অধ্যায় 50

50.1

বৈশংপায়ন উবাচ
অপয়াতে তু রাধেয়ে দুর্যোধনপুরোগমাঃ
অনীকেন যথাস্বেন শরৈরার্চ্ছন্ত পাণ্ডবম্

বহুধা তস্য সৈন্যস্য ব্যূঢস্যাপততঃ শরৈঃ
অভিয়ানীয়মাজ্ঞায় বৈরাটিরিদমব্রবীৎ

আস্থায় রুচিরং জিষ্ণো রথং সারথিনা ময়া
কতমদ্যাস্যসেঽনীকমুক্তো যাস্যাম্যহং ত্বয়া

অর্জুন উবাচ
লোহিতাক্ষমরিষ্টং যং বৈয়াঘ্রমনুপশ্যসি
নীলাং পতাকামাশ্রিত্য রথে তিষ্ঠন্তমুত্তর

কৃপস্যৈতদ্রথানীকং প্রাপয়স্বৈতদেব মাম্
এতস্য দর্শয়িষ্যামি শীঘ্রাস্ত্রং দৃঢধন্বিনঃ

কমণ্ডলুর্ধ্বজে যস্য শাতকুম্ভময়ঃ শুভঃ
আচার্য এষ বৈ দ্রোণঃ সর্বশস্ত্রভৃতাং বরঃ

সুপ্রসন্নমনা বীর কুরুষ্বৈনং প্রদক্ষিণম্
অত্রৈব চাবিরোধেন এষ ধর্মঃ সনাতনঃ

যদি মে প্রথমং দ্রোণঃ শরীরে প্রহরিষ্যতি
ততোঽস্য প্রহরিষ্যামি নাস্য কোপো ভবিষ্যতি

অস্যাবিদূরে তু ধনুর্ধ্বজাগ্রে যস্য দৃশ্যতে
আচার্যস্যৈষ পুত্রো বৈ অশ্বত্থামা মহারথঃ

সদা মমৈষ মান্যশ্চ সর্বশস্ত্রভৃতামপি
এতস্য ত্বং রথং প্রাপ্য নিবর্তেথাঃ পুনঃ পুনঃ

য এষ তু রথানীকে সুবর্ণকবচাবৃতঃ
সেনাগ্র্যেণ তৃতীয়েন ব্যবহার্যেণ তিষ্ঠতি

যস্য নাগো ধ্বজাগ্রে বৈ হেমকেতনসংশ্রিতঃ
ধৃতরাষ্ট্রাত্মজঃ শ্রীমানেষ রাজা সুয়োধনঃ

এতস্যাভিমুখং বীর রথং পররথারুজঃ
প্রাপয়স্বৈষ তেজোভিপ্রমাথী যুদ্ধদুর্মদঃ

এষ দ্রোণস্য শিষ্যাণাং শীঘ্রাস্ত্রঃ প্রথমো মতঃ
এতস্য দর্শয়িষ্যামি শীঘ্রাস্ত্রং বিপুলং শরৈঃ

নাগকক্ষ্যা তু রুচিরা ধ্বজাগ্রে যস্য তিষ্ঠতি
এষ বৈকর্তনঃ কর্ণো বিদিতঃ পূর্বমেব তে

এতস্য রথমাস্থায় রাধেয়স্য দুরাত্মনঃ
যত্তো ভবেথাঃ সংগ্রামে স্পর্ধত্যেষ ময়া সদা

যস্তু নীলানুসারেণ পঞ্চতারেণ কেতুনা
হস্তাবাপী বৃহদ্ধন্বা রথে তিষ্ঠতি বীর্যবান্

যস্য তারার্কচিত্রোঽসৌ রথে ধ্বজবরঃ স্থিতঃ
যস্যৈতত্পাণ্ডুরং ছত্রং বিমলং মূর্ধ্নি তিষ্ঠতি

মহতো রথবংশস্য নানাধ্বজপতাকিনঃ
বলাহকাগ্রে সূর্যো বা য এষ প্রমুখে স্থিতঃ

হৈমং চন্দ্রার্কসংকাশং কবচং যস্য দৃশ্যতে
জাতরূপশিরস্ত্রাণস্ত্রাসয়ন্নিব মে মনঃ

এষ শাংতনবো ভীষ্মঃ সর্বেষাং নঃ পিতামহঃ
রাজশ্রিয়াববদ্ধস্তু দুর্যোধনবশানুগঃ

পশ্চাদেষ প্রয়াতব্যো ন মে বিঘ্নকরো ভবেৎ
এতেন যুধ্যমানস্য যত্তঃ সংয়চ্ছ মে হয়ান্

ততোঽভ্যবহদব্যগ্রো বৈরাটিঃ সব্যসাচিনম্
যত্রাতিষ্ঠত্কৃপো রাজন্যোত্স্যমানো ধনংজয়ম্