UtshovChapter 65
65.1
वैशंपायन उवाच
ततस्तृतीये दिवसे भ्रातरः पञ्च पाण्डवाः
स्नाताः शुक्लाम्बरधराः समये चरितव्रताः
Vaishampayana uvacha
Tatastritiye divase bhratarah pancha pandavah
Snatah shuklambaradharah samaye charitavratah
65.2
युधिष्ठिरं पुरस्कृत्य सर्वाभरणभूषिताः
अभिपद्मा यथा नागा भ्राजमाना महारथाः
Yudhishthiram puraskritya sarvabharanabhushitah
Abhipadma yatha naga bhrajamana maharathah
65.3
विराटस्य सभां गत्वा भूमिपालासनेष्वथ
निषेदुः पावकप्रख्याः सर्वे धिष्ण्येष्विवाग्नयः
Viratasya sabham gatva bhumipalasaneshvatha
Nisheduh pavakaprakhyah sarve dhishnyeshvivagnayah
65.4
तेषु तत्रोपविष्टेषु विराटः पृथिवीपतिः
आजगाम सभां कर्तुं राजकार्याणि सर्वशः
Teshu tatropavishteshu viratah prithivipatih
Ajagama sabham kartum rajakaryani sarvashah
65.5
श्रीमतः पाण्डवान्दृष्ट्वा ज्वलतः पावकानिव
अथ मत्स्योऽब्रवीत्कङ्कं देवरूपमवस्थितम्
मरुद्गणैरुपासीनं त्रिदशानामिवेश्वरम्
Shrimatah pandavandrishtva jvalatah pavakaniva
Atha matsyobravitkankam devarupamavasthitam
Marudganairupasinam tridashanamiveshvaram
65.6
स किलाक्षातिवापस्त्वं सभास्तारो मया कृतः
अथ राजासने कस्मादुपविष्टोऽस्यलंकृतः
Sa kilakshativapastvam sabhastaro maya kritah
Atha rajasane kasmadupavishtosyalankritah
65.7
परिहासेप्सया वाक्यं विराटस्य निशम्य तत्
स्मयमानोऽर्जुनो राजन्निदं वचनमब्रवीत्
Parihasepsaya vakyam viratasya nishamya tat
Smayamanorjuno rajannidam vachanamabravit
65.8
इन्द्रस्याप्यासनं राजन्नयमारोढुमर्हति
ब्रह्मण्यः श्रुतवांस्त्यागी यज्ञशीलो दृढव्रतः
Indrasyapyasanam rajannayamarodhumarhati
Brahmanyah shrutavanstyagi yagyashilo dridhavratah
65.9
अयं कुरूणामृषभः कुन्तीपुत्रो युधिष्ठिरः
अस्य कीर्तिः स्थिता लोके सूर्यस्येवोद्यतः प्रभा
Ayam kurunamrishabhah kuntiputro yudhishthirah
Asya kirtih sthita loke suryasyevodyatah prabha
65.10
संसरन्ति दिशः सर्वा यशसोऽस्य गभस्तयः
उदितस्येव सूर्यस्य तेजसोऽनु गभस्तयः
Sansaranti dishah sarva yashasosya gabhastayah
Uditasyeva suryasya tejasonu gabhastayah
65.11
एनं दश सहस्राणि कुञ्जराणां तरस्विनाम्
अन्वयुः पृष्ठतो राजन्यावदध्यावसत्कुरून्
Enam dasha sahasrani kunjaranam tarasvinam
Anvayuh prishthato rajanyavadadhyavasatkurun
65.12
त्रिंशदेनं सहस्राणि रथाः काञ्चनमालिनः
सदश्वैरुपसंपन्नाः पृष्ठतोऽनुययुः सदा
Trinshadenam sahasrani rathah kanchanamalinah
Sadashvairupasampannah prishthatonuyayuh sada
65.13
एनमष्टशताः सूताः सुमृष्टमणिकुण्डलाः
अस्तुवन्मागधैः सार्धं पुरा शक्रमिवर्षयः
Enamashtashatah sutah sumrishtamanikundalah
Astuvanmagadhaih sardham pura shakramivarshayah
65.14
एनं नित्यमुपासन्त कुरवः किंकरा यथा
सर्वे च राजन्राजानो धनेश्वरमिवामराः
Enam nityamupasanta kuravah kinkara yatha
Sarve cha rajanrajano dhaneshvaramivamarah
65.15
एष सर्वान्महीपालान्करमाहारयत्तदा
वैश्यानिव महाराज विवशान्स्ववशानपि
Esha sarvanmahipalankaramaharayattada
Vaishyaniva maharaja vivashansvavashanapi
65.16
अष्टाशीतिसहस्राणि स्नातकानां महात्मनाम्
उपजीवन्ति राजानमेनं सुचरितव्रतम्
Ashtashitisahasrani snatakanam mahatmanam
Upajivanti rajanamenam sucharitavratam
65.17
एष वृद्धाननाथांश्च व्यङ्गान्पङ्गूंश्च मानवान्
पुत्रवत्पालयामास प्रजा धर्मेण चाभिभो
Esha vriddhananathanshcha vyanganpangunshcha manavan
Putravatpalayamasa praja dharmena chabhibho
65.18
एष धर्मे दमे चैव क्रोधे चापि यतव्रतः
महाप्रसादो ब्रह्मण्यः सत्यवादी च पार्थिवः
Esha dharme dame chaiva krodhe chapi yatavratah
Mahaprasado brahmanyah satyavadi cha parthivah
65.19
श्रीप्रतापेन चैतस्य तप्यते स सुयोधनः
सगणः सह कर्णेन सौबलेनापि वा विभुः
Shripratapena chaitasya tapyate sa suyodhanah
Saganah saha karnena saubalenapi va vibhuh
65.20
न शक्यन्ते ह्यस्य गुणाः प्रसंख्यातुं नरेश्वर
एष धर्मपरो नित्यमानृशंस्यश्च पाण्डवः
Na shakyante hyasya gunah prasankhyatum nareshvara
Esha dharmaparo nityamanrishansyashcha pandavah
65.21
एवंयुक्तो महाराजः पाण्डवः पार्थिवर्षभः
कथं नार्हति राजार्हमासनं पृथिवीपतिः
Evanyukto maharajah pandavah parthivarshabhah
Katham narhati rajarhamasanam prithivipatih