অধ্যায় 43

43.1

কর্ণ উবাচ
সর্বানায়ুষ্মতো ভীতান্সংত্রস্তানিব লক্ষয়ে
অয়ুদ্ধমনসশ্চৈব সর্বাংশ্চৈবানবস্থিতান্

যদ্যেষ রাজা মত্স্যানাং যদি বীভত্সুরাগতঃ
অহমাবারয়িষ্যামি বেলেব মকরালয়ম্

মম চাপপ্রমুক্তানাং শরাণাং নতপর্বণাম্
নাবৃত্তির্গচ্ছতামস্তি সর্পাণামিব সর্পতাম্

রুক্মপুঙ্খাঃ সুতীক্ষ্ণাগ্রা মুক্তা হস্তবতা ময়া
ছাদয়ন্তু শরাঃ পার্থং শলভা ইব পাদপম্

শরাণাং পুঙ্খসক্তানাং মৌর্ব্যাভিহতয়া দৃঢম্
শ্রূয়তাং তলয়োঃ শব্দো ভের্যোরাহতয়োরিব

সমাহিতো হি বীভত্সুর্বর্ষাণ্যষ্টৌ চ পঞ্চ চ
জাতস্নেহশ্চ যুদ্ধস্য ময়ি সংপ্রহরিষ্যতি

পাত্রীভূতশ্চ কৌন্তেয়ো ব্রাহ্মণো গুণবানিব
শরৌঘান্প্রতিগৃহ্ণাতু ময়া মুক্তান্সহস্রশঃ

এষ চৈব মহেষ্বাসস্ত্রিষু লোকেষু বিশ্রুতঃ
অহং চাপি কুরুশ্রেষ্ঠা অর্জুনান্নাবরঃ ক্বচিৎ

ইতশ্চেতশ্চ নির্মুক্তৈঃ কাঞ্চনৈর্গার্ধ্রবাজিতৈঃ
দৃশ্যতামদ্য বৈ ব্যোম খদ্যোতৈরিব সংবৃতম্

অদ্যাহমৃণমক্ষয্যং পুরা বাচা প্রতিশ্রুতম্
ধার্তরাষ্ট্রস্য দাস্যামি নিহত্য সমরেঽর্জুনম্

অন্তরা ছিদ্যমানানাং পুঙ্খানাং ব্যতিশীর্যতাম্
শলভানামিবাকাশে প্রচারঃ সংপ্রদৃশ্যতাম্

ইন্দ্রাশনিসমস্পর্শং মহেন্দ্রসমতেজসম্
অর্দয়িষ্যাম্যহং পার্থমুল্কাভিরিব কুঞ্জরম্

তমগ্নিমিব দুর্ধর্ষমসিশক্তিশরেন্ধনম্
পাণ্ডবাগ্নিমহং দীপ্তং প্রদহন্তমিবাহিতান্

অশ্ববেগপুরোবাতো রথৌঘস্তনয়িত্নুমান্
শরধারো মহামেঘঃ শময়িষ্যামি পাণ্ডবম্

মত্কার্মুকবিনির্মুক্তাঃ পার্থমাশীবিষোপমাঃ
শরাঃ সমভিসর্পন্তু বল্মীকমিব পন্নগাঃ

জামদগ্ন্যান্ময়া হ্যস্ত্রং যত্প্রাপ্তমৃষিসত্তমাৎ
তদুপাশ্রিত্য বীর্যং চ যুধ্যেয়মপি বাসবম্

ধ্বজাগ্রে বানরস্তিষ্ঠন্ভল্লেন নিহতো ময়া
অদ্যৈব পততাং ভূমৌ বিনদন্ভৈরবান্রবান্

শত্রোর্ময়াভিপন্নানাং ভূতানাং ধ্বজবাসিনাম্
দিশঃ প্রতিষ্ঠমানানামস্তু শব্দো দিবং গতঃ

অদ্য দুর্যোধনস্যাহং শল্যং হৃদি চিরস্থিতম্
সমূলমুদ্ধরিষ্যামি বীভত্সুং পাতয়ন্রথাৎ

হতাশ্বং বিরথং পার্থং পৌরুষে পর্যবস্থিতম্
নিঃশ্বসন্তং যথা নাগমদ্য পশ্যন্তু কৌরবাঃ

কামং গচ্ছন্তু কুরবো ধনমাদায় কেবলম্
রথেষু বাপি তিষ্ঠন্তো যুদ্ধং পশ্যন্তু মামকম্