UtshovChapter 62
62.1
वैशंपायन उवाच
ततो विजित्य संग्रामे कुरून्गोवृषभेक्षणः
समानयामास तदा विराटस्य धनं महत्
Vaishampayana uvacha
Tato vijitya sangrame kurungovrishabhekshanah
Samanayamasa tada viratasya dhanam mahat
62.2
गतेषु च प्रभग्नेषु धार्तराष्ट्रेषु सर्वशः
वनान्निष्क्रम्य गहनाद्बहवः कुरुसैनिकाः
Gateshu cha prabhagneshu dhartarashtreshu sarvashah
Vanannishkramya gahanadbahavah kurusainikah
62.3
भयात्संत्रस्तमनसः समाजग्मुस्ततस्ततः
मुक्तकेशा व्यदृश्यन्त स्थिताः प्राञ्जलयस्तदा
Bhayatsantrastamanasah samajagmustatastatah
Muktakesha vyadrishyanta sthitah pranjalayastada
62.4
क्षुत्पिपासापरिश्रान्ता विदेशस्था विचेतसः
ऊचुः प्रणम्य संभ्रान्ताः पार्थ किं करवाम ते
Kshutpipasaparishranta videshastha vichetasah
Uchuh pranamya sambhrantah partha kim karavama te
62.5
अर्जुन उवाच
स्वस्ति व्रजत भद्रं वो न भेतव्यं कथंचन
नाहमार्ताञ्जिघांसामि भृशमाश्वासयामि वः
Arjuna uvacha
Svasti vrajata bhadram vo na bhetavyam kathanchana
Nahamartanjighansami bhrishamashvasayami vah
62.6
वैशंपायन उवाच
तस्य तामभयां वाचं श्रुत्वा योधाः समागताः
आयुःकीर्तियशोदाभिस्तमाशिर्भिरनन्दयन्
Vaishampayana uvacha
Tasya tamabhayam vacham shrutva yodhah samagatah
Ayuhkirtiyashodabhistamashirbhiranandayan
62.7
ततो निवृत्ताः कुरवः प्रभग्ना वशमास्थिताः
पन्थानमुपसंगम्य फल्गुनो वाक्यमब्रवीत्
Tato nivrittah kuravah prabhagna vashamasthitah
Panthanamupasangamya phalguno vakyamabravit
62.8
राजपुत्र प्रत्यवेक्ष समानीतानि सर्वशः
गोकुलानि महाबाहो वीर गोपालकैः सह
Rajaputra pratyaveksha samanitani sarvashah
Gokulani mahabaho vira gopalakaih saha
62.9
ततोऽपराह्णे यास्यामो विराटनगरं प्रति
आश्वास्य पाययित्वा च परिप्लाव्य च वाजिनः
Tatoparahne yasyamo viratanagaram prati
Ashvasya payayitva cha pariplavya cha vajinah
62.10
गच्छन्तु त्वरिताश्चैव गोपालाः प्रेषितास्त्वया
नगरे प्रियमाख्यातुं घोषयन्तु च ते जयम्
Gachchhantu tvaritashchaiva gopalah preshitastvaya
Nagare priyamakhyatum ghoshayantu cha te jayam
62.11
वैशंपायन उवाच
उत्तरस्त्वरमाणोऽथ दूतानाज्ञापयत्ततः
वचनादर्जुनस्यैव आचक्षध्वं जयं मम
Vaishampayana uvacha
Uttarastvaramanotha dutanagyapayattatah
Vachanadarjunasyaiva achakshadhvam jayam mama