অধ্যায় 57

57.1

বৈশংপায়ন উবাচ
অথ সংগম্য সর্বে তু কৌরবাণাং মহারথাঃ
অর্জুনং সহিতা যত্তাঃ প্রত্যয়ুধ্যন্ত ভারত

স সায়কময়ৈর্জালৈঃ সর্বতস্তান্মহারথান্
প্রাচ্ছাদয়দমেয়াত্মা নীহার ইব পর্বতান্

নদদ্ভিশ্চ মহানাগৈর্হেষমাণৈশ্চ বাজিভিঃ
ভেরীশঙ্খনিনাদৈশ্চ স শব্দস্তুমুলোঽভবৎ

নরাশ্বকায়ান্নির্ভিদ্য লোহানি কবচানি চ
পার্থস্য শরজালানি বিনিষ্পেতুঃ সহস্রশঃ

ত্বরমাণঃ শরানস্যন্পাণ্ডবঃ স বভৌ রণে
মধ্যংদিনগতোঽর্চিষ্মাঞ্শরদীব দিবাকরঃ

উপপ্লবন্ত বিত্রস্তা রথেভ্যো রথিনস্তদা
সাদিনশ্চাশ্বপৃষ্ঠেভ্যো ভূমৌ চাপি পদাতয়ঃ

শরৈঃ সংতাড্যমানানাং কবচানাং মহাত্মনাম্
তাম্ররাজতলোহানাং প্রাদুরাসীন্মহাস্বনঃ

ছন্নমায়োধনং সর্বং শরীরৈর্গতচেতসাম্
গজাশ্বসাদিভিস্তত্র শিতবাণাত্তজীবিতৈঃ

রথোপস্থাভিপতিতৈরাস্তৃতা মানবৈর্মহী
প্রনৃত্যদিব সংগ্রামে চাপহস্তো ধনংজয়ঃ

শ্রুত্বা গাণ্ডীবনির্ঘোষং বিস্ফূর্জিতমিবাশনেঃ
ত্রস্তানি সর্বভূতানি ব্যগচ্ছন্ত মহাহবাৎ

কুণ্ডলোষ্ণীষধারীণি জাতরূপস্রজানি চ
পতিতানি স্ম দৃশ্যন্তে শিরাংসি রণমূর্ধনি

বিশিখোন্মথিতৈর্গাত্রৈর্বাহুভিশ্চ সকার্মুকৈঃ
সহস্তাভরণৈশ্চান্যৈঃ প্রচ্ছন্না ভাতি মেদিনী

শিরসাং পাত্যমানানামন্তরা নিশিতৈঃ শরৈঃ
অশ্মবৃষ্টিরিবাকাশাদভবদ্ভরতর্ষভ

দর্শয়িত্বা তথাত্মানং রৌদ্রং রুদ্রপরাক্রমঃ
অবরুদ্ধশ্চরন্পার্থো দশবর্ষাণি ত্রীণি চ
ক্রোধাগ্নিমুত্সৃজদ্ঘোরং ধার্তরাষ্ট্রেষু পাণ্ডবঃ

তস্য তদ্দহতঃ সৈন্যং দৃষ্ট্বা চৈব পরাক্রমম্
সর্বে শান্তিপরা যোধা ধার্তরাষ্ট্রস্য পশ্যতঃ

বিত্রাসয়িত্বা তত্সৈন্যং দ্রাবয়িত্বা মহারথান্
অর্জুনো জয়তাং শ্রেষ্ঠঃ পর্যবর্তত ভারত

প্রাবর্তয়ন্নদীং ঘোরাং শোণিতৌঘতরঙ্গিণীম্
অস্থিশৈবলসংবাধাং যুগান্তে কালনির্মিতাম্

শরচাপপ্লবাং ঘোরাং মাংসশোণিতকর্দমাম্
মহারথমহাদ্বীপাং শঙ্খদুন্দুভিনিস্বনাম্
চকার মহতীং পার্থো নদীমুত্তরশোণিতাম্

আদদানস্য হি শরান্সংধায় চ বিমুঞ্চতঃ
বিকর্ষতশ্চ গাণ্ডীবং ন কিংচিদ্দৃশ্যতেঽন্তরম্