অধ্যায় 60

60.1

বৈশংপায়ন উবাচ
ভীষ্মে তু সংগ্রামশিরো বিহায়; পলায়মানে ধৃতরাষ্ট্রপুত্রঃ
উচ্ছ্রিত্য কেতুং বিনদন্মহাত্মা; স্বয়ং বিগৃহ্যার্জুনমাসসাদ

স ভীমধন্বানমুদগ্রবীর্যং; ধনংজয়ং শত্রুগণে চরন্তম্
আকর্ণপূর্ণায়তচোদিতেন; ভল্লেন বিব্যাধ ললাটমধ্যে

স তেন বাণেন সমর্পিতেন; জাম্বূনদাভেন সুসংশিতেন
ররাজ রাজন্মহনীয়কর্মা; যথৈকপর্বা রুচিরৈকশৃঙ্গঃ

অথাস্য বাণেন বিদারিতস্য; প্রাদুর্বভূবাসৃগজস্রমুষ্ণম্
সা তস্য জাম্বূনদপুষ্পচিত্রা; মালেব চিত্রাভিবিরাজতে স্ম

স তেন বাণাভিহতস্তরস্বী; দুর্যোধনেনোদ্ধতমন্যুবেগঃ
শরানুপাদায় বিষাগ্নিকল্পা;ন্বিব্যাধ রাজানমদীনসত্ত্বঃ

দুর্যোধনশ্চাপি তমুগ্রতেজাঃ; পার্থশ্চ দুর্যোধনমেকবীরঃ
অন্যোন্যমাজৌ পুরুষপ্রবীরৌ; সমং সমাজঘ্নতুরাজমীঢৌ

ততঃ প্রভিন্নেন মহাগজেন; মহীধরাভেন পুনর্বিকর্ণঃ
রথৈশ্চতুর্ভির্গজপাদরক্ষৈঃ; কুন্তীসুতং জিষ্ণুমথাভ্যধাবৎ

তমাপতন্তং ত্বরিতং গজেন্দ্রং; ধনংজয়ঃ কুম্ভবিভাগমধ্যে
আকর্ণপূর্ণেন দৃঢায়সেন; বাণেন বিব্যাধ মহাজবেন

পার্থেন সৃষ্টঃ স তু গার্ধ্রপত্র; আ পুঙ্খদেশাত্প্রবিবেশ নাগম্
বিদার্য শৈলপ্রবরপ্রকাশং; যথাশনিঃ পর্বতমিন্দ্রসৃষ্টঃ

শরপ্রতপ্তঃ স তু নাগরাজঃ; প্রবেপিতাঙ্গো ব্যথিতান্তরাত্মা
সংসীদমানো নিপপাত মহ্যাং; বজ্রাহতং শৃঙ্গমিবাচলস্য

নিপাতিতে দন্তিবরে পৃথিব্যাং; ত্রাসাদ্বিকর্ণঃ সহসাবতীর্য
তূর্ণং পদান্যষ্টশতানি গত্বা; বিবিংশতেঃ স্যন্দনমারুরোহ

নিহত্য নাগং তু শরেণ তেন; বজ্রোপমেনাদ্রিবরাম্বুদাভম্
তথাবিধেনৈব শরেণ পার্থো; দুর্যোধনং বক্ষসি নির্বিভেদ

ততো গজে রাজনি চৈব ভিন্নে; ভগ্নে বিকর্ণে চ সপাদরক্ষে
গাণ্ডীবমুক্তৈর্বিশিখৈঃ প্রণুন্না;স্তে যোধমুখ্যাঃ সহসাপজগ্মুঃ

দৃষ্ট্বৈব বাণেন হতং তু নাগং; যোধাংশ্চ সর্বান্দ্রবতো নিশম্য
রথং সমাবৃত্য কুরুপ্রবীরো; রণাত্প্রদুদ্রাব যতো ন পার্থঃ

তং ভীমরূপং ত্বরিতং দ্রবন্তং; দুর্যোধনং শত্রুসহো নিষঙ্গী
প্রাক্ষ্বেডয়দ্যোদ্ধুমনাঃ কিরীটী; বাণেন বিদ্ধং রুধিরং বমন্তম্

অর্জুন উবাচ
বিহায় কীর্তিং বিপুলং যশশ্চ; যুদ্ধাত্পরাবৃত্য পলায়সে কিম্
ন তেঽদ্য তূর্যাণি সমাহতানি; যথাবদুদ্যান্তি গতস্য যুদ্ধে

যুধিষ্ঠিরস্যাস্মি নিদেশকারী; পার্থস্তৃতীয়ো যুধি চ স্থিরোঽস্মি
তদর্থমাবৃত্য মুখং প্রয়চ্ছ; নরেন্দ্রবৃত্তং স্মর ধার্তরাষ্ট্র

মোঘং তবেদং ভুবি নামধেয়ং; দুর্যোধনেতীহ কৃতং পুরস্তাৎ
ন হীহ দুর্যোধনতা তবাস্তি; পলায়মানস্য রণং বিহায়

ন তে পুরস্তাদথ পৃষ্ঠতো বা; পশ্যামি দুর্যোধন রক্ষিতারম্
পরৈহি যুদ্ধেন কুরুপ্রবীর; প্রাণান্প্রিয়ান্পাণ্ডবতোঽদ্য রক্ষ