Utshovঅধ্যায় 42
42.1
বৈশংপায়ন উবাচ
অথ দুর্যোধনো রাজা সমরে ভীষ্মমব্রবীৎ
দ্রোণং চ রথশার্দূলং কৃপং চ সুমহারথম্
42.2
উক্তোঽয়মর্থ আচার্যো ময়া কর্ণেন চাসকৃৎ
পুনরেব চ বক্ষ্যামি ন হি তৃপ্যামি তং ব্রুবন্
42.3
পরাজিতৈর্হি বস্তব্যং তৈশ্চ দ্বাদশ বত্সরান্
বনে জনপদেঽজ্ঞাতৈরেষ এব পণো হি নঃ
42.4
তেষাং ন তাবন্নির্বৃত্তং বর্ততে তু ত্রয়োদশম্
অজ্ঞাতবাসং বীভত্সুরথাস্মাভিঃ সমাগতঃ
42.5
অনিবৃত্তে তু নির্বাসে যদি বীভত্সুরাগতঃ
পুনর্দ্বাদশ বর্ষাণি বনে বত্স্যন্তি পাণ্ডবাঃ
42.6
লোভাদ্বা তে ন জানীয়ুরস্মান্বা মোহ আবিশৎ
হীনাতিরিক্তমেতেষাং ভীষ্মো বেদিতুমর্হতি
42.7
অর্থানাং তু পুনর্দ্বৈধে নিত্যং ভবতি সংশয়ঃ
অন্যথা চিন্তিতো হ্যর্থঃ পুনর্ভবতি চান্যথা
42.8
উত্তরং মার্গমাণানাং মত্স্যসেনাং যুয়ুত্সতাম্
যদি বীভত্সুরায়াতস্তেষাং কঃ স্যাত্পরাঙ্মুখঃ
42.9
ত্রিগর্তানাং বয়ং হেতোর্মত্স্যান্যোদ্ধুমিহাগতাঃ
মত্স্যানাং বিপ্রকারাংস্তে বহূনস্মানকীর্তয়ন্
42.10
তেষাং ভয়াভিপন্নানাং তদস্মাভিঃ প্রতিশ্রুতম্
প্রথমং তৈর্গ্রহীতব্যং মত্স্যানাং গোধনং মহৎ
42.11
সপ্তমীমপরাহ্ণে বৈ তথা নস্তৈঃ সমাহিতম্
অষ্টম্যাং পুনরস্মাভিরাদিত্যস্যোদয়ং প্রতি
42.12
তে বা গাবো ন পশ্যন্তি যদি ব স্যুঃ পরাজিতাঃ
অস্মান্বাপ্যতিসংধায় কুর্যুর্মত্স্যেন সংগতম্
42.13
অথ বা তানুপায়াতো মত্স্যো জানপদৈঃ সহ
সর্বয়া সেনয়া সার্ধমস্মান্যোদ্ধুমুপাগতঃ
42.14
তেষামেব মহাবীর্যঃ কশ্চিদেব পুরঃসরঃ
অস্মাঞ্জেতুমিহায়াতো মত্স্যো বাপি স্বয়ং ভবেৎ
42.15
যদ্যেষ রাজা মত্স্যানাং যদি বীভত্সুরাগতঃ
সর্বৈর্যোদ্ধব্যমস্মাভিরিতি নঃ সময়ঃ কৃতঃ
42.16
অথ কস্মাত্স্থিতা হ্যেতে রথেষু রথসত্তমাঃ
ভীষ্মো দ্রোণঃ কৃপশ্চৈব বিকর্ণো দ্রৌণিরেব চ
42.17
সংভ্রান্তমনসঃ সর্বে কালে হ্যস্মিন্মহারথাঃ
নান্যত্র যুদ্ধাচ্ছ্রেয়োঽস্তি তথাত্মা প্রণিধীয়তাম্
42.18
আচ্ছিন্নে গোধনেঽস্মাকমপি দেবেন বজ্রিণা
যমেন বাপি সংগ্রামে কো হাস্তিনপুরং ব্রজেৎ
42.19
শরৈরভিপ্রণুন্নানাং ভগ্নানাং গহনে বনে
কো হি জীবেত্পদাতীনাং ভবেদশ্বেষু সংশয়ঃ
আচার্যং পৃষ্ঠতঃ কৃত্বা তথা নীতির্বিধীয়তাম্
42.20
জানাতি হি মতং তেষামতস্ত্রাসয়তীব নঃ
অর্জুনেনাস্য সংপ্রীতিমধিকামুপলক্ষয়ে
42.21
তথা হি দৃষ্ট্বা বীভত্সুমুপায়ান্তং প্রশংসতি
যথা সেনা ন ভজ্যেত তথা নীতির্বিধীয়তাম্
42.22
অদেশিকা মহারণ্যে গ্রীষ্মে শত্রুবশং গতা
যথা ন বিভ্রমেত্সেনা তথা নীতির্বিধীয়তাম্
42.23
অশ্বানাং হেষিতং শ্রুত্বা কা প্রশংসা ভবেত্পরে
স্থানে বাপি ব্রজন্তো বা সদা হেষন্তি বাজিনঃ
42.24
সদা চ বায়বো বান্তি নিত্যং বর্ষতি বাসবঃ
স্তনয়িত্নোশ্চ নির্ঘোষঃ শ্রূয়তে বহুশস্তথা
42.25
কিমত্র কার্যং পার্থস্য কথং বা স প্রশস্যতে
অন্যত্র কামাদ্দ্বেষাদ্বা রোষাদ্বাস্মাসু কেবলাৎ
42.26
আচার্যা বৈ কারুণিকাঃ প্রাজ্ঞাশ্চাপায়দর্শিনঃ
নৈতে মহাভয়ে প্রাপ্তে সংপ্রষ্টব্যাঃ কথংচন
42.27
প্রাসাদেষু বিচিত্রেষু গোষ্ঠীষ্বাবসথেষু চ
কথা বিচিত্রাঃ কুর্বাণাঃ পণ্ডিতাস্তত্র শোভনাঃ
42.28
বহূন্যাশ্চর্যরূপাণি কুর্বন্তো জনসংসদি
ইষ্বস্ত্রে চারুসংধানে পণ্ডিতাস্তত্র শোভনাঃ
42.29
পরেষাং বিবরজ্ঞানে মনুষ্যাচরিতেষু চ
অন্নসংস্কারদোষেষু পণ্ডিতাস্তত্র শোভনাঃ
42.30
পণ্ডিতান্পৃষ্ঠতঃ কৃত্বা পরেষাং গুণবাদিনঃ
বিধীয়তাং তথা নীতির্যথা বধ্যেত বৈ পরঃ
42.31
গাবশ্চৈব প্রতিষ্ঠন্তাং সেনাং ব্যূহন্তু মাচিরম্
আরক্ষাশ্চ বিধীয়ন্তাং যত্র যোত্স্যামহে পরান্