Utshovঅধ্যায় 63
63.1
বৈশংপায়ন উবাচ
অবজিত্য ধনং চাপি বিরাটো বাহিনীপতিঃ
প্রাবিশন্নগরং হৃষ্টশ্চতুর্ভিঃ সহ পাণ্ডবৈঃ
63.2
জিত্বা ত্রিগর্তান্সংগ্রামে গাশ্চৈবাদায় কেবলাঃ
অশোভত মহারাজঃ সহ পার্থৈঃ শ্রিয়া বৃতঃ
63.3
তমাসনগতং বীরং সুহৃদাং প্রীতিবর্ধনম্
উপতস্থুঃ প্রকৃতয়ঃ সমস্তা ব্রাহ্মণৈঃ সহ
63.4
সভাজিতঃ সসৈন্যস্তু প্রতিনন্দ্যাথ মত্স্যরাট্
বিসর্জয়ামাস তদা দ্বিজাংশ্চ প্রকৃতীস্তথা
63.5
ততঃ স রাজা মত্স্যানাং বিরাটো বাহিনীপতিঃ
উত্তরং পরিপপ্রচ্ছ ক্ব যাত ইতি চাব্রবীৎ
63.6
আচখ্যুস্তস্য সংহৃষ্টাঃ স্ত্রিয়ঃ কন্যাশ্চ বেশ্মনি
অন্তঃপুরচরাশ্চৈব কুরুভির্গোধনং হৃতম্
63.7
বিজেতুমভিসংরব্ধ এক এবাতিসাহসাৎ
বৃহন্নডাসহায়শ্চ নির্যাতঃ পৃথিবীংজয়ঃ
63.8
উপয়াতানতিরথান্দ্রোণং শাংতনবং কৃপম্
কর্ণং দুর্যোধনং চৈব দ্রোণপুত্রং চ ষড্রথান্
63.9
রাজা বিরাটোঽথ ভৃশং প্রতপ্তঃ; শ্রুত্বা সুতং হ্যেকরথেন যাতম্
বৃহন্নডাসারথিমাজিবর্ধনং; প্রোবাচ সর্বানথ মন্ত্রিমুখ্যান্
63.10
সর্বথা কুরবস্তে হি যে চান্যে বসুধাধিপাঃ
ত্রিগর্তান্নির্জিতাঞ্শ্রুত্বা ন স্থাস্যন্তি কদাচন
63.11
তস্মাদ্গচ্ছন্তু মে যোধা বলেন মহতা বৃতাঃ
উত্তরস্য পরীপ্সার্থং যে ত্রিগর্তৈরবিক্ষতাঃ
63.12
হয়াংশ্চ নাগাংশ্চ রথাংশ্চ শীঘ্রং; পদাতিসংঘাংশ্চ ততঃ প্রবীরান্
প্রস্থাপয়ামাস সুতস্য হেতো;র্বিচিত্রশস্ত্রাভরণোপপন্নান্
63.13
এবং স রাজা মত্স্যানাং বিরাটোঽক্ষৌহিণীপতিঃ
ব্যাদিদেশাথ তাং ক্ষিপ্রং বাহিনীং চতুরঙ্গিণীম্
63.14
কুমারমাশু জানীত যদি জীবতি বা ন বা
যস্য যন্তা গতঃ ষণ্ঢো মন্যেঽহং ন স জীবতি
63.15
তমব্রবীদ্ধর্মরাজঃ প্রহস্য; বিরাটমার্তং কুরুভিঃ প্রতপ্তম্
বৃহন্নডা সারথিশ্চেন্নরেন্দ্র; পরে ন নেষ্যন্তি তবাদ্য গাস্তাঃ
63.16
সর্বান্মহীপান্সহিতান্কুরূংশ্চ; তথৈব দেবাসুরয়ক্ষনাগান্
অলং বিজেতুং সমরে সুতস্তে; স্বনুষ্ঠিতঃ সারথিনা হি তেন
63.17
অথোত্তরেণ প্রহিতা দূতাস্তে শীঘ্রগামিনঃ
বিরাটনগরং প্রাপ্য জয়মাবেদয়ংস্তদা
63.18
রাজ্ঞস্ততঃ সমাচখ্যৌ মন্ত্রী বিজয়মুত্তমম্
পরাজয়ং কুরূণাং চাপ্যুপায়ান্তং তথোত্তরম্
63.19
সর্বা বিনির্জিতা গাবঃ কুরবশ্চ পরাজিতাঃ
উত্তরঃ সহ সূতেন কুশলী চ পরংতপ
63.20
কঙ্ক উবাচ
দিষ্ট্যা তে নির্জিতা গাবঃ কুরবশ্চ পরাজিতাঃ
দিষ্ট্যা তে জীবিতঃ পুত্রঃ শ্রূয়তে পার্থিবর্ষভ
63.21
নাদ্ভুতং ত্বেব মন্যেঽহং যত্তে পুত্রোঽজয়ত্কুরূন্
ধ্রুব এব জয়স্তস্য যস্য যন্তা বৃহন্নডা
63.22
বৈশংপায়ন উবাচ
ততো বিরাটো নৃপতিঃ সংপ্রহৃষ্টতনূরুহঃ
শ্রুত্বা তু বিজয়ং তস্য কুমারস্যামিতৌজসঃ
আচ্ছাদয়িত্বা দূতাংস্তান্মন্ত্রিণঃ সোঽভ্যচোদয়ৎ
63.23
রাজমার্গাঃ ক্রিয়ন্তাং মে পতাকাভিরলংকৃতাঃ
পুষ্পোপহারৈরর্চ্যন্তাং দেবতাশ্চাপি সর্বশঃ
63.24
কুমারা যোধমুখ্যাশ্চ গণিকাশ্চ স্বলংকৃতাঃ
বাদিত্রাণি চ সর্বাণি প্রত্যুদ্যান্তু সুতং মম
63.25
ঘণ্টাপণবকঃ শীঘ্রং মত্তমারুহ্য বারণম্
শৃঙ্গাটকেষু সর্বেষু আখ্যাতু বিজয়ং মম
63.26
উত্তরা চ কুমারীভির্বহ্বীভিরভিসংবৃতা
শৃঙ্গারবেষাভরণা প্রত্যুদ্যাতু বৃহন্নডাম্
63.27
শ্রুত্বা তু তদ্বচনং পার্থিবস্য; সর্বে পুনঃ স্বস্তিকপাণয়শ্চ
ভের্যশ্চ তূর্যাণি চ বারিজাশ্চ; বেষৈঃ পরার্ধ্যৈঃ প্রমদাঃ শুভাশ্চ
63.28
তথৈব সূতাঃ সহ মাগধৈশ্চ; নন্দীবাদ্যাঃ পণবাস্তূর্যবাদ্যাঃ
পুরাদ্বিরাটস্য মহাবলস্য; প্রত্যুদ্যয়ুঃ পুত্রমনন্তবীর্যম্
63.29
প্রস্থাপ্য সেনাং কন্যাশ্চ গণিকাশ্চ স্বলংকৃতাঃ
মত্স্যরাজো মহাপ্রাজ্ঞঃ প্রহৃষ্ট ইদমব্রবীৎ
অক্ষানাহর সৈরন্ধ্রি কঙ্ক দ্যূতং প্রবর্ততাম্
63.30
তং তথা বাদিনং দৃষ্ট্বা পাণ্ডবঃ প্রত্যভাষত
ন দেবিতব্যং হৃষ্টেন কিতবেনেতি নঃ শ্রুতম্
63.31
ন ত্বামদ্য মুদা যুক্তমহং দেবিতুমুত্সহে
প্রিয়ং তু তে চিকীর্ষামি বর্ততাং যদি মন্যসে
63.32
বিরাট উবাচ
স্ত্রিয়ো গাবো হিরণ্যং চ যচ্চান্যদ্বসু কিংচন
ন মে কিংচিত্ত্বয়া রক্ষ্যমন্তরেণাপি দেবিতুম্
63.33
কঙ্ক উবাচ
কিং তে দ্যূতেন রাজেন্দ্র বহুদোষেণ মানদ
দেবনে বহবো দোষাস্তস্মাত্তত্পরিবর্জয়েৎ
63.34
শ্রুতস্তে যদি বা দৃষ্টঃ পাণ্ডবো বৈ যুধিষ্ঠিরঃ
স রাজ্যং সুমহত্স্ফীতং ভ্রাতৄংশ্চ ত্রিদশোপমান্
63.35
দ্যূতে হারিতবান্সর্বং তস্মাদ্দ্যূতং ন রোচয়ে
অথ বা মন্যসে রাজন্দীব্যাব যদি রোচতে
63.36
বৈশংপায়ন উবাচ
প্রবর্তমানে দ্যূতে তু মত্স্যঃ পাণ্ডবমব্রবীৎ
পশ্য পুত্রেণ মে যুদ্ধে তাদৃশাঃ কুরবো জিতাঃ
63.37
ততোঽব্রবীন্মত্স্যরাজং ধর্মপুত্রো যুধিষ্ঠিরঃ
বৃহন্নডা যস্য যন্তা কথং স ন বিজেষ্যতি
63.38
ইত্যুক্তঃ কুপিতো রাজা মত্স্যঃ পাণ্ডবমব্রবীৎ
সমং পুত্রেণ মে ষণ্ঢং ব্রহ্মবন্ধো প্রশংসসি
63.39
বাচ্যাবাচ্যং ন জানীষে নূনং মামবমন্যসে
ভীষ্মদ্রোণমুখান্সর্বান্কস্মান্ন স বিজেষ্যতি
63.40
বয়স্যত্বাত্তু তে ব্রহ্মন্নপরাধমিমং ক্ষমে
নেদৃশং তে পুনর্বাচ্যং যদি জীবিতুমিচ্ছসি
63.41
যুধিষ্ঠির উবাচ
যত্র দ্রোণস্তথা ভীষ্মো দ্রৌণির্বৈকর্তনঃ কৃপঃ
দুর্যোধনশ্চ রাজেন্দ্র তথান্যে চ মহারথাঃ
63.42
মরুদ্গণৈঃ পরিবৃতঃ সাক্ষাদপি শতক্রতুঃ
কোঽন্যো বৃহন্নডায়াস্তান্প্রতিয়ুধ্যেত সংগতান্
63.43
বিরাট উবাচ
বহুশঃ প্রতিষিদ্ধোঽসি ন চ বাচং নিয়চ্ছসি
নিয়ন্তা চেন্ন বিদ্যেত ন কশ্চিদ্ধর্মমাচরেৎ
63.44
বৈশংপায়ন উবাচ
ততঃ প্রকুপিতো রাজা তমক্ষেণাহনদ্ভৃশম্
মুখে যুধিষ্ঠিরং কোপান্নৈবমিত্যেব ভর্ত্সয়ন্
63.45
বলবত্প্রতিবিদ্ধস্য নস্তঃ শোণিতমাগমৎ
তদপ্রাপ্তং মহীং পার্থঃ পাণিভ্যাং প্রত্যগৃহ্ণত
63.46
অবৈক্ষত চ ধর্মাত্মা দ্রৌপদীং পার্শ্বতঃ স্থিতাম্
সা বেদ তমভিপ্রায়ং ভর্তুশ্চিত্তবশানুগা
63.47
পূরয়িত্বা চ সৌবর্ণং পাত্রং কাংস্যমনিন্দিতা
তচ্ছোণিতং প্রত্যগৃহ্ণাদ্যত্প্রসুস্রাব পাণ্ডবাৎ
63.48
অথোত্তরঃ শুভৈর্গন্ধৈর্মাল্যৈশ্চ বিবিধৈস্তথা
অবকীর্যমাণঃ সংহৃষ্টো নগরং স্বৈরমাগমৎ
63.49
সভাজ্যমানঃ পৌরৈশ্চ স্ত্রীভির্জানপদৈস্তথা
আসাদ্য ভবনদ্বারং পিত্রে স প্রত্যহারয়ৎ
63.50
ততো দ্বাঃস্থঃ প্রবিশ্যৈব বিরাটমিদমব্রবীৎ
বৃহন্নডাসহায়স্তে পুত্রো দ্বার্যুত্তরঃ স্থিতঃ
63.51
ততো হৃষ্টো মত্স্যরাজঃ ক্ষত্তারমিদমব্রবীৎ
প্রবেশ্যতামুভৌ তূর্ণং দর্শনেপ্সুরহং তয়োঃ
63.52
ক্ষত্তারং কুরুরাজস্তু শনৈঃ কর্ণ উপাজপৎ
উত্তরঃ প্রবিশত্বেকো ন প্রবেশ্যা বৃহন্নডা
63.53
এতস্য হি মহাবাহো ব্রতমেতত্সমাহিতম্
যো মমাঙ্গে ব্রণং কুর্যাচ্ছোণিতং বাপি দর্শয়েৎ
অন্যত্র সংগ্রামগতান্ন স জীবেদসংশয়ম্
63.54
ন মৃষ্যাদ্ভৃশসংক্রুদ্ধো মাং দৃষ্ট্বৈব সশোণিতম্
বিরাটমিহ সামাত্যং হন্যাত্সবলবাহনম্