রাষ্ট্রবর্ধনম্
যেন দেবান্মনুষ্যাংশ্চ পার্থো বিষহতে মৃধে
38.39
দেবদানবগন্ধর্বৈঃ পূজিতং শাশ্বতীঃ সমাঃ
এতদ্বর্ষসহস্রং তু ব্রহ্মা পূর্বমধারয়ৎ
38.40
ততোঽনন্তরমেবাথ প্রজাপতিরধারয়ৎ
ত্রীণি পঞ্চশতং চৈব শক্রোঽশীতি চ পঞ্চ চ
38.41
সোমঃ পঞ্চশতং রাজা তথৈব বরুণঃ শতম্
পার্থঃ পঞ্চ চ ষষ্টিং চ বর্ষাণি শ্বেতবাহনঃ
38.42
মহাবীর্যং মহদ্দিব্যমেতত্তদ্ধনুরুত্তমম্
পূজিতং সুরমর্ত্যেষু বিভর্তি পরমং বপুঃ
38.43
সুপার্শ্বং ভীমসেনস্য জাতরূপগ্রহং ধনুঃ
যেন পার্থোঽজয়ত্কৃত্স্নাং দিশং প্রাচীং পরংতপঃ
38.44
ইন্দ্রগোপকচিত্রং চ যদেতচ্চারুবিগ্রহম্
রাজ্ঞো যুধিষ্ঠিরস্যৈতদ্বৈরাটে ধনুরুত্তমম্
38.45
সূর্যা যস্মিংস্তু সৌবর্ণাঃ প্রভাসন্তে প্রভাসিনঃ
তেজসা প্রজ্বলন্তো বৈ নকুলস্যৈতদায়ুধম্
38.46
শলভা যত্র সৌবর্ণাস্তপনীয়বিচিত্রিতাঃ
এতন্মাদ্রীসুতস্যাপি সহদেবস্য কার্মুকম্
38.47
যে ত্বিমে ক্ষুরসংকাশাঃ সহস্রা লোমবাহিনঃ
এতেঽর্জুনস্য বৈরাটে শরাঃ সর্পবিষোপমাঃ
38.48
এতে জ্বলন্তঃ সংগ্রামে তেজসা শীঘ্রগামিনঃ
ভবন্তি বীরস্যাক্ষয্যা ব্যূহতঃ সমরে রিপূন্
38.49
যে চেমে পৃথবো দীর্ঘাশ্চন্দ্রবিম্বার্ধদর্শনাঃ
এতে ভীমস্য নিশিতা রিপুক্ষয়করাঃ শরাঃ
38.50
হারিদ্রবর্ণা যে ত্বেতে হেমপুঙ্খাঃ শিলাশিতাঃ
নকুলস্য কলাপোঽয়ং পঞ্চশার্দূললক্ষণঃ
38.51
যেনাসৌ ব্যজয়ত্কৃত্স্নাং প্রতীচীং দিশমাহবে
কলাপো হ্যেষ তস্যাসীন্মাদ্রীপুত্রস্য ধীমতঃ
38.52
যে ত্বিমে ভাস্করাকারাঃ সর্বপারশবাঃ শরাঃ
এতে চিত্রাঃ ক্রিয়োপেতাঃ সহদেবস্য ধীমতঃ
38.53
যে ত্বিমে নিশিতাঃ পীতাঃ পৃথবো দীর্ঘবাসসঃ
হেমপুঙ্খাস্ত্রিপর্বাণো রাজ্ঞ এতে মহাশরাঃ
38.54
যস্ত্বয়ং সায়কো দীর্ঘঃ শিলীপৃষ্ঠঃ শিলীমুখঃ
অর্জুনস্যৈষ সংগ্রামে গুরুভারসহো দৃঢঃ
38.55
বৈয়াঘ্রকোশস্তু মহান্ভীমসেনস্য সায়কঃ
গুরুভারসহো দিব্যঃ শাত্রবাণাং ভয়ংকরঃ
38.56
সুফলশ্চিত্রকোশশ্চ হেমত্সরুরনুত্তমঃ
নিস্ত্রিংশঃ কৌরবস্যৈষ ধর্মরাজস্য ধীমতঃ
38.57
যস্তু পাঞ্চনখে কোশে নিহিতশ্চিত্রসেবনে
নকুলস্যৈষ নিস্ত্রিংশো গুরুভারসহো দৃঢঃ
38.58
যস্ত্বয়ং বিমলঃ খড্গো গব্যে কোশে সমর্পিতঃ
সহদেবস্য বিদ্ধ্যেনং সর্বভারসহং দৃঢম্