Chapter 58

58.1

वैशंपायन उवाच
अथ दुर्योधनः कर्णो दुःशासनविविंशती
द्रोणश्च सह पुत्रेण कृपश्चातिरथो रणे

Vaishampayana uvacha
Atha duryodhanah karno duhshasanavivinshati
Dronashcha saha putrena kripashchatiratho rane

पुनरीयुः सुसंरब्धा धनंजयजिघांसया
विस्फारयन्तश्चापानि बलवन्ति दृढानि च

Punariyuh susanrabdha dhananjayajighansaya
Vispharayantashchapani balavanti dridhani cha

तान्प्रकीर्णपताकेन रथेनादित्यवर्चसा
प्रत्युद्ययौ महाराज समस्तान्वानरध्वजः

Tanprakirnapatakena rathenadityavarchasa
Pratyudyayau maharaja samastanvanaradhvajah

ततः कृपश्च कर्णश्च द्रोणश्च रथिनां वरः
तं महास्त्रैर्महावीर्यं परिवार्य धनंजयम्

Tatah kripashcha karnashcha dronashcha rathinam varah
Tam mahastrairmahaviryam parivarya dhananjayam

शरौघान्सम्यगस्यन्तो जीमूता इव वार्षिकाः
ववर्षुः शरवर्षाणि प्रपतन्तं किरीटिनम्

Sharaughansamyagasyanto jimuta iva varshikah
Vavarshuh sharavarshani prapatantam kiritinam

इषुभिर्बहुभिस्तूर्णं समरे लोमवाहिभिः
अदूरात्पर्यवस्थाय पूरयामासुरादृताः

Ishubhirbahubhisturnam samare lomavahibhih
Aduratparyavasthaya purayamasuradritah

तथावकीर्णस्य हि तैर्दिव्यैरस्त्रैः समन्ततः
न तस्य द्व्यङ्गुलमपि विवृतं समदृश्यत

Tathavakirnasya hi tairdivyairastraih samantatah
Na tasya dvyangulamapi vivritam samadrishyata

ततः प्रहस्य बीभत्सुर्दिव्यमैन्द्रं महारथः
अस्त्रमादित्यसंकाशं गाण्डीवे समयोजयत्

Tatah prahasya bibhatsurdivyamaindram maharathah
Astramadityasankasham gandive samayojayat

स रश्मिभिरिवादित्यः प्रतपन्समरे बली
किरीटमाली कौन्तेयः सर्वान्प्राच्छादयत्कुरून्

Sa rashmibhirivadityah pratapansamare bali
Kiritamali kaunteyah sarvanprachchhadayatkurun

यथा बलाहके विद्युत्पावको वा शिलोच्चये
तथा गाण्डीवमभवदिन्द्रायुधमिवाततम्

Yatha balahake vidyutpavako va shilochchaye
Tatha gandivamabhavadindrayudhamivatatam

यथा वर्षति पर्जन्ये विद्युद्विभ्राजते दिवि
तथा दश दिशः सर्वाः पतद्गाण्डीवमावृणोत्

Yatha varshati parjanye vidyudvibhrajate divi
Tatha dasha dishah sarvah patadgandivamavrinot

त्रस्ताश्च रथिनः सर्वे बभूवुस्तत्र सर्वशः
सर्वे शान्तिपरा भूत्वा स्वचित्तानि न लेभिरे
संग्रामविमुखाः सर्वे योधास्ते हतचेतसः

Trastashcha rathinah sarve babhuvustatra sarvashah
Sarve shantipara bhutva svachittani na lebhire
Sangramavimukhah sarve yodhaste hatachetasah

एवं सर्वाणि सैन्यानि भग्नानि भरतर्षभ
प्राद्रवन्त दिशः सर्वा निराशानि स्वजीविते

Evam sarvani sainyani bhagnani bharatarshabha
Pradravanta dishah sarva nirashani svajivite