Utshovঅধ্যায় 52
52.1
বৈশংপায়ন উবাচ
এতস্মিন্নন্তরে তত্র মহাবীর্যপরাক্রমঃ
আজগাম মহাসত্ত্বঃ কৃপঃ শস্ত্রভৃতাং বরঃ
অর্জুনং প্রতি সংয়োদ্ধুং যুদ্ধার্থী স মহারথঃ
52.2
তৌ রথৌ সূর্যসংকাশৌ যোত্স্যমানৌ মহাবলৌ
শারদাবিব জীমূতৌ ব্যরোচেতাং ব্যবস্থিতৌ
52.3
পার্থোঽপি বিশ্রুতং লোকে গাণ্ডীবং পরমায়ুধম্
বিকৃষ্য চিক্ষেপ বহূন্নারাচান্মর্মভেদিনঃ
52.4
তানপ্রাপ্তাঞ্শিতৈর্বাণৈর্নারাচান্রক্তভোজনান্
কৃপশ্চিচ্ছেদ পার্থস্য শতশোঽথ সহস্রশঃ
52.5
ততঃ পার্থশ্চ সংক্রুদ্ধশ্চিত্রান্মার্গান্প্রদর্শয়ন্
দিশঃ সংছাদয়ন্বাণৈঃ প্রদিশশ্চ মহারথঃ
52.6
একচ্ছায়মিবাকাশং প্রকুর্বন্সর্বতঃ প্রভুঃ
প্রচ্ছাদয়দমেয়াত্মা পার্থঃ শরশতৈঃ কৃপম্
52.7
স শরৈরর্পিতঃ ক্রুদ্ধঃ শিতৈরগ্নিশিখোপমৈঃ
তূর্ণং শরসহস্রেণ পার্থমপ্রতিমৌজসম্
অর্পয়িত্বা মহাত্মানং ননাদ সমরে কৃপঃ
52.8
ততঃ কনকপুঙ্খাগ্রৈর্বীরঃ সংনতপর্বভিঃ
ত্বরন্গাণ্ডীবনির্মুক্তৈরর্জুনস্তস্য বাজিনঃ
চতুর্ভিশ্চতুরস্তীক্ষ্ণৈরবিধ্যত্পরমেষুভিঃ
52.9
তে হয়া নিশিতৈর্বিদ্ধা জ্বলদ্ভিরিব পন্নগৈঃ
উত্পেতুঃ সহসা সর্বে কৃপঃ স্থানাদথাচ্যবৎ
52.10
চ্যুতং তু গৌতমং স্থানাত্সমীক্ষ্য কুরুনন্দনঃ
নাবিধ্যত্পরবীরঘ্নো রক্ষমাণোঽস্য গৌরবম্
52.11
স তু লব্ধ্বা পুনঃ স্থানং গৌতমঃ সব্যসাচিনম্
বিব্যাধ দশভির্বাণৈস্ত্বরিতঃ কঙ্কপত্রিভিঃ
52.12
ততঃ পার্থো ধনুস্তস্য ভল্লেন নিশিতেন চ
চিচ্ছেদৈকেন ভূয়শ্চ হস্তাচ্চাপমথাহরৎ
52.13
অথাস্য কবচং বাণৈর্নিশিতৈর্মর্মভেদিভিঃ
ব্যধমন্ন চ পার্থোঽস্য শরীরমবপীডয়ৎ
52.14
তস্য নির্মুচ্যমানস্য কবচাত্কায় আবভৌ
সময়ে মুচ্যমানস্য সর্পস্যেব তনুর্যথা
52.15
ছিন্নে ধনুষি পার্থেন সোঽন্যদাদায় কার্মুকম্
চকার গৌতমঃ সজ্যং তদদ্ভুতমিবাভবৎ
52.16
স তদপ্যস্য কৌন্তেয়শ্চিচ্ছেদ নতপর্বণা
এবমন্যানি চাপানি বহূনি কৃতহস্তবৎ
শারদ্বতস্য চিচ্ছেদ পাণ্ডবঃ পরবীরহা
52.17
স ছিন্নধনুরাদায় অথ শক্তিং প্রতাপবান্
প্রাহিণোত্পাণ্ডুপুত্রায় প্রদীপ্তামশনীমিব
52.18
তামর্জুনস্তদায়ান্তীং শক্তিং হেমবিভূষিতাম্
বিয়দ্গতাং মহোল্কাভাং চিচ্ছেদ দশভিঃ শরৈঃ
সাপতদ্দশধা ছিন্না ভূমৌ পার্থেন ধীমতা
52.19
যুগমধ্যে তু ভল্লৈস্তু ততঃ স সধনুঃ কৃপঃ
তমাশু নিশিতৈঃ পার্থং বিভেদ দশভিঃ শরৈঃ
52.20
ততঃ পার্থো মহাতেজা বিশিখানগ্নিতেজসঃ
চিক্ষেপ সমরে ক্রুদ্ধস্ত্রয়োদশ শিলাশিতান্
52.21
অথাস্য যুগমেকেন চতুর্ভিশ্চতুরো হয়ান্
ষষ্ঠেন চ শিরঃ কায়াচ্ছরেণ রথসারথেঃ
52.22
ত্রিভিস্ত্রিবেণুং সমরে দ্বাভ্যামক্ষৌ মহাবলঃ
দ্বাদশেন তু ভল্লেন চকর্তাস্য ধ্বজং তথা
52.23
ততো বজ্রনিকাশেন ফল্গুনঃ প্রহসন্নিব
ত্রয়োদশেনেন্দ্রসমঃ কৃপং বক্ষস্যতাডয়ৎ
52.24
স ছিন্নধন্বা বিরথো হতাশ্বো হতসারথিঃ
গদাপাণিরবপ্লুত্য তূর্ণং চিক্ষেপ তাং গদাম্
52.25
সা তু মুক্তা গদা গুর্বী কৃপেণ সুপরিষ্কৃতা
অর্জুনেন শরৈর্নুন্না প্রতিমার্গমথাগমৎ
52.26
ততো যোধাঃ পরীপ্সন্তঃ শারদ্বতমমর্ষণম্
সর্বতঃ সমরে পার্থং শরবর্ষৈরবাকিরন্
52.27
ততো বিরাটস্য সুতঃ সব্যমাবৃত্য বাজিনঃ
যমকং মণ্ডলং কৃত্বা তান্যোধান্প্রত্যবারয়ৎ
52.28
ততঃ কৃপমুপাদায় বিরথং তে নরর্ষভাঃ
অপাজহ্রুর্মহাবেগাঃ কুন্তীপুত্রাদ্ধনংজয়াৎ