Utshovঅধ্যায় 55
55.1
অর্জুন উবাচ
কর্ণ যত্তে সভামধ্যে বহু বাচা বিকত্থিতম্
ন মে যুধি সমোঽস্তীতি তদিদং প্রত্যুপস্থিতম্
55.2
অবোচঃ পরুষা বাচো ধর্মমুত্সৃজ্য কেবলম্
ইদং তু দুষ্করং মন্যে যদিদং তে চিকীর্ষিতম্
55.3
যত্ত্বয়া কথিতং পূর্বং মামনাসাদ্য কিংচন
তদদ্য কুরু রাধেয় কুরুমধ্যে ময়া সহ
55.4
যত্সভায়াং স্ম পাঞ্চালীং ক্লিশ্যমানাং দুরাত্মভিঃ
দৃষ্টবানসি তস্যাদ্য ফলমাপ্নুহি কেবলম্
55.5
ধর্মপাশনিবদ্ধেন যন্ময়া মর্ষিতং পুরা
তস্য রাধেয় কোপস্য বিজয়ং পশ্য মে মৃধে
55.6
এহি কর্ণ ময়া সার্ধং প্রতিপদ্যস্ব সংগরম্
প্রেক্ষকাঃ কুরবঃ সর্বে ভবন্তু সহসৈনিকাঃ
55.7
কর্ণ উবাচ
ব্রবীষি বাচা যত্পার্থ কর্মণা তত্সমাচর
অতিশেতে হি বৈ বাচং কর্মেতি প্রথিতং ভুবি
55.8
যত্ত্বয়া মর্ষিতং পূর্বং তদশক্তেন মর্ষিতম্
ইতি গৃহ্ণামি তত্পার্থ তব দৃষ্ট্বাপরাক্রমম্
55.9
ধর্মপাশনিবদ্ধেন যদি তে মর্ষিতং পুরা
তথৈব বদ্ধমাত্মানমবদ্ধমিব মন্যসে
55.10
যদি তাবদ্বনে বাসো যথোক্তশ্চরিতস্ত্বয়া
তত্ত্বং ধর্মার্থবিত্ক্লিষ্টঃ সময়ং ভেত্তুমিচ্ছসি
55.11
যদি শক্রঃ স্বয়ং পার্থ যুধ্যতে তব কারণাৎ
তথাপি ন ব্যথা কাচিন্মম স্যাদ্বিক্রমিষ্যতঃ
55.12
অয়ং কৌন্তেয় কামস্তে নচিরাত্সমুপস্থিতঃ
যোত্স্যসে ত্বং ময়া সার্ধমদ্য দ্রক্ষ্যসি মে বলম্
55.13
অর্জুন উবাচ
ইদানীমেব তাবত্ত্বমপয়াতো রণান্মম
তেন জীবসি রাধেয় নিহতস্ত্বনুজস্তব
55.14
ভ্রাতরং ঘাতয়িত্বা চ ত্যক্ত্বা রণশিরশ্চ কঃ
ত্বদন্যঃ পুরুষঃ সত্সু ব্রূয়াদেবং ব্যবস্থিতঃ
55.15
বৈশংপায়ন উবাচ
ইতি কর্ণং ব্রুবন্নেব বীভত্সুরপরাজিতঃ
অভ্যয়াদ্বিসৃজন্বাণান্কায়াবরণভেদিনঃ
55.16
প্রতিজগ্রাহ তান্কর্ণঃ শরানগ্নিশিখোপমান্
শরবর্ষেণ মহতা বর্ষমাণ ইবাম্বুদঃ
55.17
উত্পেতুঃ শরজালানি ঘোররূপাণি সর্বশঃ
অবিধ্যদশ্বান্বাহ্বোশ্চ হস্তাবাপং পৃথক্পৃথক্
55.18
সোঽমৃষ্যমাণঃ কর্ণস্য নিষঙ্গস্যাবলম্বনম্
চিচ্ছেদ নিশিতাগ্রেণ শরেণ নতপর্বণা
55.19
উপাসঙ্গাদুপাদায় কর্ণো বাণানথাপরান্
বিব্যাধ পাণ্ডবং হস্তে তস্য মুষ্টিরশীর্যত
55.20
ততঃ পার্থো মহাবাহুঃ কর্ণস্য ধনুরচ্ছিনৎ
স শক্তিং প্রাহিণোত্তস্মৈ তাং পার্থো ব্যধমচ্ছরৈঃ
55.21
ততোঽভিপেতুর্বহবো রাধেয়স্য পদানুগাঃ
তাংশ্চ গাণ্ডীবনির্মুক্তৈঃ প্রাহিণোদ্যমসাদনম্
55.22
ততোঽস্যাশ্বাঞ্শরৈস্তীক্ষ্ণৈর্বীভত্সুর্ভারসাধনৈঃ
আকর্ণমুক্তৈরভ্যঘ্নংস্তে হতাঃ প্রাপতন্ভুবি
55.23
অথাপরেণ বাণেন জ্বলিতেন মহাভুজঃ
বিব্যাধ কর্ণং কৌন্তেয়স্তীক্ষ্ণেনোরসি বীর্যবান্
55.24
তস্য ভিত্ত্বা তনুত্রাণং কায়মভ্যপতচ্ছরঃ
ততঃ স তমসাবিষ্টো ন স্ম কিংচিত্প্রজজ্ঞিবান্
55.25
স গাঢবেদনো হিত্বা রণং প্রায়াদুদঙ্মুখঃ
ততোঽর্জুন উপাক্রোশদুত্তরশ্চ মহারথঃ