অধ্যায় 64

64.1

বৈশংপায়ন উবাচ
ততো রাজ্ঞঃ সুতো জ্যেষ্ঠঃ প্রাবিশত্পৃথিবীংজয়ঃ
সোঽভিবাদ্য পিতুঃ পাদৌ ধর্মরাজমপশ্যত

64.2

স তং রুধিরসংসিক্তমনেকাগ্রমনাগসম্
ভূমাবাসীনমেকান্তে সৈরন্ধ্র্যা সমুপস্থিতম্

64.3

ততঃ পপ্রচ্ছ পিতরং ত্বরমাণ ইবোত্তরঃ
কেনায়ং তাডিতো রাজন্কেন পাপমিদং কৃতম্

64.4

বিরাট উবাচ
ময়ায়ং তাডিতো জিহ্মো ন চাপ্যেতাবদর্হতি
প্রশস্যমানে যঃ শূরে ত্বয়ি ষণ্ঢং প্রশংসতি

64.5

উত্তর উবাচ
অকার্যং তে কৃতং রাজন্ক্ষিপ্রমেব প্রসাদ্যতাম্
মা ত্বা ব্রহ্মবিষং ঘোরং সমূলমপি নির্দহেৎ

64.6

বৈশংপায়ন উবাচ
স পুত্রস্য বচঃ শ্রুত্বা বিরাটো রাষ্ট্রবর্ধনঃ
ক্ষময়ামাস কৌন্তেয়ং ভস্মচ্ছন্নমিবানলম্

64.7

ক্ষময়ন্তং তু রাজানং পাণ্ডবঃ প্রত্যভাষত
চিরং ক্ষান্তমিদং রাজন্ন মন্যুর্বিদ্যতে মম

64.8

যদি হ্যেতত্পতেদ্ভূমৌ রুধিরং মম নস্ততঃ
সরাষ্ট্রস্ত্বং মহারাজ বিনশ্যেথা ন সংশয়ঃ

64.9

ন দূষয়ামি তে রাজন্যচ্চ হন্যাদদূষকম্
বলবন্তং মহারাজ ক্ষিপ্রং দারুণমাপ্নুয়াৎ

64.10

শোণিতে তু ব্যতিক্রান্তে প্রবিবেশ বৃহন্নডা
অভিবাদ্য বিরাটং চ কঙ্কং চাপ্যুপতিষ্ঠত

64.11

ক্ষময়িত্বা তু কৌরব্যং রণাদুত্তরমাগতম্
প্রশশংস ততো মত্স্যঃ শৃণ্বতঃ সব্যসাচিনঃ

64.12

ত্বয়া দায়াদবানস্মি কৈকেয়ীনন্দিবর্ধন
ত্বয়া মে সদৃশঃ পুত্রো ন ভূতো ন ভবিষ্যতি

64.13

পদং পদসহস্রেণ যশ্চরন্নাপরাধ্নুয়াৎ
তেন কর্ণেন তে তাত কথমাসীত্সমাগমঃ

64.14

মনুষ্যলোকে সকলে যস্য তুল্যো ন বিদ্যতে
যঃ সমুদ্র ইবাক্ষোভ্যঃ কালাগ্নিরিব দুঃসহঃ
তেন ভীষ্মেণ তে তাত কথমাসীত্সমাগমঃ

64.15

আচার্যো বৃষ্ণিবীরাণাং পাণ্ডবানাং চ যো দ্বিজঃ
সর্বক্ষত্রস্য চাচার্যঃ সর্বশস্ত্রভৃতাং বরঃ
তেন দ্রোণেন তে তাত কথমাসীত্সমাগমঃ

64.16

আচার্যপুত্রো যঃ শূরঃ সর্বশস্ত্রভৃতামপি
অশ্বত্থামেতি বিখ্যাতঃ কথং তেন সমাগমঃ

64.17

রণে যং প্রেক্ষ্য সীদন্তি হৃতস্বা বণিজো যথা
কৃপেণ তেন তে তাত কথমাসীত্সমাগমঃ

64.18

পর্বতং যোঽভিবিধ্যেত রাজপুত্রো মহেষুভিঃ
দুর্যোধনেন তে তাত কথমাসীত্সমাগমঃ

64.19

উত্তর উবাচ
ন ময়া নির্জিতা গাবো ন ময়া নির্জিতাঃ পরে
কৃতং তু কর্ম তত্সর্বং দেবপুত্রেণ কেনচিৎ

64.20

স হি ভীতং দ্রবন্তং মাং দেবপুত্রো ন্যবারয়ৎ
স চাতিষ্ঠদ্রথোপস্থে বজ্রহস্তনিভো যুবা

64.21

তেন তা নির্জিতা গাবস্তেন তে কুরবো জিতাঃ
তস্য তত্কর্ম বীরস্য ন ময়া তাত তত্কৃতম্

64.22

স হি শারদ্বতং দ্রোণং দ্রোণপুত্রং চ বীর্যবান্
সূতপুত্রং চ ভীষ্মং চ চকার বিমুখাঞ্শরৈঃ

64.23

দুর্যোধনং চ সমরে সনাগমিব যূথপম্
প্রভগ্নমব্রবীদ্ভীতং রাজপুত্রং মহাবলম্

64.24

ন হাস্তিনপুরে ত্রাণং তব পশ্যামি কিংচন
ব্যায়ামেন পরীপ্সস্ব জীবিতং কৌরবাত্মজ

64.25

ন মোক্ষ্যসে পলায়ংস্ত্বং রাজন্যুদ্ধে মনঃ কুরু
পৃথিবীং ভোক্ষ্যসে জিত্বা হতো বা স্বর্গমাপ্স্যসি

64.26

স নিবৃত্তো নরব্যাঘ্রো মুঞ্চন্বজ্রনিভাঞ্শরান্
সচিবৈঃ সংবৃতো রাজা রথে নাগ ইব শ্বসন্

64.27

তত্র মে রোমহর্ষোঽভূদূরুস্তম্ভশ্চ মারিষ
যদভ্রঘনসংকাশমনীকং ব্যধমচ্ছরৈঃ

64.28

তত্প্রণুদ্য রথানীকং সিংহসংহননো যুবা
কুরূংস্তান্প্রহসন্রাজন্বাসাংস্যপহরদ্বলী

64.29

একেন তেন বীরেণ ষড্রথাঃ পরিবারিতাঃ
শার্দূলেনেব মত্তেন মৃগাস্তৃণচরা বনে

64.30

বিরাট উবাচ
ক্ব স বীরো মহাবাহুর্দেবপুত্রো মহায়শাঃ
যো মে ধনমবাজৈষীত্কুরুভির্গ্রস্তমাহবে

64.31

ইচ্ছামি তমহং দ্রষ্টুমর্চিতুং চ মহাবলম্
যেন মে ত্বং চ গাবশ্চ রক্ষিতা দেবসূনুনা

64.32

উত্তর উবাচ
অন্তর্ধানং গতস্তাত দেবপুত্রঃ প্রতাপবান্
স তু শ্বো বা পরশ্বো বা মন্যে প্রাদুর্ভবিষ্যতি

64.33

বৈশংপায়ন উবাচ
এবমাখ্যায়মানং তু ছন্নং সত্রেণ পাণ্ডবম্
বসন্তং তত্র নাজ্ঞাসীদ্বিরাটঃ পার্থমর্জুনম্

64.34

ততঃ পার্থোঽভ্যনুজ্ঞাতো বিরাটেন মহাত্মনা
প্রদদৌ তানি বাসাংসি বিরাটদুহিতুঃ স্বয়ম্

64.35

উত্তরা তু মহার্হাণি বিবিধানি তনূনি চ
প্রতিগৃহ্যাভবত্প্রীতা তানি বাসাংসি ভামিনী

64.36

মন্ত্রয়িত্বা তু কৌন্তেয় উত্তরেণ রহস্তদা
ইতিকর্তব্যতাং সর্বাং রাজন্যথ যুধিষ্ঠিরে

64.37

ততস্তথা তদ্ব্যদধাদ্যথাবত্পুরুষর্ষভ
সহ পুত্রেণ মত্স্যস্য প্রহৃষ্টো ভরতর্ষভঃ

Contains text from DharmicData, made available under the Open Database License (ODbL). Simple meanings are written by AI and can contain mistakes.