অধ্যায় 45

45.1

অশ্বত্থামোবাচ
ন চ তাবজ্জিতা গাবো ন চ সীমান্তরং গতাঃ
ন হাস্তিনপুরং প্রাপ্তাস্ত্বং চ কর্ণ বিকত্থসে

45.2

সংগ্রামান্সুবহূঞ্জিত্বা লব্ধ্বা চ বিপুলং ধনম্
বিজিত্য চ পরাং ভূমিং নাহুঃ কিংচন পৌরুষম্

45.3

পচত্যগ্নিরবাক্যস্তু তূষ্ণীং ভাতি দিবাকরঃ
তূষ্ণীং ধারয়তে লোকান্বসুধা সচরাচরান্

45.4

চাতুর্বর্ণ্যস্য কর্মাণি বিহিতানি মনীষিভিঃ
ধনং যৈরধিগন্তব্যং যচ্চ কুর্বন্ন দুষ্যতি

45.5

অধীত্য ব্রাহ্মণো বেদান্যাজয়েত যজেত চ
ক্ষত্রিয়ো ধনুরাশ্রিত্য যজেতৈব ন যাজয়েৎ
বৈশ্যোঽধিগম্য দ্রব্যাণি ব্রহ্মকর্মাণি কারয়েৎ

45.6

বর্তমানা যথাশাস্ত্রং প্রাপ্য চাপি মহীমিমাম্
সত্কুর্বন্তি মহাভাগা গুরূন্সুবিগুণানপি

45.7

প্রাপ্য দ্যূতেন কো রাজ্যং ক্ষত্রিয়স্তোষ্টুমর্হতি
তথা নৃশংসরূপেণ যথান্যঃ প্রাকৃতো জনঃ

45.8

তথাবাপ্তেষু বিত্তেষু কো বিকত্থেদ্বিচক্ষণঃ
নিকৃত্যা বঞ্চনায়োগৈশ্চরন্বৈতংসিকো যথা

45.9

কতমদ্দ্বৈরথং যুদ্ধং যত্রাজৈষীর্ধনংজয়ম্
নকুলং সহদেবং চ ধনং যেষাং ত্বয়া হৃতম্

45.10

যুধিষ্ঠিরো জিতঃ কস্মিন্ভীমশ্চ বলিনাং বরঃ
ইন্দ্রপ্রস্থং ত্বয়া কস্মিন্সংগ্রামে নির্জিতং পুরা

45.11

তথৈব কতমং যুদ্ধং যস্মিন্কৃষ্ণা জিতা ত্বয়া
একবস্ত্রা সভাং নীতা দুষ্টকর্মন্রজস্বলা

45.12

মূলমেষাং মহত্কৃত্তং সারার্থী চন্দনং যথা
কর্ম কারয়িথাঃ শূর তত্র কিং বিদুরোঽব্রবীৎ

45.13

যথাশক্তি মনুষ্যাণাং শমমালক্ষয়ামহে
অন্যেষাং চৈব সত্ত্বানামপি কীটপিপীলিকে

45.14

দ্রৌপদ্যাস্তং পরিক্লেশং ন ক্ষন্তুং পাণ্ডবোঽর্হতি
দুঃখায় ধার্তরাষ্ট্রাণাং প্রাদুর্ভূতো ধনংজয়ঃ

45.15

ত্বং পুনঃ পণ্ডিতো ভূত্বা বাচং বক্তুমিহেচ্ছসি
বৈরান্তকরণো জিষ্ণুর্ন নঃ শেষং করিষ্যতি

45.16

নৈষ দেবান্ন গন্ধর্বান্নাসুরান্ন চ রাক্ষসান্
ভয়াদিহ ন যুধ্যেত কুন্তীপুত্রো ধনংজয়ঃ

45.17

যং যমেষোঽভিসংক্রুদ্ধঃ সংগ্রামেঽভিপতিষ্যতি
বৃক্ষং গরুডবেগেন বিনিহত্য তমেষ্যতি

45.18

ত্বত্তো বিশিষ্টং বীর্যেণ ধনুষ্যমররাট্সমম্
বাসুদেবসমং যুদ্ধে তং পার্থং কো ন পূজয়েৎ

45.19

দৈবং দৈবেন যুধ্যেত মানুষেণ চ মানুষম্
অস্ত্রেণাস্ত্রং সমাহন্যাত্কোঽর্জুনেন সমঃ পুমান্

45.20

পুত্রাদনন্তরঃ শিষ্য ইতি ধর্মবিদো বিদুঃ
এতেনাপি নিমিত্তেন প্রিয়ো দ্রোণস্য পাণ্ডবঃ

45.21

যথা ত্বমকরোর্দ্যূতমিন্দ্রপ্রস্থং যথাহরঃ
যথানৈষীঃ সভাং কৃষ্ণাং তথা যুধ্যস্ব পাণ্ডবম্

45.22

অয়ং তে মাতুলঃ প্রাজ্ঞঃ ক্ষত্রধর্মস্য কোবিদঃ
দুর্দ্যূতদেবী গান্ধারঃ শকুনির্যুধ্যতামিহ

45.23

নাক্ষান্ক্ষিপতি গাণ্ডীবং ন কৃতং দ্বাপরং ন চ
জ্বলতো নিশিতান্বাণাংস্তীক্ষ্ণান্ক্ষিপতি গাণ্ডিবম্

45.24

ন হি গাণ্ডীবনির্মুক্তা গার্ধ্রপত্রাঃ সুতেজনাঃ
অন্তরেষ্ববতিষ্ঠন্তি গিরীণামপি দারণাঃ

45.25

অন্তকঃ শমনো মৃত্যুস্তথাগ্নির্বডবামুখঃ
কুর্যুরেতে ক্বচিচ্ছেষং ন তু ক্রুদ্ধো ধনংজয়ঃ

45.26

যুধ্যতাং কামমাচার্যো নাহং যোত্স্যে ধনংজয়ম্
মত্স্যো হ্যস্মাভিরায়োধ্যো যদ্যাগচ্ছেদ্গবাং পদম্

Contains text from DharmicData, made available under the Open Database License (ODbL). Simple meanings are written by AI and can contain mistakes.