অধ্যায় 65

65.1

বৈশংপায়ন উবাচ
ততস্তৃতীয়ে দিবসে ভ্রাতরঃ পঞ্চ পাণ্ডবাঃ
স্নাতাঃ শুক্লাম্বরধরাঃ সময়ে চরিতব্রতাঃ

যুধিষ্ঠিরং পুরস্কৃত্য সর্বাভরণভূষিতাঃ
অভিপদ্মা যথা নাগা ভ্রাজমানা মহারথাঃ

বিরাটস্য সভাং গত্বা ভূমিপালাসনেষ্বথ
নিষেদুঃ পাবকপ্রখ্যাঃ সর্বে ধিষ্ণ্যেষ্বিবাগ্নয়ঃ

তেষু তত্রোপবিষ্টেষু বিরাটঃ পৃথিবীপতিঃ
আজগাম সভাং কর্তুং রাজকার্যাণি সর্বশঃ

শ্রীমতঃ পাণ্ডবান্দৃষ্ট্বা জ্বলতঃ পাবকানিব
অথ মত্স্যোঽব্রবীত্কঙ্কং দেবরূপমবস্থিতম্
মরুদ্গণৈরুপাসীনং ত্রিদশানামিবেশ্বরম্

স কিলাক্ষাতিবাপস্ত্বং সভাস্তারো ময়া কৃতঃ
অথ রাজাসনে কস্মাদুপবিষ্টোঽস্যলংকৃতঃ

পরিহাসেপ্সয়া বাক্যং বিরাটস্য নিশম্য তৎ
স্ময়মানোঽর্জুনো রাজন্নিদং বচনমব্রবীৎ

ইন্দ্রস্যাপ্যাসনং রাজন্নয়মারোঢুমর্হতি
ব্রহ্মণ্যঃ শ্রুতবাংস্ত্যাগী যজ্ঞশীলো দৃঢব্রতঃ

অয়ং কুরূণামৃষভঃ কুন্তীপুত্রো যুধিষ্ঠিরঃ
অস্য কীর্তিঃ স্থিতা লোকে সূর্যস্যেবোদ্যতঃ প্রভা

সংসরন্তি দিশঃ সর্বা যশসোঽস্য গভস্তয়ঃ
উদিতস্যেব সূর্যস্য তেজসোঽনু গভস্তয়ঃ

এনং দশ সহস্রাণি কুঞ্জরাণাং তরস্বিনাম্
অন্বয়ুঃ পৃষ্ঠতো রাজন্যাবদধ্যাবসত্কুরূন্

ত্রিংশদেনং সহস্রাণি রথাঃ কাঞ্চনমালিনঃ
সদশ্বৈরুপসংপন্নাঃ পৃষ্ঠতোঽনুয়য়ুঃ সদা

এনমষ্টশতাঃ সূতাঃ সুমৃষ্টমণিকুণ্ডলাঃ
অস্তুবন্মাগধৈঃ সার্ধং পুরা শক্রমিবর্ষয়ঃ

এনং নিত্যমুপাসন্ত কুরবঃ কিংকরা যথা
সর্বে চ রাজন্রাজানো ধনেশ্বরমিবামরাঃ

এষ সর্বান্মহীপালান্করমাহারয়ত্তদা
বৈশ্যানিব মহারাজ বিবশান্স্ববশানপি

অষ্টাশীতিসহস্রাণি স্নাতকানাং মহাত্মনাম্
উপজীবন্তি রাজানমেনং সুচরিতব্রতম্

এষ বৃদ্ধাননাথাংশ্চ ব্যঙ্গান্পঙ্গূংশ্চ মানবান্
পুত্রবত্পালয়ামাস প্রজা ধর্মেণ চাভিভো

এষ ধর্মে দমে চৈব ক্রোধে চাপি যতব্রতঃ
মহাপ্রসাদো ব্রহ্মণ্যঃ সত্যবাদী চ পার্থিবঃ

শ্রীপ্রতাপেন চৈতস্য তপ্যতে স সুয়োধনঃ
সগণঃ সহ কর্ণেন সৌবলেনাপি বা বিভুঃ

ন শক্যন্তে হ্যস্য গুণাঃ প্রসংখ্যাতুং নরেশ্বর
এষ ধর্মপরো নিত্যমানৃশংস্যশ্চ পাণ্ডবঃ

এবংয়ুক্তো মহারাজঃ পাণ্ডবঃ পার্থিবর্ষভঃ
কথং নার্হতি রাজার্হমাসনং পৃথিবীপতিঃ