Utshovঅধ্যায় 61
61.1
বৈশংপায়ন উবাচ
আহূয়মানস্তু স তেন সংখ্যে; মহামনা ধৃতরাষ্ট্রস্য পুত্রঃ
নিবর্তিতস্তস্য গিরাঙ্কুশেন; গজো যথা মত্ত ইবাঙ্কুশেন
61.2
সোঽমৃষ্যমাণো বচসাভিমৃষ্টো; মহারথেনাতিরথস্তরস্বী
পর্যাববর্তাথ রথেন বীরো; ভোগী যথা পাদতলাভিমৃষ্টঃ
61.3
তং প্রেক্ষ্য কর্ণঃ পরিবর্তমানং; নিবর্ত্য সংস্তভ্য চ বিদ্ধগাত্রঃ
দুর্যোধনং দক্ষিণতোঽভ্যগচ্ছ;ত্পার্থং নৃবীরো যুধি হেমমালী
61.4
ভীষ্মস্ততঃ শাংতনবো নিবৃত্য; হিরণ্যকক্ষ্যাংস্ত্বরয়ংস্তুরংগান্
দুর্যোধনং পশ্চিমতোঽভ্যরক্ষ;ত্পার্থান্মহাবাহুরধিজ্যধন্বা
61.5
দ্রোণঃ কৃপশ্চৈব বিবিংশতিশ্চ; দুঃশাসনশ্চৈব নিবৃত্য শীঘ্রম্
সর্বে পুরস্তাদ্বিততেষুচাপা; দুর্যোধনার্থং ত্বরিতাভ্যুপেয়ুঃ
61.6
স তান্যনীকানি নিবর্তমানা;ন্যালোক্য পূর্ণৌঘনিভানি পার্থঃ
হংসো যথা মেঘমিবাপতন্তং; ধনংজয়ঃ প্রত্যপতত্তরস্বী
61.7
তে সর্বতঃ সংপরিবার্য পার্থ;মস্ত্রাণি দিব্যানি সমাদদানাঃ
ববর্ষুরভ্যেত্য শরৈঃ সমন্তা;ন্মেঘা যথা ভূধরমম্বুবেগৈঃ
61.8
ততোঽস্ত্রমস্ত্রেণ নিবার্য তেষাং; গাণ্ডীবধন্বা কুরুপুংগবানাম্
সংমোহনং শত্রুসহোঽন্যদস্ত্রং; প্রাদুশ্চকারৈন্দ্রিরপারণীয়ম্
61.9
ততো দিশশ্চানুদিশো বিবৃত্য; শরৈঃ সুধারৈর্নিশিতৈঃ সুপুঙ্খৈঃ
গাণ্ডীবঘোষেণ মনাংসি তেষাং; মহাবলঃ প্রব্যথয়াং চকার
61.10
ততঃ পুনর্ভীমরবং প্রগৃহ্য; দোর্ভ্যাং মহাশঙ্খমুদারঘোষম্
ব্যনাদয়ত্স প্রদিশো দিশঃ খং; ভুবং চ পার্থো দ্বিষতাং নিহন্তা
61.11
তে শঙ্খনাদেন কুরুপ্রবীরাঃ; সংমোহিতাঃ পার্থসমীরিতেন
উত্সৃজ্য চাপানি দুরাসদানি; সর্বে তদা শান্তিপরা বভূবুঃ
61.12
তথা বিসংজ্ঞেষু পরেষু পার্থঃ; স্মৃত্বা তু বাক্যানি তথোত্তরায়াঃ
নির্যাহি মধ্যাদিতি মত্স্যপুত্র;মুবাচ যাবত্কুরবো বিসংজ্ঞাঃ
61.13
আচার্য শারদ্বতয়োঃ সুশুক্লে; কর্ণস্য পীতং রুচিরং চ বস্ত্রম্
দ্রৌণেশ্চ রাজ্ঞশ্চ তথৈব নীলে; বস্ত্রে সমাদত্স্ব নরপ্রবীর
61.14
ভীষ্মস্য সংজ্ঞাং তু তথৈব মন্যে; জানাতি মেঽস্ত্রপ্রতিঘাতমেষঃ
এতস্য বাহান্কুরু সব্যতস্ত্ব;মেবং হি যাতব্যমমূঢসংজ্ঞৈঃ
61.15
রশ্মীন্সমুত্সৃজ্য ততো মহাত্মা; রথাদবপ্লুত্য বিরাটপুত্রঃ
বস্ত্রাণ্যুপাদায় মহারথানাং; তূর্ণং পুনঃ স্বং রথমারুরোহ
61.16
ততোঽন্বশাসচ্চতুরঃ সদশ্বা;ন্পুত্রো বিরাটস্য হিরণ্যকক্ষ্যান্
তে তদ্ব্যতীয়ুর্ধ্বজিনামনীকং; শ্বেতা বহন্তোঽর্জুনমাজিমধ্যাৎ
61.17
তথা তু যান্তং পুরুষপ্রবীরং; ভীষ্মঃ শরৈরভ্যহনত্তরস্বী
স চাপি ভীষ্মস্য হয়ান্নিহত্য; বিব্যাধ পার্শ্বে দশভিঃ পৃষত্কৈঃ
61.18
ততোঽর্জুনো ভীষ্মমপাস্য যুদ্ধে; বিদ্ধ্বাস্য যন্তারমরিষ্টধন্বা
তস্থৌ বিমুক্তো রথবৃন্দমধ্যা;দ্রাহুং বিদার্যেব সহস্ররশ্মিঃ
61.19
লব্ধ্বা তু সংজ্ঞাং চ কুরুপ্রবীরঃ; পার্থং সমীক্ষ্যাথ মহেন্দ্রকল্পম্
রণাদ্বিমুক্তং স্থিতমেকমাজৌ; স ধার্তরাষ্ট্রস্ত্বরিতো বভাষে
61.20
অয়ং কথং স্বিদ্ভবতাং বিমুক্ত;স্তং বৈ প্রবধ্নীত যথা ন মুচ্যেৎ
তমব্রবীচ্ছাংতনবঃ প্রহস্য; ক্ব তে গতা বুদ্ধিরভূত্ক্ব বীর্যম্
61.21
শান্তিং পরাশ্বস্য যথা স্থিতোঽভূ;রুত্সৃজ্য বাণাংশ্চ ধনুশ্চ চিত্রম্
ন ত্বেব বীভত্সুরলং নৃশংসং; কর্তুং ন পাপেঽস্য মনো নিবিষ্টম্
61.22
ত্রৈলোক্যহেতোর্ন জহেত্স্বধর্মং; তস্মান্ন সর্বে নিহতা রণেঽস্মিন্
ক্ষিপ্রং কুরূন্যাহি কুরুপ্রবীর; বিজিত্য গাশ্চ প্রতিয়াতু পার্থঃ
61.23
দুর্যোধনস্তস্য তু তন্নিশম্য; পিতামহস্যাত্মহিতং বচোঽথ
অতীতকামো যুধি সোঽত্যমর্ষী; রাজা বিনিঃশ্বস্য বভূব তূষ্ণীম্
61.24
তদ্ভীষ্মবাক্যং হিতমীক্ষ্য সর্বে; ধনংজয়াগ্নিং চ বিবর্ধমানম্
নিবর্তনায়ৈব মনো নিদধ্যু;র্দুর্যোধনং তে পরিরক্ষমাণাঃ
61.25
তান্প্রস্থিতান্প্রীতমনাঃ স পার্থো; ধনংজয়ঃ প্রেক্ষ্য কুরুপ্রবীরান্
আভাষমাণোঽনুয়য়ৌ মুহূর্তং; সংপূজয়ংস্তত্র গুরূন্মহাত্মা
61.26
পিতামহং শাংতনবং স বৃদ্ধং; দ্রোণং গুরুং চ প্রতিপূজ্য মূর্ধ্না
দ্রৌণিং কৃপং চৈব গুরূংশ্চ সর্বা;ঞ্শরৈর্বিচিত্রৈরভিবাদ্য চৈব
61.27
দুর্যোধনস্যোত্তমরত্নচিত্রং; চিচ্ছেদ পার্থো মুকুটং শরেণ
আমন্ত্র্য বীরাংশ্চ তথৈব মান্যা;ন্গাণ্ডীবঘোষেণ বিনাদ্য লোকান্
61.28
স দেবদত্তং সহসা বিনাদ্য; বিদার্য বীরো দ্বিষতাং মনাংসি
ধ্বজেন সর্বানভিভূয় শত্রূ;ন্স হেমজালেন বিরাজমানঃ
61.29
দৃষ্ট্বা প্রয়াতাংস্তু কুরূন্কিরীটী; হৃষ্টোঽব্রবীত্তত্র স মত্স্যপুত্রম্
আবর্তয়াশ্বান্পশবো জিতাস্তে; যাতাঃ পরে যাহি পুরং প্রহৃষ্টঃ