অধ্যায় 41

41.1

বৈশংপায়ন উবাচ
উত্তরং সারথিং কৃত্বা শমীং কৃত্বা প্রদক্ষিণম্
আয়ুধং সর্বমাদায় ততঃ প্রায়াদ্ধনংজয়ঃ

ধ্বজং সিংহং রথাত্তস্মাদপনীয় মহারথঃ
প্রণিধায় শমীমূলে প্রায়াদুত্তরসারথিঃ

দৈবীং মায়াং রথে যুক্ত্বা বিহিতাং বিশ্বকর্মণা
কাঞ্চনং সিংহলাঙ্গূলং ধ্বজং বানরলক্ষণম্

মনসা চিন্তয়ামাস প্রসাদং পাবকস্য চ
স চ তচ্চিন্তিতং জ্ঞাত্বা ধ্বজে ভূতান্যচোদয়ৎ

সপতাকং বিচিত্রাঙ্গং সোপাসঙ্গং মহারথঃ
রথমাস্থায় বীভত্সুঃ কৌন্তেয়ঃ শ্বেতবাহনঃ

বদ্ধাসিঃ সতনুত্রাণঃ প্রগৃহীতশরাসনঃ
ততঃ প্রায়াদুদীচীং স কপিপ্রবরকেতনঃ

স্বনবন্তং মহাশঙ্খং বলবানরিমর্দনঃ
প্রাধমদ্বলমাস্থায় দ্বিষতাং লোমহর্ষণম্

ততস্তে জবনা ধুর্যা জানুভ্যামগমন্মহীম্
উত্তরশ্চাপি সংত্রস্তো রথোপস্থ উপাবিশৎ

সংস্থাপ্য চাশ্বান্কৌন্তেয়ঃ সমুদ্যম্য চ রশ্মিভিঃ
উত্তরং চ পরিষ্বজ্য সমাশ্বাসয়দর্জুনঃ

মা ভৈস্ত্বং রাজপুত্রাগ্র্য ক্ষত্রিয়োঽসি পরংতপ
কথং পুরুষশার্দূল শত্রুমধ্যে বিষীদসি

শ্রুতাস্তে শঙ্খশব্দাশ্চ ভেরীশব্দাশ্চ পুষ্কলাঃ
কুঞ্জরাণাং চ নদতাং ব্যূঢানীকেষু তিষ্ঠতাম্

স ত্বং কথমিহানেন শঙ্খশব্দেন ভীষিতঃ
বিষণ্ণরূপো বিত্রস্তঃ পুরুষঃ প্রাকৃতো যথা

উত্তর উবাচ
শ্রুতা মে শঙ্খশব্দাশ্চ ভেরীশব্দাশ্চ পুষ্কলাঃ
কুঞ্জরাণাং চ নিনদা ব্যূঢানীকেষু তিষ্ঠতাম্

নৈবংবিধঃ শঙ্খশব্দঃ পুরা জাতু ময়া শ্রুতঃ
ধ্বজস্য চাপি রূপং মে দৃষ্টপূর্বং ন হীদৃশম্
ধনুষশ্চৈব নির্ঘোষঃ শ্রুতপূর্বো ন মে ক্বচিৎ

অস্য শঙ্খস্য শব্দেন ধনুষো নিস্বনেন চ
রথস্য চ নিনাদেন মনো মুহ্যতি মে ভৃশম্

ব্যাকুলাশ্চ দিশঃ সর্বা হৃদয়ং ব্যথতীব মে
ধ্বজেন পিহিতাঃ সর্বা দিশো ন প্রতিভান্তি মে
গাণ্ডীবস্য চ শব্দেন কর্ণৌ মে বধিরীকৃতৌ

অর্জুন উবাচ
একান্তে রথমাস্থায় পদ্ভ্যাং ত্বমবপীডয়
দৃঢং চ রশ্মীন্সংয়চ্ছ শঙ্খং ধ্মাস্যাম্যহং পুনঃ

বৈশংপায়ন উবাচ
তস্য শঙ্খস্য শব্দেন রথনেমিস্বনেন চ
গাণ্ডীবস্য চ ঘোষেণ পৃথিবী সমকম্পত

দ্রোণ উবাচ
যথা রথস্য নির্ঘোষো যথা শঙ্খ উদীর্যতে
কম্পতে চ যথা ভূমির্নৈষোঽন্যঃ সব্যসাচিনঃ

শস্ত্রাণি ন প্রকাশন্তে ন প্রহৃষ্যন্তি বাজিনঃ
অগ্নয়শ্চ ন ভাসন্তে সমিদ্ধাস্তন্ন শোভনম্

প্রত্যাদিত্যং চ নঃ সর্বে মৃগা ঘোরপ্রবাদিনঃ
ধ্বজেষু চ নিলীয়ন্তে বায়সাস্তন্ন শোভনম্
শকুনাশ্চাপসব্যা নো বেদয়ন্তি মহদ্ভয়ম্

গোমায়ুরেষ সেনায়া রুবন্মধ্যেঽনুধাবতি
অনাহতশ্চ নিষ্ক্রান্তো মহদ্বেদয়তে ভয়ম্
ভবতাং রোমকূপাণি প্রহৃষ্টান্যুপলক্ষয়ে

পরাভূতা চ বঃ সেনা ন কশ্চিদ্যোদ্ধুমিচ্ছতি
বিবর্ণমুখভূয়িষ্ঠাঃ সর্বে যোধা বিচেতসঃ
গাঃ সংপ্রস্থাপ্য তিষ্ঠামো ব্যূঢানীকাঃ প্রহারিণঃ