অধ্যায় 62

62.1

বৈশংপায়ন উবাচ
ততো বিজিত্য সংগ্রামে কুরূন্গোবৃষভেক্ষণঃ
সমানয়ামাস তদা বিরাটস্য ধনং মহৎ

গতেষু চ প্রভগ্নেষু ধার্তরাষ্ট্রেষু সর্বশঃ
বনান্নিষ্ক্রম্য গহনাদ্বহবঃ কুরুসৈনিকাঃ

ভয়াত্সংত্রস্তমনসঃ সমাজগ্মুস্ততস্ততঃ
মুক্তকেশা ব্যদৃশ্যন্ত স্থিতাঃ প্রাঞ্জলয়স্তদা

ক্ষুত্পিপাসাপরিশ্রান্তা বিদেশস্থা বিচেতসঃ
ঊচুঃ প্রণম্য সংভ্রান্তাঃ পার্থ কিং করবাম তে

অর্জুন উবাচ
স্বস্তি ব্রজত ভদ্রং বো ন ভেতব্যং কথংচন
নাহমার্তাঞ্জিঘাংসামি ভৃশমাশ্বাসয়ামি বঃ

বৈশংপায়ন উবাচ
তস্য তামভয়াং বাচং শ্রুত্বা যোধাঃ সমাগতাঃ
আয়ুঃকীর্তিয়শোদাভিস্তমাশির্ভিরনন্দয়ন্

ততো নিবৃত্তাঃ কুরবঃ প্রভগ্না বশমাস্থিতাঃ
পন্থানমুপসংগম্য ফল্গুনো বাক্যমব্রবীৎ

রাজপুত্র প্রত্যবেক্ষ সমানীতানি সর্বশঃ
গোকুলানি মহাবাহো বীর গোপালকৈঃ সহ

ততোঽপরাহ্ণে যাস্যামো বিরাটনগরং প্রতি
আশ্বাস্য পায়য়িত্বা চ পরিপ্লাব্য চ বাজিনঃ

গচ্ছন্তু ত্বরিতাশ্চৈব গোপালাঃ প্রেষিতাস্ত্বয়া
নগরে প্রিয়মাখ্যাতুং ঘোষয়ন্তু চ তে জয়ম্

বৈশংপায়ন উবাচ
উত্তরস্ত্বরমাণোঽথ দূতানাজ্ঞাপয়ত্ততঃ
বচনাদর্জুনস্যৈব আচক্ষধ্বং জয়ং মম