অধ্যায় 39

39.1

উত্তর উবাচ
সুবর্ণবিকৃতানীমান্যায়ুধানি মহাত্মনাম্
রুচিরাণি প্রকাশন্তে পার্থানামাশুকারিণাম্

ক্ব নু স্বিদর্জুনঃ পার্থঃ কৌরব্যো বা যুধিষ্ঠিরঃ
নকুলঃ সহদেবশ্চ ভীমসেনশ্চ পাণ্ডবঃ

সর্ব এব মহাত্মানঃ সর্বামিত্রবিনাশনাঃ
রাজ্যমক্ষৈঃ পরাকীর্য ন শ্রূয়ন্তে কদাচন

দ্রৌপদী ক্ব চ পাঞ্চালী স্ত্রীরত্নমিতি বিশ্রুতা
জিতানক্ষৈস্তদা কৃষ্ণা তানেবান্বগমদ্বনম্

অর্জুন উবাচ
অহমস্ম্যর্জুনঃ পার্থঃ সভাস্তারো যুধিষ্ঠিরঃ
বল্লবো ভীমসেনস্তু পিতুস্তে রসপাচকঃ

অশ্ববন্ধোঽথ নকুলঃ সহদেবস্তু গোকুলে
সৈরন্ধ্রীং দ্রৌপদীং বিদ্ধি যত্কৃতে কীচকা হতাঃ

উত্তর উবাচ
দশ পার্থস্য নামানি যানি পূর্বং শ্রুতানি মে
প্রব্রূয়াস্তানি যদি মে শ্রদ্দধ্যাং সর্বমেব তে

অর্জুন উবাচ
হন্ত তেঽহং সমাচক্ষে দশ নামানি যানি মে
অর্জুনঃ ফল্গুনো জিষ্ণুঃ কিরীটী শ্বেতবাহনঃ
বীভত্সুর্বিজয়ঃ কৃষ্ণঃ সব্যসাচী ধনংজয়ঃ

উত্তর উবাচ
কেনাসি বিজয়ো নাম কেনাসি শ্বেতবাহনঃ
কিরীটী নাম কেনাসি সব্যসাচী কথং ভবান্

অর্জুনঃ ফল্গুনো জিষ্ণুঃ কৃষ্ণো বীভত্সুরেব চ
ধনংজয়শ্চ কেনাসি প্রব্রূহি মম তত্ত্বতঃ
শ্রুতা মে তস্য বীরস্য কেবলা নামহেতবঃ

অর্জুন উবাচ
সর্বাঞ্জনপদাঞ্জিত্বা বিত্তমাচ্ছিদ্য কেবলম্
মধ্যে ধনস্য তিষ্ঠামি তেনাহুর্মাং ধনংজয়ম্

অভিপ্রয়ামি সংগ্রামে যদহং যুদ্ধদুর্মদান্
নাজিত্বা বিনিবর্তামি তেন মাং বিজয়ং বিদুঃ

শ্বেতাঃ কাঞ্চনসংনাহা রথে যুজ্যন্তি মে হয়াঃ
সংগ্রামে যুধ্যমানস্য তেনাহং শ্বেতবাহনঃ

উত্তরাভ্যাং চ পূর্বাভ্যাং ফল্গুনীভ্যামহং দিবা
জাতো হিমবতঃ পৃষ্ঠে তেন মাং ফল্গুনং বিদুঃ

পুরা শক্রেণ মে দত্তং যুধ্যতো দানবর্ষভৈঃ
কিরীটং মূর্ধ্নি সূর্যাভং তেন মাহুঃ কিরীটিনম্

ন কুর্যাং কর্ম বীভত্সং যুধ্যমানঃ কথংচন
তেন দেবমনুষ্যেষু বীভত্সুরিতি মাং বিদুঃ

উভৌ মে দক্ষিণৌ পাণী গাণ্ডীবস্য বিকর্ষণে
তেন দেবমনুষ্যেষু সব্যসাচীতি মাং বিদুঃ

পৃথিব্যাং চতুরন্তায়াং বর্ণো মে দুর্লভঃ সমঃ
করোমি কর্ম শুক্লং চ তেন মামর্জুনং বিদুঃ

অহং দুরাপো দুর্ধর্ষো দমনঃ পাকশাসনিঃ
তেন দেবমনুষ্যেষু জিষ্ণুনামাস্মি বিশ্রুতঃ

কৃষ্ণ ইত্যেব দশমং নাম চক্রে পিতা মম
কৃষ্ণাবদাতস্য সতঃ প্রিয়ত্বাদ্বালকস্য বৈ

বৈশংপায়ন উবাচ
ততঃ পার্থং স বৈরাটিরভ্যবাদয়দন্তিকাৎ
অহং ভূমিংজয়ো নাম নাম্নাহমপি চোত্তরঃ

দিষ্ট্যা ত্বাং পার্থ পশ্যামি স্বাগতং তে ধনংজয়
লোহিতাক্ষ মহাবাহো নাগরাজকরোপম
যদজ্ঞানাদবোচং ত্বাং ক্ষন্তুমর্হসি তন্মম

যতস্ত্বয়া কৃতং পূর্বং বিচিত্রং কর্ম দুষ্করম্
অতো ভয়ং ব্যতীতং মে প্রীতিশ্চ পরমা ত্বয়ি