Utshovঅধ্যায় 49
49.1
বৈশংপায়ন উবাচ
স শত্রুসেনাং তরসা প্রণুদ্য; গাস্তা বিজিত্যাথ ধনুর্ধরাগ্র্যঃ
দুর্যোধনায়াভিমুখং প্রয়াতো; ভূয়োঽর্জুনঃ প্রিয়মাজৌ চিকীর্ষন্
49.2
গোষু প্রয়াতাসু জবেন মত্স্যা;ন্কিরীটিনং কৃতকার্যং চ মত্বা
দুর্যোধনায়াভিমুখং প্রয়ান্তং; কুরুপ্রবীরাঃ সহসাভিপেতুঃ
49.3
তেষামনীকানি বহূনি গাঢং; ব্যূঢানি দৃষ্ট্বা বহুলধ্বজানি
মত্স্যস্য পুত্রং দ্বিষতাং নিহন্তা; বৈরাটিমামন্ত্র্য ততোঽভ্যুবাচ
49.4
এতেন তূর্ণং প্রতিপাদয়েমা;ঞ্শ্বেতান্হয়ান্কাঞ্চনরশ্মিয়োক্ত্রান্
জবেন সর্বেণ কুরু প্রয়ত্ন;মাসাদয়ৈতদ্রথসিংহবৃন্দম্
49.5
গজো গজেনেব ময়া দুরাত্মা; যো যোদ্ধুমাকাঙ্ক্ষতি সূতপুত্রঃ
তমেব মাং প্রাপয় রাজপুত্র; দুর্যোধনাপাশ্রয়জাতদর্পম্
49.6
স তৈর্হয়ৈর্বাতজবৈর্বৃহদ্ভিঃ; পুত্রো বিরাটস্য সুবর্ণকক্ষ্যৈঃ
বিধ্বংসয়ংস্তদ্রথিনামনীকং; ততোঽবহত্পাণ্ডবমাজিমধ্যে
49.7
তং চিত্রসেনো বিশিখৈর্বিপাঠৈঃ; সংগ্রামজিচ্ছত্রুসহো জয়শ্চ
প্রত্যুদ্যয়ুর্ভারতমাপতন্তং; মহারথাঃ কর্ণমভীপ্সমানাঃ
49.8
ততঃ স তেষাং পুরুষপ্রবীরঃ; শরাসনার্চিঃ শরবেগতাপঃ
ব্রাতান্রথানামদহত্স মন্যু;র্বনং যথাগ্নিঃ কুরুপুংগবানাম্
49.9
তস্মিংস্তু যুদ্ধে তুমুলে প্রবৃত্তে; পার্থং বিকর্ণোঽতিরথং রথেন
বিপাঠবর্ষেণ কুরুপ্রবীরো; ভীমেন ভীমানুজমাসসাদ
49.10
ততো বিকর্ণস্য ধনুর্বিকৃষ্য; জাম্বূনদাগ্র্যোপচিতং দৃঢজ্যম্
অপাতয়দ্ধ্বজমস্য প্রমথ্য; ছিন্নধ্বজঃ সোঽপ্যপয়াজ্জবেন
49.11
তং শাত্রবাণাং গণবাধিতারং; কর্মাণি কুর্বাণমমানুষাণি
শত্রুংতপঃ কোপমমৃষ্যমাণঃ; সমর্পয়ত্কূর্মনখেন পার্থম্
49.12
স তেন রাজ্ঞাতিরথেন বিদ্ধো; বিগাহমানো ধ্বজিনীং কুরূণাম্
শত্রুংতপং পঞ্চভিরাশু বিদ্ধ্বা; ততোঽস্য সূতং দশভির্জঘান
49.13
ততঃ স বিদ্ধো ভরতর্ষভেণ; বাণেন গাত্রাবরণাতিগেন
গতাসুরাজৌ নিপপাত ভূমৌ; নগো নগাগ্রাদিব বাতরুগ্ণঃ
49.14
রথর্ষভাস্তে তু রথর্ষভেণ; বীরা রণে বীরতরেণ ভগ্নাঃ
চকম্পিরে বাতবশেন কালে; প্রকম্পিতানীব মহাবনানি
49.15
হতাস্তু পার্থেন নরপ্রবীরা; ভূমৌ যুবানঃ সুষুপুঃ সুবেষাঃ
বসুপ্রদা বাসবতুল্যবীর্যাঃ; পরাজিতা বাসবজেন সংখ্যে
সুবর্ণকার্ষ্ণায়সবর্মনদ্ধা; নাগা যথা হৈমবতাঃ প্রবৃদ্ধাঃ
49.16
তথা স শত্রূন্সমরে বিনিঘ্ন;ন্গাণ্ডীবধন্বা পুরুষপ্রবীরঃ
চচার সংখ্যে প্রদিশো দিশশ্চ; দহন্নিবাগ্নির্বনমাতপান্তে
49.17
প্রকীর্ণপর্ণানি যথা বসন্তে; বিশাতয়িত্বাত্যনিলো নুদন্খে
তথা সপত্নান্বিকিরন্কিরীটী; চচার সংখ্যেঽতিরথো রথেন
49.18
শোণাশ্ববাহস্য হয়ান্নিহত্য; বৈকর্তনভ্রাতুরদীনসত্ত্বঃ
একেন সংগ্রামজিতঃ শরেণ; শিরো জহারাথ কিরীটমালী
49.19
তস্মিন্হতে ভ্রাতরি সূতপুত্রো; বৈকর্তনো বীর্যমথাদদানঃ
প্রগৃহ্য দন্তাবিব নাগরাজো; মহর্ষভং ব্যাঘ্র ইবাভ্যধাবৎ
49.20
স পাণ্ডবং দ্বাদশভিঃ পৃষত্কৈ;র্বৈকর্তনঃ শীঘ্রমুপাজঘান
বিব্যাধ গাত্রেষু হয়াংশ্চ সর্বা;ন্বিরাটপুত্রং চ শরৈর্নিজঘ্নে
49.21
স হস্তিনেবাভিহতো গজেন্দ্রঃ; প্রগৃহ্য ভল্লান্নিশিতান্নিষঙ্গাৎ
আকর্ণপূর্ণং চ ধনুর্বিকৃষ্য; বিব্যাধ বাণৈরথ সূতপুত্রম্
49.22
অথাস্য বাহূরুশিরোললাটং; গ্রীবাং রথাঙ্গানি পরাবমর্দী
স্থিতস্য বাণৈর্যুধি নির্বিভেদ; গাণ্ডীবমুক্তৈরশনিপ্রকাশৈঃ
49.23
স পার্থমুক্তৈর্বিশিখৈঃ প্রণুন্নো; গজো গজেনেব জিতস্তরস্বী
বিহায় সংগ্রামশিরঃ প্রয়াতো; বৈকর্তনঃ পাণ্ডববাণতপ্তঃ