UtshovChapter 43
43.1
कर्ण उवाच
सर्वानायुष्मतो भीतान्संत्रस्तानिव लक्षये
अयुद्धमनसश्चैव सर्वांश्चैवानवस्थितान्
Karna uvacha
Sarvanayushmato bhitansantrastaniva lakshaye
Ayuddhamanasashchaiva sarvanshchaivanavasthitan
43.2
यद्येष राजा मत्स्यानां यदि बीभत्सुरागतः
अहमावारयिष्यामि वेलेव मकरालयम्
Yadyesha raja matsyanam yadi bibhatsuragatah
Ahamavarayishyami veleva makaralayam
43.3
मम चापप्रमुक्तानां शराणां नतपर्वणाम्
नावृत्तिर्गच्छतामस्ति सर्पाणामिव सर्पताम्
Mama chapapramuktanam sharanam nataparvanam
Navrittirgachchhatamasti sarpanamiva sarpatam
43.4
रुक्मपुङ्खाः सुतीक्ष्णाग्रा मुक्ता हस्तवता मया
छादयन्तु शराः पार्थं शलभा इव पादपम्
Rukmapunkhah sutikshnagra mukta hastavata maya
Chhadayantu sharah partham shalabha iva padapam
43.5
शराणां पुङ्खसक्तानां मौर्व्याभिहतया दृढम्
श्रूयतां तलयोः शब्दो भेर्योराहतयोरिव
Sharanam punkhasaktanam maurvyabhihataya dridham
Shruyatam talayoh shabdo bheryorahatayoriva
43.6
समाहितो हि बीभत्सुर्वर्षाण्यष्टौ च पञ्च च
जातस्नेहश्च युद्धस्य मयि संप्रहरिष्यति
Samahito hi bibhatsurvarshanyashtau cha pancha cha
Jatasnehashcha yuddhasya mayi sampraharishyati
43.7
पात्रीभूतश्च कौन्तेयो ब्राह्मणो गुणवानिव
शरौघान्प्रतिगृह्णातु मया मुक्तान्सहस्रशः
Patribhutashcha kaunteyo brahmano gunavaniva
Sharaughanpratigrihnatu maya muktansahasrashah
43.8
एष चैव महेष्वासस्त्रिषु लोकेषु विश्रुतः
अहं चापि कुरुश्रेष्ठा अर्जुनान्नावरः क्वचित्
Esha chaiva maheshvasastrishu lokeshu vishrutah
Aham chapi kurushreshtha arjunannavarah kvachit
43.9
इतश्चेतश्च निर्मुक्तैः काञ्चनैर्गार्ध्रवाजितैः
दृश्यतामद्य वै व्योम खद्योतैरिव संवृतम्
Itashchetashcha nirmuktaih kanchanairgardhravajitaih
Drishyatamadya vai vyoma khadyotairiva sanvritam
43.10
अद्याहमृणमक्षय्यं पुरा वाचा प्रतिश्रुतम्
धार्तराष्ट्रस्य दास्यामि निहत्य समरेऽर्जुनम्
Adyahamrinamakshayyam pura vacha pratishrutam
Dhartarashtrasya dasyami nihatya samarerjunam
43.11
अन्तरा छिद्यमानानां पुङ्खानां व्यतिशीर्यताम्
शलभानामिवाकाशे प्रचारः संप्रदृश्यताम्
Antara chhidyamananam punkhanam vyatishiryatam
Shalabhanamivakashe pracharah sampradrishyatam
43.12
इन्द्राशनिसमस्पर्शं महेन्द्रसमतेजसम्
अर्दयिष्याम्यहं पार्थमुल्काभिरिव कुञ्जरम्
Indrashanisamasparsham mahendrasamatejasam
Ardayishyamyaham parthamulkabhiriva kunjaram
43.13
तमग्निमिव दुर्धर्षमसिशक्तिशरेन्धनम्
पाण्डवाग्निमहं दीप्तं प्रदहन्तमिवाहितान्
Tamagnimiva durdharshamasishaktisharendhanam
Pandavagnimaham diptam pradahantamivahitan
43.14
अश्ववेगपुरोवातो रथौघस्तनयित्नुमान्
शरधारो महामेघः शमयिष्यामि पाण्डवम्
Ashvavegapurovato rathaughastanayitnuman
Sharadharo mahameghah shamayishyami pandavam
43.15
मत्कार्मुकविनिर्मुक्ताः पार्थमाशीविषोपमाः
शराः समभिसर्पन्तु वल्मीकमिव पन्नगाः
Matkarmukavinirmuktah parthamashivishopamah
Sharah samabhisarpantu valmikamiva pannagah
43.16
जामदग्न्यान्मया ह्यस्त्रं यत्प्राप्तमृषिसत्तमात्
तदुपाश्रित्य वीर्यं च युध्येयमपि वासवम्
Jamadagnyanmaya hyastram yatpraptamrishisattamat
Tadupashritya viryam cha yudhyeyamapi vasavam
43.17
ध्वजाग्रे वानरस्तिष्ठन्भल्लेन निहतो मया
अद्यैव पततां भूमौ विनदन्भैरवान्रवान्
Dhvajagre vanarastishthanbhallena nihato maya
Adyaiva patatam bhumau vinadanbhairavanravan
43.18
शत्रोर्मयाभिपन्नानां भूतानां ध्वजवासिनाम्
दिशः प्रतिष्ठमानानामस्तु शब्दो दिवं गतः
Shatrormayabhipannanam bhutanam dhvajavasinam
Dishah pratishthamananamastu shabdo divam gatah
43.19
अद्य दुर्योधनस्याहं शल्यं हृदि चिरस्थितम्
समूलमुद्धरिष्यामि बीभत्सुं पातयन्रथात्
Adya duryodhanasyaham shalyam hridi chirasthitam
Samulamuddharishyami bibhatsum patayanrathat
43.20
हताश्वं विरथं पार्थं पौरुषे पर्यवस्थितम्
निःश्वसन्तं यथा नागमद्य पश्यन्तु कौरवाः
Hatashvam viratham partham paurushe paryavasthitam
Nihshvasantam yatha nagamadya pashyantu kauravah
43.21
कामं गच्छन्तु कुरवो धनमादाय केवलम्
रथेषु वापि तिष्ठन्तो युद्धं पश्यन्तु मामकम्
Kamam gachchhantu kuravo dhanamadaya kevalam
Ratheshu vapi tishthanto yuddham pashyantu mamakam