Utshovঅধ্যায় 53
53.1
অর্জুন উবাচ
যত্রৈষা কাঞ্চনী বেদী প্রদীপ্তাগ্নিশিখোপমা
উচ্ছ্রিতা কাঞ্চনে দণ্ডে পতাকাভিরলংকৃতা
তত্র মাং বহ ভদ্রং তে দ্রোণানীকায় মারিষ
53.2
অশ্বাঃ শোণাঃ প্রকাশন্তে বৃহন্তশ্চারুবাহিনঃ
স্নিগ্ধবিদ্রুমসংকাশাস্তাম্রাস্যাঃ প্রিয়দর্শনাঃ
যুক্তা রথবরে যস্য সর্বশিক্ষাবিশারদাঃ
53.3
দীর্ঘবাহুর্মহাতেজা বলরূপসমন্বিতঃ
সর্বলোকেষু বিখ্যাতো ভারদ্বাজঃ প্রতাপবান্
53.4
বুদ্ধ্যা তুল্যো হ্যুশনসা বৃহস্পতিসমো নয়ে
বেদাস্তথৈব চত্বারো ব্রহ্মচর্যং তথৈব চ
53.5
সসংহারাণি দিব্যানি সর্বাণ্যস্ত্রাণি মারিষ
ধনুর্বেদশ্চ কার্ত্স্ন্যেন যস্মিন্নিত্যং প্রতিষ্ঠিতঃ
53.6
ক্ষমা দমশ্চ সত্যং চ আনৃশংস্যমথার্জবম্
এতে চান্যে চ বহবো গুণা যস্মিন্দ্বিজোত্তমে
53.7
তেনাহং যোদ্ধুমিচ্ছামি মহাভাগেন সংয়ুগে
তস্মাত্ত্বং প্রাপয়াচার্যং ক্ষিপ্রমুত্তর বাহয়
53.8
বৈশংপায়ন উবাচ
অর্জুনেনৈবমুক্তস্তু বৈরাটির্হেমভূষিতান্
চোদয়ামাস তানশ্বান্ভারদ্বাজরথং প্রতি
53.9
তমাপতন্তং বেগেন পাণ্ডবং রথিনাং বরম্
দ্রোণঃ প্রত্যুদ্যয়ৌ পার্থং মত্তো মত্তমিব দ্বিপম্
53.10
ততঃ প্রাধ্মাপয়চ্ছঙ্খং ভেরীশতনিনাদিতম্
প্রচুক্ষুভে বলং সর্বমুদ্ধূত ইব সাগরঃ
53.11
অথ শোণান্সদশ্বাংস্তান্হংসবর্ণৈর্মনোজবৈঃ
মিশ্রিতান্সমরে দৃষ্ট্বা ব্যস্ময়ন্ত রণে জনাঃ
53.12
তৌ রথৌ বীর্যসংপন্নৌ দৃষ্ট্বা সংগ্রামমূর্ধনি
আচার্যশিষ্যাবজিতৌ কৃতবিদ্যৌ মনস্বিনৌ
53.13
সমাশ্লিষ্টৌ তদান্যোন্যং দ্রোণপার্থৌ মহাবলৌ
দৃষ্ট্বা প্রাকম্পত মুহুর্ভরতানাং মহদ্বলম্
53.14
হর্ষয়ুক্তস্তথা পার্থঃ প্রহসন্নিব বীর্যবান্
রথং রথেন দ্রোণস্য সমাসাদ্য মহারথঃ
53.15
অভিবাদ্য মহাবাহুঃ সান্ত্বপূর্বমিদং বচঃ
উবাচ শ্লক্ষ্ণয়া বাচা কৌন্তেয়ঃ পরবীরহা
53.16
উষিতাঃ স্ম বনে বাসং প্রতিকর্ম চিকীর্ষবঃ
কোপং নার্হসি নঃ কর্তুং সদা সমরদুর্জয়
53.17
অহং তু প্রহৃতে পূর্বং প্রহরিষ্যামি তেঽনঘ
ইতি মে বর্ততে বুদ্ধিস্তদ্ভবান্কর্তুমর্হতি
53.18
ততোঽস্মৈ প্রাহিণোদ্দ্রোণঃ শরানধিকবিংশতিম্
অপ্রাপ্তাংশ্চৈব তান্পার্থশ্চিচ্ছেদ কৃতহস্তবৎ
53.19
ততঃ শরসহস্রেণ রথং পার্থস্য বীর্যবান্
অবাকিরত্ততো দ্রোণঃ শীঘ্রমস্ত্রং বিদর্শয়ন্
53.20
এবং প্রববৃতে যুদ্ধং ভারদ্বাজকিরীটিনোঃ
সমং বিমুঞ্চতোঃ সংখ্যে বিশিখান্দীপ্ততেজসঃ
53.21
তাবুভৌ খ্যাতকর্মাণাবুভৌ বায়ুসমৌ জবে
উভৌ দিব্যাস্ত্রবিদুষাবুভাবুত্তমতেজসৌ
ক্ষিপন্তৌ শরজালানি মোহয়ামাসতুর্নৃপান্
53.22
ব্যস্ময়ন্ত ততো যোধাঃ সর্বে তত্র সমাগতাঃ
শরান্বিসৃজতোস্তূর্ণং সাধু সাধ্বিতি পূজয়ন্
53.23
দ্রোণং হি সমরে কোঽন্যো যোদ্ধুমর্হতি ফল্গুনাৎ
রৌদ্রঃ ক্ষত্রিয়ধর্মোঽয়ং গুরুণা যদয়ুধ্যত
ইত্যব্রুবঞ্জনাস্তত্র সংগ্রামশিরসি স্থিতাঃ
53.24
বীরৌ তাবপি সংরব্ধৌ সংনিকৃষ্টৌ মহারথৌ
ছাদয়েতাং শরব্রাতৈরন্যোন্যমপরাজিতৌ
53.25
বিস্ফার্য সুমহচ্চাপং হেমপৃষ্ঠং দুরাসদম্
সংরব্ধোঽথ ভরদ্বাজঃ ফল্গুনং প্রত্যয়ুধ্যত
53.26
স সায়কময়ৈর্জালৈরর্জুনস্য রথং প্রতি
ভানুমদ্ভিঃ শিলাধৌতৈর্ভানোঃ প্রচ্ছাদয়ত্প্রভাম্
53.27
পার্থং চ স মহাবাহুর্মহাবেগৈর্মহারথঃ
বিব্যাধ নিশিতৈর্বাণৈর্মেঘো বৃষ্ট্যেব পর্বতম্
53.28
তথৈব দিব্যং গাণ্ডীবং ধনুরাদায় পাণ্ডবঃ
শত্রুঘ্নং বেগবদ্ধৃষ্টো ভারসাধনমুত্তমম্
বিসসর্জ শরাংশ্চিত্রান্সুবর্ণবিকৃতান্বহূন্
53.29
নাশয়ঞ্শরবর্ষাণি ভারদ্বাজস্য বীর্যবান্
তূর্ণং চাপবিনির্মুক্তৈস্তদদ্ভুতমিবাভবৎ
53.30
স রথেন চরন্পার্থঃ প্রেক্ষণীয়ো ধনংজয়ঃ
যুগপদ্দিক্ষু সর্বাসু সর্বশস্ত্রাণ্যদর্শয়ৎ
53.31
একচ্ছায়মিবাকাশং বাণৈশ্চক্রে সমন্ততঃ
নাদৃশ্যত তদা দ্রোণো নীহারেণেব সংবৃতঃ
53.32
তস্যাভবত্তদা রূপং সংবৃতস্য শরোত্তমৈঃ
জাজ্বল্যমানস্য যথা পর্বতস্যেব সর্বতঃ
53.33
দৃষ্ট্বা তু পার্থস্য রণে শরৈঃ স্বরথমাবৃতম্
স বিস্ফার্য ধনুশ্চিত্রং মেঘস্তনিতনিস্বনম্
53.34
অগ্নিচক্রোপমং ঘোরং বিকর্ষন্পরমায়ুধম্
ব্যশাতয়চ্ছরাংস্তাংস্তু দ্রোণঃ সমিতিশোভনঃ
মহানভূত্ততঃ শব্দো বংশানামিব দহ্যতাম্
53.35
জাম্বূনদময়ৈঃ পুঙ্খৈশ্চিত্রচাপবরাতিগৈঃ
প্রাচ্ছাদয়দমেয়াত্মা দিশঃ সূর্যস্য চ প্রভাম্
53.36
ততঃ কনকপুঙ্খানাং শরাণাং নতপর্বণাম্
বিয়চ্চরাণাং বিয়তি দৃশ্যন্তে বহুশঃ প্রজাঃ
53.37
দ্রোণস্য পুঙ্খসক্তাশ্চ প্রভবন্তঃ শরাসনাৎ
একো দীর্ঘ ইবাদৃশ্যদাকাশে সংহতঃ শরঃ
53.38
এবং তৌ স্বর্ণবিকৃতান্বিমুঞ্চন্তৌ মহাশরান্
আকাশং সংবৃতং বীরাবুল্কাভিরিব চক্রতুঃ
53.39
শরাস্তয়োশ্চ বিবভুঃ কঙ্কবর্হিণবাসসঃ
পঙ্ক্ত্যঃ শরদি খস্থানাং হংসানাং চরতামিব
53.40
যুদ্ধং সমভবত্তত্র সুসংরব্ধং মহাত্মনোঃ
দ্রোণপাণ্ডবয়োর্ঘোরং বৃত্রবাসবয়োরিব
53.41
তৌ গজাবিব চাসাদ্য বিষাণাগ্রৈঃ পরস্পরম্
শরৈঃ পূর্ণায়তোত্সৃষ্টৈরন্যোন্যমভিজঘ্নতুঃ
53.42
তৌ ব্যবাহরতাং শূরৌ সংরব্ধৌ রণশোভিনৌ
উদীরয়ন্তৌ সমরে দিব্যান্যস্ত্রাণি ভাগশঃ
53.43
অথ ত্বাচার্যমুখ্যেন শরান্সৃষ্টাঞ্শিলাশিতান্
ন্যবারয়চ্ছিতৈর্বাণৈরর্জুনো জয়তাং বরঃ
53.44
দর্শয়ন্নৈন্দ্রিরাত্মানমুগ্রমুগ্রপরাক্রমঃ
ইষুভিস্তূর্ণমাকাশং বহুভিশ্চ সমাবৃণোৎ
53.45
জিঘাংসন্তং নরব্যাঘ্রমর্জুনং তিগ্মতেজসম্
আচার্যমুখ্যঃ সমরে দ্রোণঃ শস্ত্রভৃতাং বরঃ
অর্জুনেন সহাক্রীডচ্ছরৈঃ সংনতপর্বভিঃ
53.46
দিব্যান্যস্ত্রাণি মুঞ্চন্তং ভারদ্বাজং মহারণে
অস্ত্রৈরস্ত্রাণি সংবার্য ফল্গুনঃ সময়োধয়ৎ
53.47
তয়োরাসীত্সংপ্রহারঃ ক্রুদ্ধয়োর্নরসিংহয়োঃ
অমর্ষিণোস্তদান্যোন্যং দেবদানবয়োরিব
53.48
ঐন্দ্রং বায়ব্যমাগ্নেয়মস্ত্রমস্ত্রেণ পাণ্ডবঃ
দ্রোণেন মুক্তং মুক্তং তু গ্রসতে স্ম পুনঃ পুনঃ
53.49
এবং শূরৌ মহেষ্বাসৌ বিসৃজন্তৌ শিতাঞ্শরান্
একচ্ছায়ং চক্রতুস্তাবাকাশং শরবৃষ্টিভিঃ
53.50
ততোঽর্জুনেন মুক্তানাং পততাং চ শরীরিষু
পর্বতেষ্বিব বজ্রাণাং শরাণাং শ্রূয়তে স্বনঃ
53.51
ততো নাগা রথাশ্চৈব সাদিনশ্চ বিশাং পতে
শোণিতাক্তা ব্যদৃশ্যন্ত পুষ্পিতা ইব কিংশুকাঃ
53.52
বাহুভিশ্চ সকেয়ূরৈর্বিচিত্রৈশ্চ মহারথৈঃ
সুবর্ণচিত্রৈঃ কবচৈর্ধ্বজৈশ্চ বিনিপাতিতৈঃ
53.53
যোধৈশ্চ নিহতৈস্তত্র পার্থবাণপ্রপীডিতৈঃ
বলমাসীত্সমুদ্ভ্রান্তং দ্রোণার্জুনসমাগমে
53.54
বিধুন্বানৌ তু তৌ বীরৌ ধনুষী ভারসাধনে
আচ্ছাদয়েতামন্যোন্যং তিতক্ষন্তৌ রণেষুভিঃ
53.55
অথান্তরিক্ষে নাদোঽভূদ্দ্রোণং তত্র প্রশংসতাম্
দুষ্করং কৃতবান্দ্রোণো যদর্জুনময়োধয়ৎ
53.56
প্রমাথিনং মহাবীর্যং দৃঢমুষ্টিং দুরাসদম্
জেতারং দেবদৈত্যানাং সর্পাণাং চ মহারথম্
53.57
অবিশ্রমং চ শিক্ষাং চ লাঘবং দূরপাতিতাম্
পার্থস্য সমরে দৃষ্ট্বা দ্রোণস্যাভূচ্চ বিস্ময়ঃ
53.58
অথ গাণ্ডীবমুদ্যম্য দিব্যং ধনুরমর্ষণঃ
বিচকর্ষ রণে পার্থো বাহুভ্যাং ভরতর্ষভ
53.59
তস্য বাণময়ং বর্ষং শলভানামিবায়তম্
ন চ বাণান্তরে বায়ুরস্য শক্নোতি সর্পিতুম্
53.60
অনিশং সংদধানস্য শরানুত্সৃজতস্তদা
দদৃশে নান্তরং কিংচিত্পার্থস্যাদদতোঽপি চ
53.61
তথা শীঘ্রাস্ত্রয়ুদ্ধে তু বর্তমানে সুদারুণে
শীঘ্রাচ্ছীঘ্রতরং পার্থঃ শরানন্যানুদীরয়ৎ
53.62
ততঃ শতসহস্রাণি শরাণাং নতপর্বণাম্
যুগপত্প্রাপতংস্তত্র দ্রোণস্য রথমন্তিকাৎ
53.63
অবকীর্যমাণে দ্রোণে তু শরৈর্গাণ্ডীবধন্বনা
হাহাকারো মহানাসীত্সৈন্যানাং ভরতর্ষভ
53.64
পাণ্ডবস্য তু শীঘ্রাস্ত্রং মঘবান্সমপূজয়ৎ
গন্ধর্বাপ্সরসশ্চৈব যে চ তত্র সমাগতাঃ
53.65
ততো বৃন্দেন মহতা রথানাং রথয়ূথপঃ
আচার্যপুত্রঃ সহসা পাণ্ডবং প্রত্যবারয়ৎ
53.66
অশ্বত্থামা তু তত্কর্ম হৃদয়েন মহাত্মনঃ
পূজয়ামাস পার্থস্য কোপং চাস্যাকরোদ্ভৃশম্
53.67
স মন্যুবশমাপন্নঃ পার্থমভ্যদ্রবদ্রণে
কিরঞ্শরসহস্রাণি পর্জন্য ইব বৃষ্টিমান্
53.68
আবৃত্য তু মহাবাহুর্যতো দ্রৌণিস্ততো হয়ান্
অন্তরং প্রদদৌ পার্থো দ্রোণস্য ব্যপসর্পিতুম্
53.69
স তু লব্ধ্বান্তরং তূর্ণমপায়াজ্জবনৈর্হয়ৈঃ
ছিন্নবর্মধ্বজঃ শূরো নিকৃত্তঃ পরমেষুভিঃ