অধ্যায় 46

46.1

ভীষ্ম উবাচ
সাধু পশ্যতি বৈ দ্রোণঃ কৃপঃ সাধ্বনুপশ্যতি
কর্ণস্তু ক্ষত্রধর্মেণ যথাবদ্যোদ্ধুমিচ্ছতি

আচার্যো নাভিষক্তব্যঃ পুরুষেণ বিজানতা
দেশকালৌ তু সংপ্রেক্ষ্য যোদ্ধব্যমিতি মে মতিঃ

যস্য সূর্যসমাঃ পঞ্চ সপত্নাঃ স্যুঃ প্রহারিণঃ
কথমভ্যুদয়ে তেষাং ন প্রমুহ্যেত পণ্ডিতঃ

স্বার্থে সর্বে বিমুহ্যন্তি যেঽপি ধর্মবিদো জনাঃ
তস্মাদ্রাজন্ব্রবীম্যেষ বাক্যং তে যদি রোচতে

কর্ণো যদভ্যবোচন্নস্তেজঃসংজননায় তৎ
আচার্যপুত্রঃ ক্ষমতাং মহত্কার্যমুপস্থিতম্

নায়ং কালো বিরোধস্য কৌন্তেয়ে সমুপস্থিতে
ক্ষন্তব্যং ভবতা সর্বমাচার্যেণ কৃপেণ চ

ভবতাং হি কৃতাস্ত্রত্বং যথাদিত্যে প্রভা তথা
যথা চন্দ্রমসো লক্ষ্ম সর্বথা নাপকৃষ্যতে
এবং ভবত্সু ব্রাহ্মণ্যং ব্রহ্মাস্ত্রং চ প্রতিষ্ঠিতম্

চত্বার একতো বেদাঃ ক্ষাত্রমেকত্র দৃশ্যতে
নৈতত্সমস্তমুভয়ং কস্মিংশ্চিদনুশুশ্রুমঃ

অন্যত্র ভারতাচার্যাত্সপুত্রাদিতি মে মতিঃ
ব্রহ্মাস্ত্রং চৈব বেদাশ্চ নৈতদন্যত্র দৃশ্যতে

আচার্যপুত্রঃ ক্ষমতাং নায়ং কালঃ স্বভেদনে
সর্বে সংহত্য যুধ্যামঃ পাকশাসনিমাগতম্

বলস্য ব্যসনানীহ যান্যুক্তানি মনীষিভিঃ
মুখ্যো ভেদো হি তেষাং বৈ পাপিষ্ঠো বিদুষাং মতঃ

অশ্বত্থামোবাচ
আচার্য এব ক্ষমতাং শান্তিরত্র বিধীয়তাম্
অভিষজ্যমানে হি গুরৌ তদ্বৃত্তং রোষকারিতম্

বৈশংপায়ন উবাচ
ততো দুর্যোধনো দ্রোণং ক্ষময়ামাস ভারত
সহ কর্ণেন ভীষ্মেণ কৃপেণ চ মহাত্মনা

দ্রোণ উবাচ
যদেব প্রথমং বাক্যং ভীষ্মঃ শাংতনবোঽব্রবীৎ
তেনৈবাহং প্রসন্নো বৈ পরমত্র বিধীয়তাম্

যথা দুর্যোধনেঽয়ত্তে নাগঃ স্পৃশতি সৈনিকান্
সাহসাদ্যদি বা মোহাত্তথা নীতির্বিধীয়তাম্

বনবাসে হ্যনির্বৃত্তে দর্শয়েন্ন ধনংজয়ঃ
ধনং বালভমানোঽত্র নাদ্য নঃ ক্ষন্তুমর্হতি

যথা নায়ং সমায়ুজ্যাদ্ধার্তরাষ্ট্রান্কথংচন
যথা চ ন পরাজয্যাত্তথা নীতির্বিধীয়তাম্

উক্তং দুর্যোধনেনাপি পুরস্তাদ্বাক্যমীদৃশম্
তদনুস্মৃত্য গাঙ্গেয় যথাবদ্বক্তুমর্হসি