Utshovঅধ্যায় 36
36.1
বৈশংপায়ন উবাচ
স রাজধান্যা নির্যায় বৈরাটিঃ পৃথিবীংজয়ঃ
প্রয়াহীত্যব্রবীত্সূতং যত্র তে কুরবো গতাঃ
36.2
সমবেতান্কুরূন্যাবজ্জিগীষূনবজিত্য বৈ
গাশ্চৈষাং ক্ষিপ্রমাদায় পুনরায়ামি স্বং পুরম্
36.3
ততস্তাংশ্চোদয়ামাস সদশ্বান্পাণ্ডুনন্দনঃ
তে হয়া নরসিংহেন চোদিতা বাতরংহসঃ
আলিখন্ত ইবাকাশমূহুঃ কাঞ্চনমালিনঃ
36.4
নাতিদূরমথো যাত্বা মত্স্যপুত্রধনংজয়ৌ
অবেক্ষেতামমিত্রঘ্নৌ কুরূণাং বলিনাং বলম্
শ্মশানমভিতো গত্বা আসসাদ কুরূনথ
36.5
তদনীকং মহত্তেষাং বিবভৌ সাগরস্বনম্
সর্পমাণমিবাকাশে বনং বহুলপাদপম্
36.6
দদৃশে পার্থিবো রেণুর্জনিতস্তেন সর্পতা
দৃষ্টিপ্রণাশো ভূতানাং দিবস্পৃঙ্নরসত্তম
36.7
তদনীকং মহদ্দৃষ্ট্বা গজাশ্বরথসংকুলম্
কর্ণদুর্যোধনকৃপৈর্গুপ্তং শাংতনবেন চ
36.8
দ্রোণেন চ সপুত্রেণ মহেষ্বাসেন ধীমতা
হৃষ্টরোমা ভয়োদ্বিগ্নঃ পার্থং বৈরাটিরব্রবীৎ
36.9
নোত্সহে কুরুভির্যোদ্ধুং রোমহর্ষং হি পশ্য মে
বহুপ্রবীরমত্যুগ্রং দেবৈরপি দুরাসদম্
প্রতিয়োদ্ধুং ন শক্ষ্যামি কুরুসৈন্যমনন্তকম্
36.10
নাশংসে ভারতীং সেনাং প্রবেষ্টুং ভীমকার্মুকাম্
রথনাগাশ্বকলিলাং পত্তিধ্বজসমাকুলাম্
দৃষ্ট্বৈব হি পরানাজাবাত্মা প্রব্যথতীব মে
36.11
যত্র দ্রোণশ্চ ভীষ্মশ্চ কৃপঃ কর্ণো বিবিংশতিঃ
অশ্বত্থামা বিকর্ণশ্চ সোমদত্তোঽথ বাহ্লিকঃ
36.12
দুর্যোধনস্তথা বীরো রাজা চ রথিনাং বরঃ
দ্যুতিমন্তো মহেষ্বাসাঃ সর্বে যুদ্ধবিশারদাঃ
36.13
দৃষ্ট্বৈব হি কুরূনেতান্ব্যূঢানীকান্প্রহারিণঃ
হৃষিতানি চ রোমাণি কশ্মলং চাগতং মম
36.14
বৈশংপায়ন উবাচ
অবিয়াতো বিয়াতস্য মৌর্খ্যাদ্ধূর্তস্য পশ্যতঃ
পরিদেবয়তে মন্দঃ সকাশে সব্যসাচিনঃ
36.15
ত্রিগর্তান্মে পিতা যাতঃ শূন্যে সংপ্রণিধায় মাম্
সর্বাং সেনামুপাদায় ন মে সন্তীহ সৈনিকাঃ
36.16
সোঽহমেকো বহূন্বালঃ কৃতাস্ত্রানকৃতশ্রমঃ
প্রতিয়োদ্ধুং ন শক্ষ্যামি নিবর্তস্ব বৃহন্নডে
36.17
অর্জুন উবাচ
ভয়েন দীনরূপোঽসি দ্বিষতাং হর্ষবর্ধনঃ
ন চ তাবত্কৃতং কিংচিত্পরৈঃ কর্ম রণাজিরে
36.18
স্বয়মেব চ মামাত্থ বহ মাং কৌরবান্প্রতি
সোঽহং ত্বাং তত্র নেষ্যামি যত্রৈতে বহুলা ধ্বজাঃ
36.19
মধ্যমামিষগৃধ্রাণাং কুরূণামাততায়িনাম্
নেষ্যামি ত্বাং মহাবাহো পৃথিব্যামপি যুধ্যতাম্
36.20
তথা স্ত্রীষু প্রতিশ্রুত্য পৌরুষং পুরুষেষু চ
কত্থমানোঽভিনির্যায় কিমর্থং ন যুয়ুত্সসে
36.21
ন চেদ্বিজিত্য গাস্তাস্ত্বং গৃহান্বৈ প্রতিয়াস্যসি
প্রহসিষ্যন্তি বীর ত্বাং নরা নার্যশ্চ সংগতাঃ
36.22
অহমপ্যত্র সৈরন্ধ্র্যা স্তুতঃ সারথ্যকর্মণি
ন হি শক্ষ্যাম্যনির্জিত্য গাঃ প্রয়াতুং পুরং প্রতি
36.23
স্তোত্রেণ চৈব সৈরন্ধ্র্যাস্তব বাক্যেন তেন চ
কথং ন যুধ্যেয়মহং কুরূন্সর্বান্স্থিরো ভব
36.24
উত্তর উবাচ
কামং হরন্তু মত্স্যানাং ভূয়াংসং কুরবো ধনম্
প্রহসন্তু চ মাং নার্যো নরা বাপি বৃহন্নডে
36.25
বৈশংপায়ন উবাচ
ইত্যুক্ত্বা প্রাদ্রবদ্ভীতো রথাত্প্রস্কন্দ্য কুণ্ডলী
ত্যক্ত্বা মানং স মন্দাত্মা বিসৃজ্য সশরং ধনুঃ
36.26
বৃহন্নডোবাচ
নৈষ পূর্বৈঃ স্মৃতো ধর্মঃ ক্ষত্রিয়স্য পলায়নম্
শ্রেয়স্তে মরণং যুদ্ধে ন ভীতস্য পলায়নম্
36.27
বৈশংপায়ন উবাচ
এবমুক্ত্বা তু কৌন্তেয়ঃ সোঽবপ্লুত্য রথোত্তমাৎ
তমন্বধাবদ্ধাবন্তং রাজপুত্রং ধনংজয়ঃ
দীর্ঘাং বেণীং বিধুন্বানঃ সাধু রক্তে চ বাসসী
36.28
বিধূয় বেণীং ধাবন্তমজানন্তোঽর্জুনং তদা
সৈনিকাঃ প্রাহসন্কেচিত্তথারূপমবেক্ষ্য তম্
36.29
তং শীঘ্রমভিধাবন্তং সংপ্রেক্ষ্য কুরবোঽব্রুবন্
ক এষ বেষপ্রচ্ছন্নো ভস্মনেব হুতাশনঃ
36.30
কিংচিদস্য যথা পুংসঃ কিংচিদস্য যথা স্ত্রিয়ঃ
সারূপ্যমর্জুনস্যেব ক্লীবরূপং বিভর্তি চ
36.31
তদেবৈতচ্ছিরোগ্রীবং তৌ বাহূ পরিঘোপমৌ
তদ্বদেবাস্য বিক্রান্তং নায়মন্যো ধনংজয়াৎ
36.32
অমরেষ্বিব দেবেন্দ্রো মানুষেষু ধনংজয়ঃ
একঃ কোঽস্মানুপায়ায়াদন্যো লোকে ধনংজয়াৎ
36.33
একঃ পুত্রো বিরাটস্য শূন্যে সংনিহিতঃ পুরে
স এষ কিল নির্যাতো বালভাবান্ন পৌরুষাৎ
36.34
সত্রেণ নূনং ছন্নং হি চরন্তং পার্থমর্জুনম্
উত্তরঃ সারথিং কৃত্বা নির্যাতো নগরাদ্বহিঃ
36.35
স নো মন্যে ধ্বজান্দৃষ্ট্বা ভীত এষ পলায়তি
তং নূনমেষ ধাবন্তং জিঘৃক্ষতি ধনংজয়ঃ
36.36
ইতি স্ম কুরবঃ সর্বে বিমৃশন্তঃ পৃথক্পৃথক্
ন চ ব্যবসিতুং কিংচিদুত্তরং শক্নুবন্তি তে
ছন্নং তথা তং সত্রেণ পাণ্ডবং প্রেক্ষ্য ভারত
36.37
উত্তরং তু প্রধাবন্তমনুদ্রুত্য ধনংজয়ঃ
গত্বা পদশতং তূর্ণং কেশপক্ষে পরামৃশৎ
36.38
সোঽর্জুনেন পরামৃষ্টঃ পর্যদেবয়দার্তবৎ
বহুলং কৃপণং চৈব বিরাটস্য সুতস্তদা
36.39
শাতকুম্ভস্য শুদ্ধস্য শতং নিষ্কান্দদামি তে
মণীনষ্টৌ চ বৈডূর্যান্হেমবদ্ধান্মহাপ্রভান্
36.40
হেমদণ্ডপ্রতিচ্ছন্নং রথং যুক্তং চ সুব্রজৈঃ
মত্তাংশ্চ দশ মাতঙ্গান্মুঞ্চ মাং ত্বং বৃহন্নডে
36.41
বৈশংপায়ন উবাচ
এবমাদীনি বাক্যানি বিলপন্তমচেতসম্
প্রহস্য পুরুষব্যাঘ্রো রথস্যান্তিকমানয়ৎ
36.42
অথৈনমব্রবীত্পার্থো ভয়ার্তং নষ্টচেতসম্
যদি নোত্সহসে যোদ্ধুং শত্রুভিঃ শত্রুকর্শন
এহি মে ত্বং হয়ান্যচ্ছ যুধ্যমানস্য শত্রুভিঃ
36.43
প্রয়াহ্যেতদ্রথানীকং মদ্বাহুবলরক্ষিতঃ
অপ্রধৃষ্যতমং ঘোরং গুপ্তং বীরৈর্মহারথৈঃ
36.44
মা ভৈস্ত্বং রাজপুত্রাগ্র্য ক্ষত্রিয়োঽসি পরংতপ
অহং বৈ কুরুভির্যোত্স্যাম্যবজেষ্যামি তে পশূন্
36.45
প্রবিশ্যৈতদ্রথানীকমপ্রধৃষ্যং দুরাসদম্
যন্তা ভূস্ত্বং নরশ্রেষ্ঠ যোত্স্যেঽহং কুরুভিঃ সহ
36.46
এবং ব্রুবাণো বীভত্সুর্বৈরাটিমপরাজিতঃ
সমাশ্বাস্য মুহূর্তং তমুত্তরং ভরতর্ষভ
36.47
তত এনং বিচেষ্টন্তমকামং ভয়পীডিতম্
রথমারোপয়ামাস পার্থঃ প্রহরতাং বরঃ