Utshovঅধ্যায় 59
59.1
বৈশংপায়ন উবাচ
ততঃ শাংতনবো ভীষ্মো দুরাধর্ষঃ প্রতাপবান্
বধ্যমানেষু যোধেষু ধনংজয়মুপাদ্রবৎ
59.2
প্রগৃহ্য কার্মুকশ্রেষ্ঠং জাতরূপপরিষ্কৃতম্
শরানাদায় তীক্ষ্ণাগ্রান্মর্মভেদপ্রমাথিনঃ
59.3
পাণ্ডুরেণাতপত্রেণ ধ্রিয়মাণেন মূর্ধনি
শুশুভে স নরব্যাঘ্রো গিরিঃ সূর্যোদয়ে যথা
59.4
প্রধ্মায় শঙ্খং গাঙ্গেয়ো ধার্তরাষ্ট্রান্প্রহর্ষয়ন্
প্রদক্ষিণমুপাবৃত্য বীভত্সুং সমবারয়ৎ
59.5
তমুদ্বীক্ষ্য তথায়ান্তং কৌন্তেয়ঃ পরবীরহা
প্রত্যগৃহ্ণাত্প্রহৃষ্টাত্মা ধারাধরমিবাচলঃ
59.6
ততো ভীষ্মঃ শরানষ্টৌ ধ্বজে পার্থস্য বীর্যবান্
সমপর্যন্মহাবেগাঞ্শ্বসমানানিবোরগান্
59.7
তে ধ্বজং পাণ্ডুপুত্রস্য সমাসাদ্য পতত্রিণঃ
জ্বলন্তঃ কপিমাজঘ্নুর্ধ্বজাগ্রনিলয়াংশ্চ তান্
59.8
ততো ভল্লেন মহতা পৃথুধারেণ পাণ্ডবঃ
ছত্রং চিচ্ছেদ ভীষ্মস্য তূর্ণং তদপতদ্ভুবি
59.9
ধ্বজং চৈবাস্য কৌন্তেয়ঃ শরৈরভ্যহনদ্দৃঢম্
শীঘ্রকৃদ্রথবাহাংশ্চ তথোভৌ পার্ষ্ণিসারথী
59.10
তয়োস্তদভবদ্যুদ্ধং তুমুলং লোমহর্ষণম্
ভীষ্মস্য সহ পার্থেন বলিবাসবয়োরিব
59.11
ভল্লৈর্ভল্লাঃ সমাগম্য ভীষ্মপাণ্ডবয়োর্যুধি
অন্তরিক্ষে ব্যরাজন্ত খদ্যোতাঃ প্রাবৃষীব হি
59.12
অগ্নিচক্রমিবাবিদ্ধং সব্যদক্ষিণমস্যতঃ
গাণ্ডীবমভবদ্রাজন্পার্থস্য সৃজতঃ শরান্
59.13
স তৈঃ সংছাদয়ামাস ভীষ্মং শরশতৈঃ শিতৈঃ
পর্বতং বারিধারাভিশ্ছাদয়ন্নিব তোয়দঃ
59.14
তাং স বেলামিবোদ্ধূতাং শরবৃষ্টিং সমুত্থিতাম্
ব্যধমত্সায়কৈর্ভীষ্মো অর্জুনং সংনিবারয়ৎ
59.15
ততস্তানি নিকৃত্তানি শরজালানি ভাগশঃ
সমরেঽভিব্যশীর্যন্ত ফল্গুনস্য রথং প্রতি
59.16
ততঃ কনকপুঙ্খানাং শরবৃষ্টিং সমুত্থিতাম্
পাণ্ডবস্য রথাত্তূর্ণং শলভানামিবায়তিম্
ব্যধমত্তাং পুনস্তস্য ভীষ্মঃ শরশতৈঃ শিতৈঃ
59.17
ততস্তে কুরবঃ সর্বে সাধু সাধ্বিতি চাব্রুবন্
দুষ্করং কৃতবান্ভীষ্মো যদর্জুনময়োধয়ৎ
59.18
বলবাংস্তরুণো দক্ষঃ ক্ষিপ্রকারী চ পাণ্ডবঃ
কোঽন্যঃ সমর্থঃ পার্থস্য বেগং ধারয়িতুং রণে
59.19
ঋতে শাংতনবাদ্ভীষ্মাত্কৃষ্ণাদ্বা দেবকীসুতাৎ
আচার্যপ্রবরাদ্বাপি ভারদ্বাজান্মহাবলাৎ
59.20
অস্ত্রৈরস্ত্রাণি সংবার্য ক্রীডতঃ পুরুষর্ষভৌ
চক্ষূংষি সর্বভূতানাং মোহয়ন্তৌ মহাবলৌ
59.21
প্রাজাপত্যং তথৈবৈন্দ্রমাগ্নেয়ং চ সুদারুণম্
কৌবেরং বারুণং চৈব যাম্যং বায়ব্যমেব চ
প্রয়ুঞ্জানৌ মহাত্মানৌ সমরে তৌ বিচেরতুঃ
59.22
বিস্মিতান্যথ ভূতানি তৌ দৃষ্ট্বা সংয়ুগে তদা
সাধু পার্থ মহাবাহো সাধু ভীষ্মেতি চাব্রুবন্
59.23
নেদং যুক্তং মনুষ্যেষু যোঽয়ং সংদৃশ্যতে মহান্
মহাস্ত্রাণাং সংপ্রয়োগঃ সমরে ভীষ্মপার্থয়োঃ
59.24
এবং সর্বাস্ত্রবিদুষোরস্ত্রয়ুদ্ধমবর্তত
অথ জিষ্ণুরুপাবৃত্য পৃথুধারেণ কার্মুকম্
চকর্ত ভীষ্মস্য তদা জাতরূপপরিষ্কৃতম্
59.25
নিমেষান্তরমাত্রেণ ভীষ্মোঽন্যত্কার্মুকং রণে
সমাদায় মহাবাহুঃ সজ্যং চক্রে মহাবলঃ
শরাংশ্চ সুবহূন্ক্রুদ্ধো মুমোচাশু ধনংজয়ে
59.26
অর্জুনোঽপি শরাংশ্চিত্রান্ভীষ্মায় নিশিতান্বহূন্
চিক্ষেপ সুমহাতেজাস্তথা ভীষ্মশ্চ পাণ্ডবে
59.27
তয়োর্দিব্যাস্ত্রবিদুষোরস্যতোরনিশং শরান্
ন বিশেষস্তদা রাজঁল্লক্ষ্যতে স্ম মহাত্মনোঃ
59.28
অথাবৃণোদ্দশ দিশঃ শরৈরতিরথস্তদা
কিরীটমালী কৌন্তেয়ঃ শূরঃ শাংতনবস্তথা
59.29
অতীব পাণ্ডবো ভীষ্মং ভীষ্মশ্চাতীব পাণ্ডবম্
বভূব তস্মিন্সংগ্রামে রাজঁল্লোকে তদদ্ভুতম্
59.30
পাণ্ডবেন হতাঃ শূরা ভীষ্মস্য রথরক্ষিণঃ
শেরতে স্ম তদা রাজন্কৌন্তেয়স্যাভিতো রথম্
59.31
ততো গাণ্ডীবনির্মুক্তা নিরমিত্রং চিকীর্ষবঃ
আগচ্ছন্পুঙ্খসংশ্লিষ্টাঃ শ্বেতবাহনপত্রিণঃ
59.32
নিষ্পতন্তো রথাত্তস্য ধৌতা হৈরণ্যবাসসঃ
আকাশে সমদৃশ্যন্ত হংসানামিব পঙ্ক্তয়ঃ
59.33
তস্য তদ্দিব্যমস্ত্রং হি প্রগাঢং চিত্রমস্যতঃ
প্রেক্ষন্তে স্মান্তরিক্ষস্থাঃ সর্বে দেবাঃ সবাসবাঃ
59.34
তদ্দৃষ্ট্বা পরমপ্রীতো গন্ধর্বশ্চিত্রমদ্ভুতম্
শশংস দেবরাজায় চিত্রসেনঃ প্রতাপবান্
59.35
পশ্যেমানরিনির্দারান্সংসক্তানিব গচ্ছতঃ
চিত্ররূপমিদং জিষ্ণোর্দিব্যমস্ত্রমুদীর্যতঃ
59.36
নেদং মনুষ্যাঃ শ্রদ্দধ্যুর্ন হীদং তেষু বিদ্যতে
পৌরাণানাং মহাস্ত্রাণাং বিচিত্রোঽয়ং সমাগমঃ
59.37
মধ্যংদিনগতং সূর্যং প্রতপন্তমিবাম্বরে
ন শক্নুবন্তি সৈন্যানি পাণ্ডবং প্রতিবীক্ষিতুম্
59.38
উভৌ বিশ্রুতকর্মাণাবুভৌ যুদ্ধবিশারদৌ
উভৌ সদৃশকর্মাণাবুভৌ যুধি দুরাসদৌ
59.39
ইত্যুক্তো দেবরাজস্তু পার্থভীষ্মসমাগমম্
পূজয়ামাস দিব্যেন পুষ্পবর্ষেণ ভারত
59.40
ততো ভীষ্মঃ শাংতনবো বামে পার্শ্বে সমর্পয়ৎ
অস্যতঃ প্রতিসংধায় বিবৃতং সব্যসাচিনঃ
59.41
ততঃ প্রহস্য বীভত্সুঃ পৃথুধারেণ কার্মুকম্
ন্যকৃন্তদ্গার্ধ্রপত্রেণ ভীষ্মস্যামিততেজসঃ
59.42
অথৈনং দশভির্বাণৈঃ প্রত্যবিধ্যত্স্তনান্তরে
যতমানং পরাক্রান্তং কুন্তীপুত্রো ধনংজয়ঃ
59.43
স পীডিতো মহাবাহুর্গৃহীত্বা রথকূবরম্
গাঙ্গেয়ো যুধি দুর্ধর্ষস্তস্থৌ দীর্ঘমিবাতুরঃ
59.44
তং বিসংজ্ঞমপোবাহ সংয়ন্তা রথবাজিনাম্
উপদেশমনুস্মৃত্য রক্ষমাণো মহারথম্