অধ্যায় 47

47.1

ভীষ্ম উবাচ
কলাংশাস্তাত যুজ্যন্তে মুহূর্তাশ্চ দিনানি চ
অর্ধমাসাশ্চ মাসাশ্চ নক্ষত্রাণি গ্রহাস্তথা

ঋতবশ্চাপি যুজ্যন্তে তথা সংবত্সরা অপি
এবং কালবিভাগেন কালচক্রং প্রবর্ততে

তেষাং কালাতিরেকেণ জ্যোতিষাং চ ব্যতিক্রমাৎ
পঞ্চমে পঞ্চমে বর্ষে দ্বৌ মাসাবুপজায়তঃ

তেষামভ্যধিকা মাসাঃ পঞ্চ দ্বাদশ চ ক্ষপাঃ
ত্রয়োদশানাং বর্ষাণামিতি মে বর্ততে মতিঃ

সর্বং যথাবচ্চরিতং যদ্যদেভিঃ পরিশ্রুতম্
এবমেতদ্ধ্রুবং জ্ঞাত্বা ততো বীভত্সুরাগতঃ

সর্বে চৈব মহাত্মানঃ সর্বে ধর্মার্থকোবিদাঃ
যেষাং যুধিষ্ঠিরো রাজা কস্মাদ্ধর্মেঽপরাধ্নুয়ুঃ

অলুব্ধাশ্চৈব কৌন্তেয়াঃ কৃতবন্তশ্চ দুষ্করম্
ন চাপি কেবলং রাজ্যমিচ্ছেয়ুস্তেঽনুপায়তঃ

তদৈব তে হি বিক্রান্তুমীষুঃ কৌরবনন্দনাঃ
ধর্মপাশনিবদ্ধাস্তু ন চেলুঃ ক্ষত্রিয়ব্রতাৎ

যচ্চানৃত ইতি খ্যায়েদ্যচ্চ গচ্ছেত্পরাভবম্
বৃণুয়ুর্মরণং পার্থা নানৃতত্বং কথংচন

প্রাপ্তে তু কালে প্রাপ্তব্যং নোত্সৃজেয়ুর্নরর্ষভাঃ
অপি বজ্রভৃতা গুপ্তং তথাবীর্যা হি পাণ্ডবাঃ

প্রতিয়ুধ্যাম সমরে সর্বশস্ত্রভৃতাং বরম্
তস্মাদ্যদত্র কল্যাণং লোকে সদ্ভিরনুষ্ঠিতম্
তত্সংবিধীয়তাং ক্ষিপ্রং মা নো হ্যর্থোঽতিগাত্পরান্

ন হি পশ্যামি সংগ্রামে কদাচিদপি কৌরব
একান্তসিদ্ধিং রাজেন্দ্র সংপ্রাপ্তশ্চ ধনংজয়ঃ

সংপ্রবৃত্তে তু সংগ্রামে ভাবাভাবৌ জয়াজয়ৌ
অবশ্যমেকং স্পৃশতো দৃষ্টমেতদসংশয়ম্

তস্মাদ্যুদ্ধাবচরিকং কর্ম বা ধর্মসংহিতম্
ক্রিয়তামাশু রাজেন্দ্র সংপ্রাপ্তো হি ধনংজয়ঃ

দুর্যোধন উবাচ
নাহং রাজ্যং প্রদাস্যামি পাণ্ডবানাং পিতামহ
যুদ্ধাবচারিকং যত্তু তচ্ছীঘ্রং সংবিধীয়তাম্

ভীষ্ম উবাচ
অত্র যা মামকী বুদ্ধিঃ শ্রূয়তাং যদি রোচতে
ক্ষিপ্রং বলচতুর্ভাগং গৃহ্য গচ্ছ পুরং প্রতি
ততোঽপরশ্চতুর্ভাগো গাঃ সমাদায় গচ্ছতু

বয়ং ত্বর্ধেন সৈন্যেন প্রতিয়োত্স্যাম পাণ্ডবম্
মত্স্যং বা পুনরায়াতমথ বাপি শতক্রতুম্

আচার্যো মধ্যতস্তিষ্ঠত্বশ্বত্থামা তু সব্যতঃ
কৃপঃ শারদ্বতো ধীমান্পার্শ্বং রক্ষতু দক্ষিণম্

অগ্রতঃ সূতপুত্রস্তু কর্ণস্তিষ্ঠতু দংশিতঃ
অহং সর্বস্য সৈন্যস্য পশ্চাত্স্থাস্যামি পালয়ন্