Utshovঅধ্যায় 66
66.1
বিরাট উবাচ
যদ্যেষ রাজা কৌরব্যঃ কুন্তীপুত্রো যুধিষ্ঠিরঃ
কতমোঽস্যার্জুনো ভ্রাতা ভীমশ্চ কতমো বলী
66.2
নকুলঃ সহদেবো বা দ্রৌপদী বা যশস্বিনী
যদা দ্যূতে জিতাঃ পার্থা ন প্রাজ্ঞায়ন্ত তে ক্বচিৎ
66.3
অর্জুন উবাচ
য এষ বল্লবো ব্রূতে সূদস্তব নরাধিপ
এষ ভীমো মহাবাহুর্ভীমবেগপরাক্রমঃ
66.4
এষ ক্রোধবশান্হত্বা পর্বতে গন্ধমাদনে
সৌগন্ধিকানি দিব্যানি কৃষ্ণার্থে সমুপাহরৎ
66.5
গন্ধর্ব এষ বৈ হন্তা কীচকানাং দুরাত্মনাম্
ব্যাঘ্রানৃক্ষান্বরাহাংশ্চ হতবান্স্ত্রীপুরে তব
66.6
যশ্চাসীদশ্ববন্ধস্তে নকুলোঽয়ং পরংতপঃ
গোসংখ্যঃ সহদেবশ্চ মাদ্রীপুত্রৌ মহারথৌ
66.7
শৃঙ্গারবেষাভরণৌ রূপবন্তৌ যশস্বিনৌ
নানারথসহস্রাণাং সমর্থৌ পুরুষর্ষভৌ
66.8
এষা পদ্মপলাশাক্ষী সুমধ্যা চারুহাসিনী
সৈরন্ধ্রী দ্রৌপদী রাজন্যত্কৃতে কীচকা হতাঃ
66.9
অর্জুনোঽহং মহারাজ ব্যক্তং তে শ্রোত্রমাগতঃ
ভীমাদবরজঃ পার্থো যমাভ্যাং চাপি পূর্বজঃ
66.10
উষিতাঃ স্ম মহারাজ সুখং তব নিবেশনে
অজ্ঞাতবাসমুষিতা গর্ভবাস ইব প্রজাঃ
66.11
বৈশংপায়ন উবাচ
যদার্জুনেন তে বীরাঃ কথিতাঃ পঞ্চ পাণ্ডবাঃ
তদার্জুনস্য বৈরাটিঃ কথয়ামাস বিক্রমম্
66.12
অয়ং স দ্বিষতাং মধ্যে মৃগাণামিব কেসরী
অচরদ্রথবৃন্দেষু নিঘ্নংস্তেষাং বরান্বরান্
66.13
অনেন বিদ্ধো মাতঙ্গো মহানেকেষুণা হতঃ
হিরণ্যকক্ষ্যঃ সংগ্রামে দন্তাভ্যামগমন্মহীম্
66.14
অনেন বিজিতা গাবো জিতাশ্চ কুরবো যুধি
অস্য শঙ্খপ্রণাদেন কর্ণৌ মে বধিরীকৃতৌ
66.15
তস্য তদ্বচনং শ্রুত্বা মত্স্যরাজঃ প্রতাপবান্
উত্তরং প্রত্যুবাচেদমভিপন্নো যুধিষ্ঠিরে
66.16
প্রসাদনং পাণ্ডবস্য প্রাপ্তকালং হি রোচয়ে
উত্তরাং চ প্রয়চ্ছামি পার্থায় যদি তে মতম্
66.17
উত্তর উবাচ
অর্চ্যাঃ পূজ্যাশ্চ মান্যাশ্চ প্রাপ্তকালং চ মে মতম্
পূজ্যন্তাং পূজনার্হাশ্চ মহাভাগাশ্চ পাণ্ডবাঃ
66.18
বিরাট উবাচ
অহং খল্বপি সংগ্রামে শত্রূণাং বশমাগতঃ
মোক্ষিতো ভীমসেনেন গাবশ্চ বিজিতাস্তথা
66.19
এতেষাং বাহুবীর্যেণ যদস্মাকং জয়ো মৃধে
বয়ং সর্বে সহামাত্যাঃ কুন্তীপুত্রং যুধিষ্ঠিরম্
প্রসাদয়ামো ভদ্রং তে সানুজং পাণ্ডবর্ষভম্
66.20
যদস্মাভিরজানদ্ভিঃ কিংচিদুক্তো নরাধিপঃ
ক্ষন্তুমর্হতি তত্সর্বং ধর্মাত্মা হ্যেষ পাণ্ডবঃ
66.21
বৈশংপায়ন উবাচ
ততো বিরাটঃ পরমাভিতুষ্টঃ; সমেত্য রাজ্ঞা সময়ং চকার
রাজ্যং চ সর্বং বিসসর্জ তস্মৈ; সদণ্ডকোশং সপুরং মহাত্মা
66.22
পাণ্ডবাংশ্চ ততঃ সর্বান্মত্স্যরাজঃ প্রতাপবান্
ধনংজয়ং পুরস্কৃত্য দিষ্ট্যা দিষ্ট্যেতি চাব্রবীৎ
66.23
সমুপাঘ্রায় মূর্ধানং সংশ্লিষ্য চ পুনঃ পুনঃ
যুধিষ্ঠিরং চ ভীমং চ মাদ্রীপুত্রৌ চ পাণ্ডবৌ
66.24
নাতৃপ্যদ্দর্শনে তেষাং বিরাটো বাহিনীপতিঃ
সংপ্রীয়মাণো রাজানং যুধিষ্ঠিরমথাব্রবীৎ
66.25
দিষ্ট্যা ভবন্তঃ সংপ্রাপ্তাঃ সর্বে কুশলিনো বনাৎ
দিষ্ট্যা চ পারিতং কৃচ্ছ্রমজ্ঞাতং বৈ দুরাত্মভিঃ
66.26
ইদং চ রাজ্যং নঃ পার্থা যচ্চান্যদ্বসু কিংচন
প্রতিগৃহ্ণন্তু তত্সর্বং কৌন্তেয়া অবিশঙ্কয়া
66.27
উত্তরাং প্রতিগৃহ্ণাতু সব্যসাচী ধনংজয়ঃ
অয়ং হ্যৌপয়িকো ভর্তা তস্যাঃ পুরুষসত্তমঃ
66.28
এবমুক্তো ধর্মরাজঃ পার্থমৈক্ষদ্ধনংজয়ম্
ঈক্ষিতশ্চার্জুনো ভ্রাত্রা মত্স্যং বচনমব্রবীৎ
66.29
প্রতিগৃহ্ণাম্যহং রাজন্স্নুষাং দুহিতরং তব
যুক্তশ্চাবাং হি সংবন্ধো মত্স্যভারতসত্তমৌ