Utshovঅধ্যায় 40
40.1
উত্তর উবাচ
আস্থায় বিপুলং বীর রথং সারথিনা ময়া
কতমং যাস্যসেঽনীকমুক্তো যাস্যাম্যহং ত্বয়া
40.2
অর্জুন উবাচ
প্রীতোঽস্মি পুরুষব্যাঘ্র ন ভয়ং বিদ্যতে তব
সর্বান্নুদামি তে শত্রূন্রণে রণবিশারদ
40.3
স্বস্থো ভব মহাবুদ্ধে পশ্য মাং শত্রুভিঃ সহ
যুধ্যমানং বিমর্দেঽস্মিন্কুর্বাণং ভৈরবং মহৎ
40.4
এতান্সর্বানুপাসঙ্গান্ক্ষিপ্রং বধ্নীহি মে রথে
এতং চাহর নিস্ত্রিংশং জাতরূপপরিষ্কৃতম্
অহং বৈ কুরুভির্যোত্স্যাম্যবজেষ্যামি তে পশূন্
40.5
সংকল্পপক্ষবিক্ষেপং বাহুপ্রাকারতোরণম্
ত্রিদণ্ডতূণসংবাধমনেকধ্বজসংকুলম্
40.6
জ্যাক্ষেপণং ক্রোধকৃতং নেমীনিনদদুন্দুভি
নগরং তে ময়া গুপ্তং রথোপস্থং ভবিষ্যতি
40.7
অধিষ্ঠিতো ময়া সংখ্যে রথো গাণ্ডীবধন্বনা
অজেয়ঃ শত্রুসৈন্যানাং বৈরাটে ব্যেতু তে ভয়ম্
40.8
উত্তর উবাচ
বিভেমি নাহমেতেষাং জানামি ত্বাং স্থিরং যুধি
কেশবেনাপি সংগ্রামে সাক্ষাদিন্দ্রেণ বা সমম্
40.9
ইদং তু চিন্তয়ন্নেব পরিমুহ্যামি কেবলম্
নিশ্চয়ং চাপি দুর্মেধা ন গচ্ছামি কথংচন
40.10
এবং বীরাঙ্গরূপস্য লক্ষণৈরুচিতস্য চ
কেন কর্মবিপাকেন ক্লীবত্বমিদমাগতম্
40.11
মন্যে ত্বাং ক্লীববেষেণ চরন্তং শূলপাণিনম্
গন্ধর্বরাজপ্রতিমং দেবং বাপি শতক্রতুম্
40.12
অর্জুন উবাচ
ভ্রাতুর্নিয়োগাজ্জ্যেষ্ঠস্য সংবত্সরমিদং ব্রতম্
চরামি ব্রহ্মচর্যং বৈ সত্যমেতদ্ব্রবীমি তে
40.13
নাস্মি ক্লীবো মহাবাহো পরবান্ধর্মসংয়ুতঃ
সমাপ্তব্রতমুত্তীর্ণং বিদ্ধি মাং ত্বং নৃপাত্মজ
40.14
উত্তর উবাচ
পরমোঽনুগ্রহো মেঽদ্য যত্প্রতর্কো ন মে বৃথা
ন হীদৃশাঃ ক্লীবরূপা ভবন্তীহ নরোত্তমাঃ
40.15
সহায়বানস্মি রণে যুধ্যেয়মমরৈরপি
সাধ্বসং তত্প্রনষ্টং মে কিং করোমি ব্রবীহি মে
40.16
অহং তে সংগ্রহীষ্যামি হয়াঞ্শত্রুরথারুজঃ
শিক্ষিতো হ্যস্মি সারথ্যে তীর্থতঃ পুরুষর্ষভ
40.17
দারুকো বাসুদেবস্য যথা শক্রস্য মাতলিঃ
তথা মাং বিদ্ধি সারথ্যে শিক্ষিতং নরপুংগব
40.18
যস্য যাতে ন পশ্যন্তি ভূমৌ প্রাপ্তং পদং পদম্
দক্ষিণং যো ধুরং যুক্তঃ সুগ্রীবসদৃশো হয়ঃ
40.19
যোঽয়ং ধুরং ধুর্যবরো বামং বহতি শোভনঃ
তং মন্যে মেঘপুষ্পস্য জবেন সদৃশং হয়ম্
40.20
যোঽয়ং কাঞ্চনসংনাহঃ পার্ষ্ণিং বহতি শোভনঃ
বামং সৈন্যস্য মন্যে তং জবেন বলবত্তরম্
40.21
যোঽয়ং বহতি তে পার্ষ্ণিং দক্ষিণামঞ্চিতোদ্যতঃ
বলাহকাদপি মতঃ স জবে বীর্যবত্তরঃ
40.22
ত্বামেবায়ং রথো বোঢুং সংগ্রামেঽর্হতি ধন্বিনম্
ত্বং চেমং রথমাস্থায় যোদ্ধুমর্হো মতো মম
40.23
বৈশংপায়ন উবাচ
ততো নির্মুচ্য বাহুভ্যাং বলয়ানি স বীর্যবান্
চিত্রে দুন্দুভিসংনাদে প্রত্যমুঞ্চত্তলে শুভে
40.24
কৃষ্ণান্ভঙ্গীমতঃ কেশাঞ্শ্বেতেনোদ্গ্রথ্য বাসসা
অধিজ্যং তরসা কৃত্বা গাণ্ডীবং ব্যাক্ষিপদ্ধনুঃ
40.25
তস্য বিক্ষিপ্যমাণস্য ধনুষোঽভূন্মহাস্বনঃ
যথা শৈলস্য মহতঃ শৈলেনৈবাভিজঘ্নুষঃ
40.26
সনির্ঘাতাভবদ্ভূমির্দিক্ষু বায়ুর্ববৌ ভৃশম্
ভ্রান্তদ্বিজং খং তদাসীত্প্রকম্পিতমহাদ্রুমম্
40.27
তং শব্দং কুরবোঽজানন্বিস্ফোটমশনেরিব
যদর্জুনো ধনুঃশ্রেষ্ঠং বাহুভ্যামাক্ষিপদ্রথে