UtshovChapter 57
57.1
वैशंपायन उवाच
अथ संगम्य सर्वे तु कौरवाणां महारथाः
अर्जुनं सहिता यत्ताः प्रत्ययुध्यन्त भारत
Vaishampayana uvacha
Atha sangamya sarve tu kauravanam maharathah
Arjunam sahita yattah pratyayudhyanta bharata
57.2
स सायकमयैर्जालैः सर्वतस्तान्महारथान्
प्राच्छादयदमेयात्मा नीहार इव पर्वतान्
Sa sayakamayairjalaih sarvatastanmaharathan
Prachchhadayadameyatma nihara iva parvatan
57.3
नदद्भिश्च महानागैर्हेषमाणैश्च वाजिभिः
भेरीशङ्खनिनादैश्च स शब्दस्तुमुलोऽभवत्
Nadadbhishcha mahanagairheshamanaishcha vajibhih
Bherishankhaninadaishcha sa shabdastumulobhavat
57.4
नराश्वकायान्निर्भिद्य लोहानि कवचानि च
पार्थस्य शरजालानि विनिष्पेतुः सहस्रशः
Narashvakayannirbhidya lohani kavachani cha
Parthasya sharajalani vinishpetuh sahasrashah
57.5
त्वरमाणः शरानस्यन्पाण्डवः स बभौ रणे
मध्यंदिनगतोऽर्चिष्माञ्शरदीव दिवाकरः
Tvaramanah sharanasyanpandavah sa babhau rane
Madhyandinagatorchishmansharadiva divakarah
57.6
उपप्लवन्त वित्रस्ता रथेभ्यो रथिनस्तदा
सादिनश्चाश्वपृष्ठेभ्यो भूमौ चापि पदातयः
Upaplavanta vitrasta rathebhyo rathinastada
Sadinashchashvaprishthebhyo bhumau chapi padatayah
57.7
शरैः संताड्यमानानां कवचानां महात्मनाम्
ताम्रराजतलोहानां प्रादुरासीन्महास्वनः
Sharaih santadyamananam kavachanam mahatmanam
Tamrarajatalohanam pradurasinmahasvanah
57.8
छन्नमायोधनं सर्वं शरीरैर्गतचेतसाम्
गजाश्वसादिभिस्तत्र शितबाणात्तजीवितैः
Chhannamayodhanam sarvam sharirairgatachetasam
Gajashvasadibhistatra shitabanattajivitaih
57.9
रथोपस्थाभिपतितैरास्तृता मानवैर्मही
प्रनृत्यदिव संग्रामे चापहस्तो धनंजयः
Rathopasthabhipatitairastrita manavairmahi
Pranrityadiva sangrame chapahasto dhananjayah
57.10
श्रुत्वा गाण्डीवनिर्घोषं विस्फूर्जितमिवाशनेः
त्रस्तानि सर्वभूतानि व्यगच्छन्त महाहवात्
Shrutva gandivanirghosham visphurjitamivashaneh
Trastani sarvabhutani vyagachchhanta mahahavat
57.11
कुण्डलोष्णीषधारीणि जातरूपस्रजानि च
पतितानि स्म दृश्यन्ते शिरांसि रणमूर्धनि
Kundaloshnishadharini jatarupasrajani cha
Patitani sma drishyante shiransi ranamurdhani
57.12
विशिखोन्मथितैर्गात्रैर्बाहुभिश्च सकार्मुकैः
सहस्ताभरणैश्चान्यैः प्रच्छन्ना भाति मेदिनी
Vishikhonmathitairgatrairbahubhishcha sakarmukaih
Sahastabharanaishchanyaih prachchhanna bhati medini
57.13
शिरसां पात्यमानानामन्तरा निशितैः शरैः
अश्मवृष्टिरिवाकाशादभवद्भरतर्षभ
Shirasam patyamananamantara nishitaih sharaih
Ashmavrishtirivakashadabhavadbharatarshabha
57.14
दर्शयित्वा तथात्मानं रौद्रं रुद्रपराक्रमः
अवरुद्धश्चरन्पार्थो दशवर्षाणि त्रीणि च
क्रोधाग्निमुत्सृजद्घोरं धार्तराष्ट्रेषु पाण्डवः
Darshayitva tathatmanam raudram rudraparakramah
Avaruddhashcharanpartho dashavarshani trini cha
Krodhagnimutsrijadghoram dhartarashtreshu pandavah
57.15
तस्य तद्दहतः सैन्यं दृष्ट्वा चैव पराक्रमम्
सर्वे शान्तिपरा योधा धार्तराष्ट्रस्य पश्यतः
Tasya taddahatah sainyam drishtva chaiva parakramam
Sarve shantipara yodha dhartarashtrasya pashyatah
57.16
वित्रासयित्वा तत्सैन्यं द्रावयित्वा महारथान्
अर्जुनो जयतां श्रेष्ठः पर्यवर्तत भारत
Vitrasayitva tatsainyam dravayitva maharathan
Arjuno jayatam shreshthah paryavartata bharata
57.17
प्रावर्तयन्नदीं घोरां शोणितौघतरङ्गिणीम्
अस्थिशैवलसंबाधां युगान्ते कालनिर्मिताम्
Pravartayannadim ghoram shonitaughataranginim
Asthishaivalasambadham yugante kalanirmitam
57.18
शरचापप्लवां घोरां मांसशोणितकर्दमाम्
महारथमहाद्वीपां शङ्खदुन्दुभिनिस्वनाम्
चकार महतीं पार्थो नदीमुत्तरशोणिताम्
Sharachapaplavam ghoram mansashonitakardamam
Maharathamahadvipam shankhadundubhinisvanam
Chakara mahatim partho nadimuttarashonitam
57.19
आददानस्य हि शरान्संधाय च विमुञ्चतः
विकर्षतश्च गाण्डीवं न किंचिद्दृश्यतेऽन्तरम्
Adadanasya hi sharansandhaya cha vimunchatah
Vikarshatashcha gandivam na kinchiddrishyatentaram