অধ্যায় 58

58.1

বৈশংপায়ন উবাচ
অথ দুর্যোধনঃ কর্ণো দুঃশাসনবিবিংশতী
দ্রোণশ্চ সহ পুত্রেণ কৃপশ্চাতিরথো রণে

পুনরীয়ুঃ সুসংরব্ধা ধনংজয়জিঘাংসয়া
বিস্ফারয়ন্তশ্চাপানি বলবন্তি দৃঢানি চ

তান্প্রকীর্ণপতাকেন রথেনাদিত্যবর্চসা
প্রত্যুদ্যয়ৌ মহারাজ সমস্তান্বানরধ্বজঃ

ততঃ কৃপশ্চ কর্ণশ্চ দ্রোণশ্চ রথিনাং বরঃ
তং মহাস্ত্রৈর্মহাবীর্যং পরিবার্য ধনংজয়ম্

শরৌঘান্সম্যগস্যন্তো জীমূতা ইব বার্ষিকাঃ
ববর্ষুঃ শরবর্ষাণি প্রপতন্তং কিরীটিনম্

ইষুভির্বহুভিস্তূর্ণং সমরে লোমবাহিভিঃ
অদূরাত্পর্যবস্থায় পূরয়ামাসুরাদৃতাঃ

তথাবকীর্ণস্য হি তৈর্দিব্যৈরস্ত্রৈঃ সমন্ততঃ
ন তস্য দ্ব্যঙ্গুলমপি বিবৃতং সমদৃশ্যত

ততঃ প্রহস্য বীভত্সুর্দিব্যমৈন্দ্রং মহারথঃ
অস্ত্রমাদিত্যসংকাশং গাণ্ডীবে সময়োজয়ৎ

স রশ্মিভিরিবাদিত্যঃ প্রতপন্সমরে বলী
কিরীটমালী কৌন্তেয়ঃ সর্বান্প্রাচ্ছাদয়ত্কুরূন্

যথা বলাহকে বিদ্যুত্পাবকো বা শিলোচ্চয়ে
তথা গাণ্ডীবমভবদিন্দ্রায়ুধমিবাততম্

যথা বর্ষতি পর্জন্যে বিদ্যুদ্বিভ্রাজতে দিবি
তথা দশ দিশঃ সর্বাঃ পতদ্গাণ্ডীবমাবৃণোৎ

ত্রস্তাশ্চ রথিনঃ সর্বে বভূবুস্তত্র সর্বশঃ
সর্বে শান্তিপরা ভূত্বা স্বচিত্তানি ন লেভিরে
সংগ্রামবিমুখাঃ সর্বে যোধাস্তে হতচেতসঃ

এবং সর্বাণি সৈন্যানি ভগ্নানি ভরতর্ষভ
প্রাদ্রবন্ত দিশঃ সর্বা নিরাশানি স্বজীবিতে