অধ্যায় 44

44.1

কৃপ উবাচ
সদৈব তব রাধেয় যুদ্ধে ক্রূরতরা মতিঃ
নার্থানাং প্রকৃতিং বেত্থ নানুবন্ধমবেক্ষসে

নয়া হি বহবঃ সন্তি শাস্ত্রাণ্যাশ্রিত্য চিন্তিতাঃ
তেষাং যুদ্ধং তু পাপিষ্ঠং বেদয়ন্তি পুরাবিদঃ

দেশকালেন সংয়ুক্তং যুদ্ধং বিজয়দং ভবেৎ
হীনকালং তদেবেহ ফলবন্ন ভবত্যুত
দেশে কালে চ বিক্রান্তং কল্যাণায় বিধীয়তে

আনুকূল্যেন কার্যাণামন্তরং সংবিধীয়তাম্
ভারং হি রথকারস্য ন ব্যবস্যন্তি পণ্ডিতাঃ

পরিচিন্ত্য তু পার্থেন সংনিপাতো ন নঃ ক্ষমঃ
একঃ কুরূনভ্যরক্ষদেকশ্চাগ্নিমতর্পয়ৎ

একশ্চ পঞ্চ বর্ষাণি ব্রহ্মচর্যমধারয়ৎ
একঃ সুভদ্রামারোপ্য দ্বৈরথে কৃষ্ণমাহ্বয়ৎ
অস্মিন্নেব বনে কৃষ্ণো হৃতাং কৃষ্ণামবাজয়ৎ

একশ্চ পঞ্চ বর্ষাণি শক্রাদস্ত্রাণ্যশিক্ষত
একঃ সাংয়মিনীং জিত্বা কুরূণামকরোদ্যশঃ

একো গন্ধর্বরাজানং চিত্রসেনমরিংদমঃ
বিজিগ্যে তরসা সংখ্যে সেনাং চাস্য সুদুর্জয়াম্

তথা নিবাতকবচাঃ কালখঞ্জাশ্চ দানবাঃ
দৈবতৈরপ্যবধ্যাস্তে একেন যুধি পাতিতাঃ

একেন হি ত্বয়া কর্ণ কিং নামেহ কৃতং পুরা
একৈকেন যথা তেষাং ভূমিপালা বশীকৃতাঃ

ইন্দ্রোঽপি হি ন পার্থেন সংয়ুগে যোদ্ধুমর্হতি
যস্তেনাশংসতে যোদ্ধুং কর্তব্যং তস্য ভেষজম্

আশীবিষস্য ক্রুদ্ধস্য পাণিমুদ্যম্য দক্ষিণম্
অবিমৃশ্য প্রদেশিন্যা দংষ্ট্রামাদাতুমিচ্ছসি

অথ বা কুঞ্জরং মত্তমেক এব চরন্বনে
অনঙ্কুশং সমারুহ্য নগরং গন্তুমিচ্ছসি

সমিদ্ধং পাবকং বাপি ঘৃতমেদোবসাহুতম্
ঘৃতাক্তশ্চীরবাসাস্ত্বং মধ্যেনোত্তর্তুমিচ্ছসি

আত্মানং যঃ সমুদ্বধ্য কণ্ঠে বদ্ধ্বা মহাশিলাম্
সমুদ্রং প্রতরেদ্দোর্ভ্যাং তত্র কিং নাম পৌরুষম্

অকৃতাস্ত্রঃ কৃতাস্ত্রং বৈ বলবন্তং সুদুর্বলঃ
তাদৃশং কর্ণ যঃ পার্থং যোদ্ধুমিচ্ছেত্স দুর্মতিঃ

অস্মাভিরেষ নিকৃতো বর্ষাণীহ ত্রয়োদশ
সিংহঃ পাশবিনির্মুক্তো ন নঃ শেষং করিষ্যতি

একান্তে পার্থমাসীনং কূপেঽগ্নিমিব সংবৃতম্
অজ্ঞানাদভ্যবস্কন্দ্য প্রাপ্তাঃ স্মো ভয়মুত্তমম্

সহ যুধ্যামহে পার্থমাগতং যুদ্ধদুর্মদম্
সৈন্যাস্তিষ্ঠন্তু সংনদ্ধা ব্যূঢানীকাঃ প্রহারিণঃ

দ্রোণো দুর্যোধনো ভীষ্মো ভবান্দ্রৌণিস্তথা বয়ম্
সর্বে যুধ্যামহে পার্থং কর্ণ মা সাহসং কৃথাঃ

বয়ং ব্যবসিতং পার্থং বজ্রপাণিমিবোদ্যতম্
ষড্রথাঃ প্রতিয়ুধ্যেম তিষ্ঠেম যদি সংহতাঃ

ব্যূঢানীকানি সৈন্যানি যত্তাঃ পরমধন্বিনঃ
যুধ্যামহেঽর্জুনং সংখ্যে দানবা বাসবং যথা