UtshovChapter 40
40.1
उत्तर उवाच
आस्थाय विपुलं वीर रथं सारथिना मया
कतमं यास्यसेऽनीकमुक्तो यास्याम्यहं त्वया
Uttara uvacha
Asthaya vipulam vira ratham sarathina maya
Katamam yasyasenikamukto yasyamyaham tvaya
40.2
अर्जुन उवाच
प्रीतोऽस्मि पुरुषव्याघ्र न भयं विद्यते तव
सर्वान्नुदामि ते शत्रून्रणे रणविशारद
Arjuna uvacha
Pritosmi purushavyaghra na bhayam vidyate tava
Sarvannudami te shatrunrane ranavisharada
40.3
स्वस्थो भव महाबुद्धे पश्य मां शत्रुभिः सह
युध्यमानं विमर्देऽस्मिन्कुर्वाणं भैरवं महत्
Svastho bhava mahabuddhe pashya mam shatrubhih saha
Yudhyamanam vimardesminkurvanam bhairavam mahat
40.4
एतान्सर्वानुपासङ्गान्क्षिप्रं बध्नीहि मे रथे
एतं चाहर निस्त्रिंशं जातरूपपरिष्कृतम्
अहं वै कुरुभिर्योत्स्याम्यवजेष्यामि ते पशून्
Etansarvanupasangankshipram badhnihi me rathe
Etam chahara nistrinsham jatarupaparishkritam
Aham vai kurubhiryotsyamyavajeshyami te pashun
40.5
संकल्पपक्षविक्षेपं बाहुप्राकारतोरणम्
त्रिदण्डतूणसंबाधमनेकध्वजसंकुलम्
Sankalpapakshavikshepam bahuprakaratoranam
Tridandatunasambadhamanekadhvajasankulam
40.6
ज्याक्षेपणं क्रोधकृतं नेमीनिनददुन्दुभि
नगरं ते मया गुप्तं रथोपस्थं भविष्यति
Jyakshepanam krodhakritam nemininadadundubhi
Nagaram te maya guptam rathopastham bhavishyati
40.7
अधिष्ठितो मया संख्ये रथो गाण्डीवधन्वना
अजेयः शत्रुसैन्यानां वैराटे व्येतु ते भयम्
Adhishthito maya sankhye ratho gandivadhanvana
Ajeyah shatrusainyanam vairate vyetu te bhayam
40.8
उत्तर उवाच
बिभेमि नाहमेतेषां जानामि त्वां स्थिरं युधि
केशवेनापि संग्रामे साक्षादिन्द्रेण वा समम्
Uttara uvacha
Bibhemi nahametesham janami tvam sthiram yudhi
Keshavenapi sangrame sakshadindrena va samam
40.9
इदं तु चिन्तयन्नेव परिमुह्यामि केवलम्
निश्चयं चापि दुर्मेधा न गच्छामि कथंचन
Idam tu chintayanneva parimuhyami kevalam
Nishchayam chapi durmedha na gachchhami kathanchana
40.10
एवं वीराङ्गरूपस्य लक्षणैरुचितस्य च
केन कर्मविपाकेन क्लीबत्वमिदमागतम्
Evam virangarupasya lakshanairuchitasya cha
Kena karmavipakena klibatvamidamagatam
40.11
मन्ये त्वां क्लीबवेषेण चरन्तं शूलपाणिनम्
गन्धर्वराजप्रतिमं देवं वापि शतक्रतुम्
Manye tvam klibaveshena charantam shulapaninam
Gandharvarajapratimam devam vapi shatakratum
40.12
अर्जुन उवाच
भ्रातुर्नियोगाज्ज्येष्ठस्य संवत्सरमिदं व्रतम्
चरामि ब्रह्मचर्यं वै सत्यमेतद्ब्रवीमि ते
Arjuna uvacha
Bhraturniyogajjyeshthasya sanvatsaramidam vratam
Charami brahmacharyam vai satyametadbravimi te
40.13
नास्मि क्लीबो महाबाहो परवान्धर्मसंयुतः
समाप्तव्रतमुत्तीर्णं विद्धि मां त्वं नृपात्मज
Nasmi klibo mahabaho paravandharmasanyutah
Samaptavratamuttirnam viddhi mam tvam nripatmaja
40.14
उत्तर उवाच
परमोऽनुग्रहो मेऽद्य यत्प्रतर्को न मे वृथा
न हीदृशाः क्लीबरूपा भवन्तीह नरोत्तमाः
Uttara uvacha
Paramonugraho medya yatpratarko na me vritha
Na hidrishah klibarupa bhavantiha narottamah
40.15
सहायवानस्मि रणे युध्येयममरैरपि
साध्वसं तत्प्रनष्टं मे किं करोमि ब्रवीहि मे
Sahayavanasmi rane yudhyeyamamarairapi
Sadhvasam tatpranashtam me kim karomi bravihi me
40.16
अहं ते संग्रहीष्यामि हयाञ्शत्रुरथारुजः
शिक्षितो ह्यस्मि सारथ्ये तीर्थतः पुरुषर्षभ
Aham te sangrahishyami hayanshatruratharujah
Shikshito hyasmi sarathye tirthatah purusharshabha
40.17
दारुको वासुदेवस्य यथा शक्रस्य मातलिः
तथा मां विद्धि सारथ्ये शिक्षितं नरपुंगव
Daruko vasudevasya yatha shakrasya matalih
Tatha mam viddhi sarathye shikshitam narapungava
40.18
यस्य याते न पश्यन्ति भूमौ प्राप्तं पदं पदम्
दक्षिणं यो धुरं युक्तः सुग्रीवसदृशो हयः
Yasya yate na pashyanti bhumau praptam padam padam
Dakshinam yo dhuram yuktah sugrivasadrisho hayah
40.19
योऽयं धुरं धुर्यवरो वामं वहति शोभनः
तं मन्ये मेघपुष्पस्य जवेन सदृशं हयम्
Yoyam dhuram dhuryavaro vamam vahati shobhanah
Tam manye meghapushpasya javena sadrisham hayam
40.20
योऽयं काञ्चनसंनाहः पार्ष्णिं वहति शोभनः
वामं सैन्यस्य मन्ये तं जवेन बलवत्तरम्
Yoyam kanchanasannahah parshnim vahati shobhanah
Vamam sainyasya manye tam javena balavattaram
40.21
योऽयं वहति ते पार्ष्णिं दक्षिणामञ्चितोद्यतः
बलाहकादपि मतः स जवे वीर्यवत्तरः
Yoyam vahati te parshnim dakshinamanchitodyatah
Balahakadapi matah sa jave viryavattarah
40.22
त्वामेवायं रथो वोढुं संग्रामेऽर्हति धन्विनम्
त्वं चेमं रथमास्थाय योद्धुमर्हो मतो मम
Tvamevayam ratho vodhum sangramerhati dhanvinam
Tvam chemam rathamasthaya yoddhumarho mato mama
40.23
वैशंपायन उवाच
ततो निर्मुच्य बाहुभ्यां वलयानि स वीर्यवान्
चित्रे दुन्दुभिसंनादे प्रत्यमुञ्चत्तले शुभे
Vaishampayana uvacha
Tato nirmuchya bahubhyam valayani sa viryavan
Chitre dundubhisannade pratyamunchattale shubhe
40.24
कृष्णान्भङ्गीमतः केशाञ्श्वेतेनोद्ग्रथ्य वाससा
अधिज्यं तरसा कृत्वा गाण्डीवं व्याक्षिपद्धनुः
Krishnanbhangimatah keshanshvetenodgrathya vasasa
Adhijyam tarasa kritva gandivam vyakshipaddhanuh
40.25
तस्य विक्षिप्यमाणस्य धनुषोऽभून्महास्वनः
यथा शैलस्य महतः शैलेनैवाभिजघ्नुषः
Tasya vikshipyamanasya dhanushobhunmahasvanah
Yatha shailasya mahatah shailenaivabhijaghnushah
40.26
सनिर्घाताभवद्भूमिर्दिक्षु वायुर्ववौ भृशम्
भ्रान्तद्विजं खं तदासीत्प्रकम्पितमहाद्रुमम्
Sanirghatabhavadbhumirdikshu vayurvavau bhrisham
Bhrantadvijam kham tadasitprakampitamahadrumam
40.27
तं शब्दं कुरवोऽजानन्विस्फोटमशनेरिव
यदर्जुनो धनुःश्रेष्ठं बाहुभ्यामाक्षिपद्रथे
Tam shabdam kuravojananvisphotamashaneriva
Yadarjuno dhanuhshreshtham bahubhyamakshipadrathe