অধ্যায় 48

48.1

বৈশংপায়ন উবাচ
তথা ব্যূঢেষ্বনীকেষু কৌরবেয়ৈর্মহারথৈঃ
উপায়াদর্জুনস্তূর্ণং রথঘোষেণ নাদয়ন্

দদৃশুস্তে ধ্বজাগ্রং বৈ শুশ্রুবুশ্চ রথস্বনম্
দোধূয়মানস্য ভৃশং গাণ্ডীবস্য চ নিস্বনম্

ততস্তত্সর্বমালোক্য দ্রোণো বচনমব্রবীৎ
মহারথমনুপ্রাপ্তং দৃষ্ট্বা গাণ্ডীবধন্বিনম্

এতদ্ধ্বজাগ্রং পার্থস্য দূরতঃ সংপ্রকাশতে
এষ ঘোষঃ সজলদো রোরবীতি চ বানরঃ

এষ তিষ্ঠন্রথশ্রেষ্ঠো রথে রথবরপ্রণুৎ
উত্কর্ষতি ধনুঃশ্রেষ্ঠং গাণ্ডীবমশনিস্বনম্

ইমৌ হি বাণৌ সহিতৌ পাদয়োর্মে ব্যবস্থিতৌ
অপরৌ চাপ্যতিক্রান্তৌ কর্ণৌ সংস্পৃশ্য মে শরৌ

নিরুষ্য হি বনে বাসং কৃত্বা কর্মাতিমানুষম্
অভিবাদয়তে পার্থঃ শ্রোত্রে চ পরিপৃচ্ছতি

অর্জুন উবাচ
ইষুপাতে চ সেনায়া হয়ান্সংয়চ্ছ সারথে
যাবত্সমীক্ষে সৈন্যেঽস্মিন্ক্বাসৌ কুরুকুলাধমঃ

সর্বানন্যাননাদৃত্য দৃষ্ট্বা তমতিমানিনম্
তস্য মূর্ধ্নি পতিষ্যামি তত এতে পরাজিতাঃ

এষ ব্যবস্থিতো দ্রোণো দ্রৌণিশ্চ তদনন্তরম্
ভীষ্মঃ কৃপশ্চ কর্ণশ্চ মহেষ্বাসা ব্যবস্থিতাঃ

রাজানং নাত্র পশ্যামি গাঃ সমাদায় গচ্ছতি
দক্ষিণং মার্গমাস্থায় শঙ্কে জীবপরায়ণঃ

উত্সৃজ্যৈতদ্রথানীকং গচ্ছ যত্র সুয়োধনঃ
তত্রৈব যোত্স্যে বৈরাটে নাস্তি যুদ্ধং নিরামিষম্
তং জিত্বা বিনিবর্তিষ্যে গাঃ সমাদায় বৈ পুনঃ

বৈশংপায়ন উবাচ
এবমুক্তঃ স বৈরাটির্হয়ান্সংয়ম্য যত্নতঃ
নিয়ম্য চ ততো রশ্মীন্যত্র তে কুরুপুংগবাঃ
অচোদয়ত্ততো বাহান্যতো দুর্যোধনস্ততঃ

উত্সৃজ্য রথবংশং তু প্রয়াতে শ্বেতবাহনে
অভিপ্রায়ং বিদিত্বাস্য দ্রোণো বচনমব্রবীৎ

নৈষোঽন্তরেণ রাজানং বীভত্সুঃ স্থাতুমিচ্ছতি
তস্য পার্ষ্ণিং গ্রহীষ্যামো জবেনাভিপ্রয়াস্যতঃ

ন হ্যেনমভিসংক্রুদ্ধমেকো যুধ্যেত সংয়ুগে
অন্যো দেবাত্সহস্রাক্ষাত্কৃষ্ণাদ্বা দেবকীসুতাৎ

কিং নো গাবঃ করিষ্যন্তি ধনং বা বিপুলং তথা
দুর্যোধনঃ পার্থজলে পুরা নৌরিব মজ্জতি

তথৈব গত্বা বীভত্সুর্নাম বিশ্রাব্য চাত্মনঃ
শলভৈরিব তাং সেনাং শরৈঃ শীঘ্রমবাকিরৎ

কীর্যমাণাঃ শরৌঘৈস্তু যোধাস্তে পার্থচোদিতৈঃ
নাপশ্যন্নাবৃতাং ভূমিমন্তরিক্ষং চ পত্রিভিঃ

তেষাং নাত্মনিনো যুদ্ধে নাপয়ানেঽভবন্মতিঃ
শীঘ্রত্বমেব পার্থস্য পূজয়ন্তি স্ম চেতসা

ততঃ শঙ্খং প্রদধ্মৌ স দ্বিষতাং লোমহর্ষণম্
বিস্ফার্য চ ধনুঃশ্রেষ্ঠং ধ্বজে ভূতান্যচোদয়ৎ

তস্য শঙ্খস্য শব্দেন রথনেমিস্বনেন চ
অমানুষাণাং তেষাং চ ভূতানাং ধ্বজবাসিনাম্

ঊর্ধ্বং পুচ্ছান্বিধুন্বানা রেভমাণাঃ সমন্ততঃ
গাবঃ প্রতিন্যবর্তন্ত দিশমাস্থায় দক্ষিণাম্