অধ্যায় 54

54.1

বৈশংপায়ন উবাচ
তং পার্থঃ প্রতিজগ্রাহ বায়ুবেগমিবোদ্ধতম্
শরজালেন মহতা বর্ষমাণমিবাম্বুদম্

তয়োর্দেবাসুরসমঃ সংনিপাতো মহানভূৎ
কিরতোঃ শরজালানি বৃত্রবাসবয়োরিব

ন স্ম সূর্যস্তদা ভাতি ন চ বাতি সমীরণঃ
শরগাঢে কৃতে ব্যোম্নি ছায়াভূতে সমন্ততঃ

মহাংশ্চটচটাশব্দো যোধয়োর্হন্যমানয়োঃ
দহ্যতামিব বেণূনামাসীত্পরপুরংজয়

হয়ানস্যার্জুনঃ সর্বান্কৃতবানল্পজীবিতান্
স রাজন্ন প্রজানাতি দিশং কাংচন মোহিতঃ

ততো দ্রৌণির্মহাবীর্যঃ পার্থস্য বিচরিষ্যতঃ
বিবরং সূক্ষ্মমালোক্য জ্যাং চিচ্ছেদ ক্ষুরেণ হ
তদস্যাপূজয়ন্দেবাঃ কর্ম দৃষ্ট্বাতিমানুষম্

ততো দ্রৌণির্ধনূংষ্যষ্টৌ ব্যপক্রম্য নরর্ষভম্
পুনরভ্যাহনত্পার্থং হৃদয়ে কঙ্কপত্রিভিঃ

ততঃ পার্থো মহাবাহুঃ প্রহস্য স্বনবত্তদা
যোজয়ামাস নবয়া মৌর্ব্যা গাণ্ডীবমোজসা

ততোঽর্ধচন্দ্রমাবৃত্য তেন পার্থঃ সমাগমৎ
বারণেনেব মত্তেন মত্তো বারণয়ূথপঃ

ততঃ প্রববৃতে যুদ্ধং পৃথিব্যামেকবীরয়োঃ
রণমধ্যে দ্বয়োরেব সুমহল্লোমহর্ষণম্

তৌ বীরৌ কুরবঃ সর্বে দদৃশুর্বিস্ময়ান্বিতাঃ
যুধ্যমানৌ মহাত্মানৌ যূথপাবিব সংগতৌ

তৌ সমাজঘ্নতুর্বীরাবন্যোন্যং পুরুষর্ষভৌ
শরৈরাশীবিষাকারৈর্জ্বলদ্ভিরিব পন্নগৈঃ

অক্ষয্যাবিষুধী দিব্যৌ পাণ্ডবস্য মহাত্মনঃ
তেন পার্থো রণে শূরস্তস্থৌ গিরিরিবাচলঃ

অশ্বত্থাম্নঃ পুনর্বাণাঃ ক্ষিপ্রমভ্যস্যতো রণে
জগ্মুঃ পরিক্ষয়ং শীঘ্রমভূত্তেনাধিকোঽর্জুনঃ

ততঃ কর্ণো মহচ্চাপং বিকৃষ্যাভ্যধিকং রুষা
অবাক্ষিপত্ততঃ শব্দো হাহাকারো মহানভূৎ

তত্র চক্ষুর্দধে পার্থো যত্র বিস্ফার্যতে ধনুঃ
দদর্শ তত্র রাধেয়ং তস্য কোপোঽত্যবীবৃধৎ

স রোষবশমাপন্নঃ কর্ণমেব জিঘাংসয়া
অবৈক্ষত বিবৃত্তাভ্যাং নেত্রাভ্যাং কুরুপুংগবঃ

তথা তু বিমুখে পার্থে দ্রোণপুত্রস্য সায়কান্
ত্বরিতাঃ পুরুষা রাজন্নুপাজহ্রুঃ সহস্রশঃ

উত্সৃজ্য চ মহাবাহুর্দ্রোণপুত্রং ধনংজয়ঃ
অভিদুদ্রাব সহসা কর্ণমেব সপত্নজিৎ

তমভিদ্রুত্য কৌন্তেয়ঃ ক্রোধসংরক্তলোচনঃ
কাময়ন্দ্বৈরথে যুদ্ধমিদং বচনমব্রবীৎ