অধ্যায় 56

56.1

বৈশংপায়ন উবাচ
ততো বৈকর্তনং জিত্বা পার্থো বৈরাটিমব্রবীৎ
এতন্মাং প্রাপয়ানীকং যত্র তালো হিরণ্ময়ঃ

56.2

অত্র শাংতনবো ভীষ্মো রথেঽস্মাকং পিতামহঃ
কাঙ্ক্ষমাণো ময়া যুদ্ধং তিষ্ঠত্যমরদর্শনঃ
আদাস্যাম্যহমেতস্য ধনুর্জ্যামপি চাহবে

56.3

অস্যন্তং দিব্যমস্ত্রং মাং চিত্রমদ্য নিশাময়
শতহ্রদামিবায়ান্তীং স্তনয়িত্নোরিবাম্বরে

56.4

সুবর্ণপৃষ্ঠং গাণ্ডীবং দ্রক্ষ্যন্তি কুরবো মম
দক্ষিণেনাথ বামেন কতরেণ স্বিদস্যতি
ইতি মাং সংগতাঃ সর্বে তর্কয়িষ্যন্তি শত্রবঃ

56.5

শোণিতোদাং রথাবর্তাং নাগনক্রাং দুরত্যয়াম্
নদীং প্রস্যন্দয়িষ্যামি পরলোকপ্রবাহিনীম্

56.6

পাণিপাদশিরঃপৃষ্ঠবাহুশাখানিরন্তরম্
বনং কুরূণাং ছেত্স্যামি ভল্লৈঃ সংনতপর্বভিঃ

56.7

জয়তঃ কৌরবীং সেনামেকস্য মম ধন্বিনঃ
শতং মার্গা ভবিষ্যন্তি পাবকস্যেব কাননে
ময়া চক্রমিবাবিদ্ধং সৈন্যং দ্রক্ষ্যসি কেবলম্

56.8

অসংভ্রান্তো রথে তিষ্ঠ সমেষু বিষমেষু চ
দিবমাবৃত্য তিষ্ঠন্তং গিরিং ভেত্স্যামি ধারিভিঃ

56.9

অহমিন্দ্রস্য বচনাত্সংগ্রামেঽভ্যহনং পুরা
পৌলোমান্কালখঞ্জাংশ্চ সহস্রাণি শতানি চ

56.10

অহমিন্দ্রাদ্দৃঢাং মুষ্টিং ব্রহ্মণঃ কৃতহস্ততাম্
প্রগাঢং তুমুলং চিত্রমতিবিদ্ধং প্রজাপতেঃ

56.11

অহং পারে সমুদ্রস্য হিরণ্যপুরমারুজম্
জিত্বা ষষ্টিসহস্রাণি রথিনামুগ্রধন্বিনাম্

56.12

ধ্বজবৃক্ষং পত্তিতৃণং রথসিংহগণায়ুতম্
বনমাদীপয়িষ্যামি কুরূণামস্ত্রতেজসা

56.13

তানহং রথনীডেভ্যঃ শরৈঃ সংনতপর্বভিঃ
একঃ সংকালয়িষ্যামি বজ্রপাণিরিবাসুরান্

56.14

রৌদ্রং রুদ্রাদহং হ্যস্ত্রং বারুণং বরুণাদপি
অস্ত্রমাগ্নেয়মগ্নেশ্চ বায়ব্যং মাতরিশ্বনঃ
বজ্রাদীনি তথাস্ত্রাণি শক্রাদহমবাপ্তবান্

56.15

ধার্তরাষ্ট্রবনং ঘোরং নরসিংহাভিরক্ষিতম্
অহমুত্পাটয়িষ্যামি বৈরাটে ব্যেতু তে ভয়ম্

56.16

এবমাশ্বাসিতস্তেন বৈরাটিঃ সব্যসাচিনা
ব্যগাহত রথানীকং ভীমং ভীষ্মস্য ধীমতঃ

56.17

তমায়ান্তং মহাবাহুং জিগীষন্তং রণে পরান্
অভ্যবারয়দব্যগ্রঃ ক্রূরকর্মা ধনংজয়ম্

56.18

তং চিত্রমাল্যাভরণাঃ কৃতবিদ্যা মনস্বিনঃ
আগচ্ছন্ভীমধন্বানং মৌর্বীং পর্যস্য বাহুভিঃ

56.19

দুঃশাসনো বিকর্ণশ্চ দুঃসহোঽথ বিবিংশতিঃ
আগত্য ভীমধন্বানং বীভত্সুং পর্যবারয়ন্

56.20

দুঃশাসনস্তু ভল্লেন বিদ্ধ্বা বৈরাটিমুত্তরম্
দ্বিতীয়েনার্জুনং বীরঃ প্রত্যবিধ্যত্স্তনান্তরে

56.21

তস্য জিষ্ণুরুপাবৃত্য পৃথুধারেণ কার্মুকম্
চকর্ত গার্ধ্রপত্রেণ জাতরূপপরিষ্কৃতম্

56.22

অথৈনং পঞ্চভিঃ পশ্চাত্প্রত্যবিধ্যত্স্তনান্তরে
সোঽপয়াতো রণং হিত্বা পার্থবাণপ্রপীডিতঃ

56.23

তং বিকর্ণঃ শরৈস্তীক্ষ্ণৈর্গার্ধ্রপত্রৈরজিহ্মগৈঃ
বিব্যাধ পরবীরঘ্নমর্জুনং ধৃতরাষ্ট্রজঃ

56.24

ততস্তমপি কৌন্তেয়ঃ শরেণানতপর্বণা
ললাটেঽভ্যহনত্তূর্ণং স বিদ্ধঃ প্রাপতদ্রথাৎ

56.25

ততঃ পার্থমভিদ্রুত্য দুঃসহঃ সবিবিংশতিঃ
অবাকিরচ্ছরৈস্তীক্ষ্ণৈঃ পরীপ্সন্ভ্রাতরং রণে

56.26

তাবুভৌ গার্ধ্রপত্রাভ্যাং নিশিতাভ্যাং ধনংজয়ঃ
বিদ্ধ্বা যুগপদব্যগ্রস্তয়োর্বাহানসূদয়ৎ

56.27

তৌ হতাশ্বৌ বিবিদ্ধাঙ্গৌ ধৃতরাষ্ট্রাত্মজাবুভৌ
অভিপত্য রথৈরন্যৈরপনীতৌ পদানুগৈঃ

56.28

সর্বা দিশশ্চাভ্যপতদ্বীভত্সুরপরাজিতঃ
কিরীটমালী কৌন্তেয়ো লব্ধলক্ষো মহাবলঃ

Contains text from DharmicData, made available under the Open Database License (ODbL). Simple meanings are written by AI and can contain mistakes.