অধ্যায় 51

51.1

বৈশংপায়ন উবাচ
তান্যনীকান্যদৃশ্যন্ত কুরূণামুগ্রধন্বিনাম্
সংসর্পন্তো যথা মেঘা ঘর্মান্তে মন্দমারুতাঃ

অভ্যাশে বাজিনস্তস্থুঃ সমারূঢাঃ প্রহারিভিঃ
ভীমরূপাশ্চ মাতঙ্গাস্তোমরাঙ্কুশচোদিতাঃ

ততঃ শক্রঃ সুরগণৈঃ সমারুহ্য সুদর্শনম্
সহোপায়াত্তদা রাজন্বিশ্বাশ্বিমরুতাং গণৈঃ

তদ্দেবয়ক্ষগন্ধর্বমহোরগসমাকুলম্
শুশুভেঽভ্রবিনির্মুক্তং গ্রহৈরিব নভস্তলম্

অস্ত্রাণাং চ বলং তেষাং মানুষেষু প্রয়ুজ্যতাম্
তচ্চ ঘোরং মহদ্যুদ্ধং ভীষ্মার্জুনসমাগমে

শতং শতসহস্রাণাং যত্র স্থূণা হিরণ্ময়াঃ
মণিরত্নময়াশ্চান্যাঃ প্রাসাদমুপধারয়ন্

তত্র কামগমং দিব্যং সর্বরত্নবিভূষিতম্
বিমানং দেবরাজস্য শুশুভে খেচরং তদা

তত্র দেবাস্ত্রয়স্ত্রিংশত্তিষ্ঠন্তি সহবাসবাঃ
গন্ধর্বা রাক্ষসাঃ সর্পাঃ পিতরশ্চ মহর্ষিভিঃ

তথা রাজা বসুমনা বলাক্ষঃ সুপ্রতর্দনঃ
অষ্টকশ্চ শিবিশ্চৈব যয়াতির্নহুষো গয়ঃ

মনুঃ ক্ষুপো রঘুর্ভানুঃ কৃশাশ্বঃ সগরঃ শলঃ
বিমানে দেবরাজস্য সমদৃশ্যন্ত সুপ্রভাঃ

অগ্নেরীশস্য সোমস্য বরুণস্য প্রজাপতেঃ
তথা ধাতুর্বিধাতুশ্চ কুবেরস্য যমস্য চ

অলম্বুসোগ্রসেনস্য গন্ধর্বস্য চ তুম্বুরোঃ
যথাভাগং যথোদ্দেশং বিমানানি চকাশিরে

সর্বদেবনিকায়াশ্চ সিদ্ধাশ্চ পরমর্ষয়ঃ
অর্জুনস্য কুরূণাং চ দ্রষ্টুং যুদ্ধমুপাগতাঃ

দিব্যানাং তত্র মাল্যানাং গন্ধঃ পুণ্যোঽথ সর্বশঃ
প্রসসার বসন্তাগ্রে বনানামিব পুষ্পতাম্

রক্তারক্তানি দেবানাং সমদৃশ্যন্ত তিষ্ঠতাম্
আতপত্রাণি বাসাংসি স্রজশ্চ ব্যজনানি চ

উপশাম্যদ্রজো ভৌমং সর্বং ব্যাপ্তং মরীচিভিঃ
দিব্যান্গন্ধানুপাদায় বায়ুর্যোধানসেবত

প্রভাসিতমিবাকাশং চিত্ররূপমলংকৃতম্
সংপতদ্ভিঃ স্থিতৈশ্চৈব নানারত্নাবভাসিতৈঃ
বিমানৈর্বিবিধৈশ্চিত্রৈরুপানীতৈঃ সুরোত্তমৈঃ