UtshovChapter 46
46.1
भीष्म उवाच
साधु पश्यति वै द्रोणः कृपः साध्वनुपश्यति
कर्णस्तु क्षत्रधर्मेण यथावद्योद्धुमिच्छति
Bhishma uvacha
Sadhu pashyati vai dronah kripah sadhvanupashyati
Karnastu kshatradharmena yathavadyoddhumichchhati
46.2
आचार्यो नाभिषक्तव्यः पुरुषेण विजानता
देशकालौ तु संप्रेक्ष्य योद्धव्यमिति मे मतिः
Acharyo nabhishaktavyah purushena vijanata
Deshakalau tu samprekshya yoddhavyamiti me matih
46.3
यस्य सूर्यसमाः पञ्च सपत्नाः स्युः प्रहारिणः
कथमभ्युदये तेषां न प्रमुह्येत पण्डितः
Yasya suryasamah pancha sapatnah syuh praharinah
Kathamabhyudaye tesham na pramuhyeta panditah
46.4
स्वार्थे सर्वे विमुह्यन्ति येऽपि धर्मविदो जनाः
तस्माद्राजन्ब्रवीम्येष वाक्यं ते यदि रोचते
Svarthe sarve vimuhyanti yepi dharmavido janah
Tasmadrajanbravimyesha vakyam te yadi rochate
46.5
कर्णो यदभ्यवोचन्नस्तेजःसंजननाय तत्
आचार्यपुत्रः क्षमतां महत्कार्यमुपस्थितम्
Karno yadabhyavochannastejahsanjananaya tat
Acharyaputrah kshamatam mahatkaryamupasthitam
46.6
नायं कालो विरोधस्य कौन्तेये समुपस्थिते
क्षन्तव्यं भवता सर्वमाचार्येण कृपेण च
Nayam kalo virodhasya kaunteye samupasthite
Kshantavyam bhavata sarvamacharyena kripena cha
46.7
भवतां हि कृतास्त्रत्वं यथादित्ये प्रभा तथा
यथा चन्द्रमसो लक्ष्म सर्वथा नापकृष्यते
एवं भवत्सु ब्राह्मण्यं ब्रह्मास्त्रं च प्रतिष्ठितम्
Bhavatam hi kritastratvam yathaditye prabha tatha
Yatha chandramaso lakshma sarvatha napakrishyate
Evam bhavatsu brahmanyam brahmastram cha pratishthitam
46.8
चत्वार एकतो वेदाः क्षात्रमेकत्र दृश्यते
नैतत्समस्तमुभयं कस्मिंश्चिदनुशुश्रुमः
Chatvara ekato vedah kshatramekatra drishyate
Naitatsamastamubhayam kasminshchidanushushrumah
46.9
अन्यत्र भारताचार्यात्सपुत्रादिति मे मतिः
ब्रह्मास्त्रं चैव वेदाश्च नैतदन्यत्र दृश्यते
Anyatra bharatacharyatsaputraditi me matih
Brahmastram chaiva vedashcha naitadanyatra drishyate
46.10
आचार्यपुत्रः क्षमतां नायं कालः स्वभेदने
सर्वे संहत्य युध्यामः पाकशासनिमागतम्
Acharyaputrah kshamatam nayam kalah svabhedane
Sarve sanhatya yudhyamah pakashasanimagatam
46.11
बलस्य व्यसनानीह यान्युक्तानि मनीषिभिः
मुख्यो भेदो हि तेषां वै पापिष्ठो विदुषां मतः
Balasya vyasananiha yanyuktani manishibhih
Mukhyo bhedo hi tesham vai papishtho vidusham matah
46.12
अश्वत्थामोवाच
आचार्य एव क्षमतां शान्तिरत्र विधीयताम्
अभिषज्यमाने हि गुरौ तद्वृत्तं रोषकारितम्
Ashvatthamovacha
Acharya eva kshamatam shantiratra vidhiyatam
Abhishajyamane hi gurau tadvrittam roshakaritam
46.13
वैशंपायन उवाच
ततो दुर्योधनो द्रोणं क्षमयामास भारत
सह कर्णेन भीष्मेण कृपेण च महात्मना
Vaishampayana uvacha
Tato duryodhano dronam kshamayamasa bharata
Saha karnena bhishmena kripena cha mahatmana
46.14
द्रोण उवाच
यदेव प्रथमं वाक्यं भीष्मः शांतनवोऽब्रवीत्
तेनैवाहं प्रसन्नो वै परमत्र विधीयताम्
Drona uvacha
Yadeva prathamam vakyam bhishmah shantanavobravit
Tenaivaham prasanno vai paramatra vidhiyatam
46.15
यथा दुर्योधनेऽयत्ते नागः स्पृशति सैनिकान्
साहसाद्यदि वा मोहात्तथा नीतिर्विधीयताम्
Yatha duryodhaneyatte nagah sprishati sainikan
Sahasadyadi va mohattatha nitirvidhiyatam
46.16
वनवासे ह्यनिर्वृत्ते दर्शयेन्न धनंजयः
धनं वालभमानोऽत्र नाद्य नः क्षन्तुमर्हति
Vanavase hyanirvritte darshayenna dhananjayah
Dhanam valabhamanotra nadya nah kshantumarhati
46.17
यथा नायं समायुज्याद्धार्तराष्ट्रान्कथंचन
यथा च न पराजय्यात्तथा नीतिर्विधीयताम्
Yatha nayam samayujyaddhartarashtrankathanchana
Yatha cha na parajayyattatha nitirvidhiyatam
46.18
उक्तं दुर्योधनेनापि पुरस्ताद्वाक्यमीदृशम्
तदनुस्मृत्य गाङ्गेय यथावद्वक्तुमर्हसि
Uktam duryodhanenapi purastadvakyamidrisham
Tadanusmritya gangeya yathavadvaktumarhasi