Utshovঅধ্যায় 67
67.1
বিরাট উবাচ
কিমর্থং পাণ্ডবশ্রেষ্ঠ ভার্যাং দুহিতরং মম
প্রতিগ্রহীতুং নেমাং ত্বং ময়া দত্তামিহেচ্ছসি
67.2
অর্জুন উবাচ
অন্তঃপুরেঽহমুষিতঃ সদা পশ্যন্সুতাং তব
রহস্যং চ প্রকাশং চ বিশ্বস্তা পিতৃবন্ময়ি
67.3
প্রিয়ো বহুমতশ্চাহং নর্তকো গীতকোবিদঃ
আচার্যবচ্চ মাং নিত্যং মন্যতে দুহিতা তব
67.4
বয়ঃস্থয়া তয়া রাজন্সহ সংবত্সরোষিতঃ
অতিশঙ্কা ভবেত্স্থানে তব লোকস্য চাভিভো
67.5
তস্মান্নিমন্ত্রয়ে ত্বাহং দুহিতুঃ পৃথিবীপতে
শুদ্ধো জিতেন্দ্রিয়ো দান্তস্তস্যাঃ শুদ্ধিঃ কৃতা ময়া
67.6
স্নুষায়া দুহিতুর্বাপি পুত্রে চাত্মনি বা পুনঃ
অত্র শঙ্কাং ন পশ্যামি তেন শুদ্ধির্ভবিষ্যতি
67.7
অভিষঙ্গাদহং ভীতো মিথ্যাচারাত্পরংতপ
স্নুষার্থমুত্তরাং রাজন্প্রতিগৃহ্ণামি তে সুতাম্
67.8
স্বস্রীয়ো বাসুদেবস্য সাক্ষাদ্দেবশিশুর্যথা
দয়িতশ্চক্রহস্তস্য বাল এবাস্ত্রকোবিদঃ
67.9
অভিমন্যুর্মহাবাহুঃ পুত্রো মম বিশাং পতে
জামাতা তব যুক্তো বৈ ভর্তা চ দুহিতুস্তব
67.10
বিরাট উবাচ
উপপন্নং কুরুশ্রেষ্ঠে কুন্তীপুত্রে ধনংজয়ে
য এবং ধর্মনিত্যশ্চ জাতজ্ঞানশ্চ পাণ্ডবঃ
67.11
যত্কৃত্যং মন্যসে পার্থ ক্রিয়তাং তদনন্তরম্
সর্বে কামাঃ সমৃদ্ধা মে সংবন্ধী যস্য মেঽর্জুনঃ
67.12
বৈশংপায়ন উবাচ
এবং ব্রুবতি রাজেন্দ্রে কুন্তীপুত্রো যুধিষ্ঠিরঃ
অন্বজানাত্স সংয়োগং সময়ে মত্স্যপার্থয়োঃ
67.13
ততো মিত্রেষু সর্বেষু বাসুদেবে চ ভারত
প্রেষয়ামাস কৌন্তেয়ো বিরাটশ্চ মহীপতিঃ
67.14
ততস্ত্রয়োদশে বর্ষে নিবৃত্তে পঞ্চ পাণ্ডবাঃ
উপপ্লব্যে বিরাটস্য সমপদ্যন্ত সর্বশঃ
67.15
তস্মিন্বসংশ্চ বীভত্সুরানিনায় জনার্দনম্
আনর্তেভ্যোঽপি দাশার্হানভিমন্যুং চ পাণ্ডবঃ
67.16
কাশিরাজশ্চ শৈব্যশ্চ প্রীয়মাণৌ যুধিষ্ঠিরে
অক্ষৌহিণীভ্যাং সহিতাবাগতৌ পৃথিবীপতে
67.17
অক্ষৌহিণ্যা চ তেজস্বী যজ্ঞসেনো মহাবলঃ
দ্রৌপদ্যাশ্চ সুতা বীরাঃ শিখণ্ডী চাপরাজিতঃ
67.18
ধৃষ্টদ্যুম্নশ্চ দুর্ধর্ষঃ সর্বশস্ত্রভৃতাং বরঃ
সমস্তাক্ষৌহিণীপালা যজ্বানো ভূরিদক্ষিণাঃ
সর্বে শস্ত্রাস্ত্রসংপন্নাঃ সর্বে শূরাস্তনুত্যজঃ
67.19
তানাগতানভিপ্রেক্ষ্য মত্স্যো ধর্মভৃতাং বরঃ
প্রীতোঽভবদ্দুহিতরং দত্ত্বা তামভিমন্যবে
67.20
ততঃ প্রত্যুপয়াতেষু পার্থিবেষু ততস্ততঃ
তত্রাগমদ্বাসুদেবো বনমালী হলায়ুধঃ
কৃতবর্মা চ হার্দিক্যো যুয়ুধানশ্চ সাত্যকিঃ
67.21
অনাধৃষ্টিস্তথাক্রূরঃ সাম্বো নিশঠ এব চ
অভিমন্যুমুপাদায় সহ মাত্রা পরংতপাঃ
67.22
ইন্দ্রসেনাদয়শ্চৈব রথৈস্তৈঃ সুসমাহিতৈঃ
আয়য়ুঃ সহিতাঃ সর্বে পরিসংবত্সরোষিতাঃ
67.23
দশ নাগসহস্রাণি হয়ানাং চ শতায়ুতম্
রথানামর্বুদং পূর্ণং নিখর্বং চ পদাতিনাম্
67.24
বৃষ্ণ্যন্ধকাশ্চ বহবো ভোজাশ্চ পরমৌজসঃ
অন্বয়ুর্বৃষ্ণিশার্দূলং বাসুদেবং মহাদ্যুতিম্
67.25
পারিবর্হং দদৌ কৃষ্ণঃ পাণ্ডবানাং মহাত্মনাম্
স্ত্রিয়ো রত্নানি বাসাংসি পৃথক্পৃথগনেকশঃ
ততো বিবাহো বিধিবদ্ববৃতে মত্স্যপার্থয়োঃ
67.26
ততঃ শঙ্খাশ্চ ভের্যশ্চ গোমুখাডম্বরাস্তথা
পার্থৈঃ সংয়ুজ্যমানস্য নেদুর্মত্স্যস্য বেশ্মনি
67.27
উচ্চাবচান্মৃগাঞ্জঘ্নুর্মেধ্যাংশ্চ শতশঃ পশূন্
সুরামৈরেয়পানানি প্রভূতান্যভ্যহারয়ন্
67.28
গায়নাখ্যানশীলাশ্চ নটা বৈতালিকাস্তথা
স্তুবন্তস্তানুপাতিষ্ঠন্সূতাশ্চ সহ মাগধৈঃ
67.29
সুদেষ্ণাং চ পুরস্কৃত্য মত্স্যানাং চ বরস্ত্রিয়ঃ
আজগ্মুশ্চারুসর্বাঙ্গ্যঃ সুমৃষ্টমণিকুণ্ডলাঃ
67.30
বর্ণোপপন্নাস্তা নার্যো রূপবত্যঃ স্বলংকৃতাঃ
সর্বাশ্চাভ্যভবত্কৃষ্ণা রূপেণ যশসা শ্রিয়া
67.31
পরিবার্যোত্তরাং তাস্তু রাজপুত্রীমলংকৃতাম্
সুতামিব মহেন্দ্রস্য পুরস্কৃত্যোপতস্থিরে
67.32
তাং প্রত্যগৃহ্ণাত্কৌন্তেয়ঃ সুতস্যার্থে ধনংজয়ঃ
সৌভদ্রস্যানবদ্যাঙ্গীং বিরাটতনয়াং তদা
67.33
তত্রাতিষ্ঠন্মহারাজো রূপমিন্দ্রস্য ধারয়ন্
স্নুষাং তাং প্রতিজগ্রাহ কুন্তীপুত্রো যুধিষ্ঠিরঃ
67.34
প্রতিগৃহ্য চ তাং পার্থঃ পুরস্কৃত্য জনার্দনম্
বিবাহং কারয়ামাস সৌভদ্রস্য মহাত্মনঃ
67.35
তস্মৈ সপ্ত সহস্রাণি হয়ানাং বাতরংহসাম্
দ্বে চ নাগশতে মুখ্যে প্রাদাদ্বহু ধনং তদা
67.36
কৃতে বিবাহে তু তদা ধর্মপুত্রো যুধিষ্ঠিরঃ
ব্রাহ্মণেভ্যো দদৌ বিত্তং যদুপাহরদচ্যুতঃ
67.37
গোসহস্রাণি রত্নানি বস্ত্রাণি বিবিধানি চ
ভূষণানি চ মুখ্যানি যানানি শয়নানি চ
67.38
তন্মহোত্সবসংকাশং হৃষ্টপুষ্টজনাবৃতম্
নগরং মত্স্যরাজস্য শুশুভে ভরতর্ষভ