UtshovChapter 39
39.1
उत्तर उवाच
सुवर्णविकृतानीमान्यायुधानि महात्मनाम्
रुचिराणि प्रकाशन्ते पार्थानामाशुकारिणाम्
Uttara uvacha
Suvarnavikritanimanyayudhani mahatmanam
Ruchirani prakashante parthanamashukarinam
39.2
क्व नु स्विदर्जुनः पार्थः कौरव्यो वा युधिष्ठिरः
नकुलः सहदेवश्च भीमसेनश्च पाण्डवः
Kva nu svidarjunah parthah kauravyo va yudhishthirah
Nakulah sahadevashcha bhimasenashcha pandavah
39.3
सर्व एव महात्मानः सर्वामित्रविनाशनाः
राज्यमक्षैः पराकीर्य न श्रूयन्ते कदाचन
Sarva eva mahatmanah sarvamitravinashanah
Rajyamakshaih parakirya na shruyante kadachana
39.4
द्रौपदी क्व च पाञ्चाली स्त्रीरत्नमिति विश्रुता
जितानक्षैस्तदा कृष्णा तानेवान्वगमद्वनम्
Draupadi kva cha panchali striratnamiti vishruta
Jitanakshaistada krishna tanevanvagamadvanam
39.5
अर्जुन उवाच
अहमस्म्यर्जुनः पार्थः सभास्तारो युधिष्ठिरः
बल्लवो भीमसेनस्तु पितुस्ते रसपाचकः
Arjuna uvacha
Ahamasmyarjunah parthah sabhastaro yudhishthirah
Ballavo bhimasenastu pituste rasapachakah
39.6
अश्वबन्धोऽथ नकुलः सहदेवस्तु गोकुले
सैरन्ध्रीं द्रौपदीं विद्धि यत्कृते कीचका हताः
Ashvabandhotha nakulah sahadevastu gokule
Sairandhrim draupadim viddhi yatkrite kichaka hatah
39.7
उत्तर उवाच
दश पार्थस्य नामानि यानि पूर्वं श्रुतानि मे
प्रब्रूयास्तानि यदि मे श्रद्दध्यां सर्वमेव ते
Uttara uvacha
Dasha parthasya namani yani purvam shrutani me
Prabruyastani yadi me shraddadhyam sarvameva te
39.8
अर्जुन उवाच
हन्त तेऽहं समाचक्षे दश नामानि यानि मे
अर्जुनः फल्गुनो जिष्णुः किरीटी श्वेतवाहनः
बीभत्सुर्विजयः कृष्णः सव्यसाची धनंजयः
Arjuna uvacha
Hanta teham samachakshe dasha namani yani me
Arjunah phalguno jishnuh kiriti shvetavahanah
Bibhatsurvijayah krishnah savyasachi dhananjayah
39.9
उत्तर उवाच
केनासि विजयो नाम केनासि श्वेतवाहनः
किरीटी नाम केनासि सव्यसाची कथं भवान्
Uttara uvacha
Kenasi vijayo nama kenasi shvetavahanah
Kiriti nama kenasi savyasachi katham bhavan
39.10
अर्जुनः फल्गुनो जिष्णुः कृष्णो बीभत्सुरेव च
धनंजयश्च केनासि प्रब्रूहि मम तत्त्वतः
श्रुता मे तस्य वीरस्य केवला नामहेतवः
Arjunah phalguno jishnuh krishno bibhatsureva cha
Dhananjayashcha kenasi prabruhi mama tattvatah
Shruta me tasya virasya kevala namahetavah
39.11
अर्जुन उवाच
सर्वाञ्जनपदाञ्जित्वा वित्तमाच्छिद्य केवलम्
मध्ये धनस्य तिष्ठामि तेनाहुर्मां धनंजयम्
Arjuna uvacha
Sarvanjanapadanjitva vittamachchhidya kevalam
Madhye dhanasya tishthami tenahurmam dhananjayam
39.12
अभिप्रयामि संग्रामे यदहं युद्धदुर्मदान्
नाजित्वा विनिवर्तामि तेन मां विजयं विदुः
Abhiprayami sangrame yadaham yuddhadurmadan
Najitva vinivartami tena mam vijayam viduh
39.13
श्वेताः काञ्चनसंनाहा रथे युज्यन्ति मे हयाः
संग्रामे युध्यमानस्य तेनाहं श्वेतवाहनः
Shvetah kanchanasannaha rathe yujyanti me hayah
Sangrame yudhyamanasya tenaham shvetavahanah
39.14
उत्तराभ्यां च पूर्वाभ्यां फल्गुनीभ्यामहं दिवा
जातो हिमवतः पृष्ठे तेन मां फल्गुनं विदुः
Uttarabhyam cha purvabhyam phalgunibhyamaham diva
Jato himavatah prishthe tena mam phalgunam viduh
39.15
पुरा शक्रेण मे दत्तं युध्यतो दानवर्षभैः
किरीटं मूर्ध्नि सूर्याभं तेन माहुः किरीटिनम्
Pura shakrena me dattam yudhyato danavarshabhaih
Kiritam murdhni suryabham tena mahuh kiritinam
39.16
न कुर्यां कर्म बीभत्सं युध्यमानः कथंचन
तेन देवमनुष्येषु बीभत्सुरिति मां विदुः
Na kuryam karma bibhatsam yudhyamanah kathanchana
Tena devamanushyeshu bibhatsuriti mam viduh
39.17
उभौ मे दक्षिणौ पाणी गाण्डीवस्य विकर्षणे
तेन देवमनुष्येषु सव्यसाचीति मां विदुः
Ubhau me dakshinau pani gandivasya vikarshane
Tena devamanushyeshu savyasachiti mam viduh
39.18
पृथिव्यां चतुरन्तायां वर्णो मे दुर्लभः समः
करोमि कर्म शुक्लं च तेन मामर्जुनं विदुः
Prithivyam chaturantayam varno me durlabhah samah
Karomi karma shuklam cha tena mamarjunam viduh
39.19
अहं दुरापो दुर्धर्षो दमनः पाकशासनिः
तेन देवमनुष्येषु जिष्णुनामास्मि विश्रुतः
Aham durapo durdharsho damanah pakashasanih
Tena devamanushyeshu jishnunamasmi vishrutah
39.20
कृष्ण इत्येव दशमं नाम चक्रे पिता मम
कृष्णावदातस्य सतः प्रियत्वाद्बालकस्य वै
Krishna ityeva dashamam nama chakre pita mama
Krishnavadatasya satah priyatvadbalakasya vai
39.21
वैशंपायन उवाच
ततः पार्थं स वैराटिरभ्यवादयदन्तिकात्
अहं भूमिंजयो नाम नाम्नाहमपि चोत्तरः
Vaishampayana uvacha
Tatah partham sa vairatirabhyavadayadantikat
Aham bhuminjayo nama namnahamapi chottarah
39.22
दिष्ट्या त्वां पार्थ पश्यामि स्वागतं ते धनंजय
लोहिताक्ष महाबाहो नागराजकरोपम
यदज्ञानादवोचं त्वां क्षन्तुमर्हसि तन्मम
Dishtya tvam partha pashyami svagatam te dhananjaya
Lohitaksha mahabaho nagarajakaropama
Yadagyanadavocham tvam kshantumarhasi tanmama
39.23
यतस्त्वया कृतं पूर्वं विचित्रं कर्म दुष्करम्
अतो भयं व्यतीतं मे प्रीतिश्च परमा त्वयि
Yatastvaya kritam purvam vichitram karma dushkaram
Ato bhayam vyatitam me pritishcha parama tvayi