অধ্যায় 35

35.1

বৈশংপায়ন উবাচ
স তাং দৃষ্ট্বা বিশালাক্ষীং রাজপুত্রীং সখীং সখা
প্রহসন্নব্রবীদ্রাজন্কুত্রাগমনমিত্যুত

35.2

তমব্রবীদ্রাজপুত্রী সমুপেত্য নরর্ষভম্
প্রণয়ং ভাবয়ন্তী স্ম সখীমধ্য ইদং বচঃ

35.3

গাবো রাষ্ট্রস্য কুরুভিঃ কাল্যন্তে নো বৃহন্নডে
তান্বিজেতুং মম ভ্রাতা প্রয়াস্যতি ধনুর্ধরঃ

35.4

নচিরং চ হতস্তস্য সংগ্রামে রথসারথিঃ
তেন নাস্তি সমঃ সূতো যোঽস্য সারথ্যমাচরেৎ

35.5

তস্মৈ প্রয়তমানায় সারথ্যর্থং বৃহন্নডে
আচচক্ষে হয়জ্ঞানে সৈরন্ধ্রী কৌশলং তব

35.6

সা সারথ্যং মম ভ্রাতুঃ কুরু সাধু বৃহন্নডে
পুরা দূরতরং গাবো হ্রিয়ন্তে কুরুভির্হি নঃ

35.7

অথৈতদ্বচনং মেঽদ্য নিয়ুক্তা ন করিষ্যসি
প্রণয়াদুচ্যমানা ত্বং পরিত্যক্ষ্যামি জীবিতম্

35.8

এবমুক্তস্তু সুশ্রোণ্যা তয়া সখ্যা পরংতপঃ
জগাম রাজপুত্রস্য সকাশমমিতৌজসঃ

35.9

তং সা ব্রজন্তং ত্বরিতং প্রভিন্নমিব কুঞ্জরম্
অন্বগচ্ছদ্বিশালাক্ষী শিশুর্গজবধূরিব

35.10

দূরাদেব তু তং প্রেক্ষ্য রাজপুত্রোঽভ্যভাষত
ত্বয়া সারথিনা পার্থঃ খাণ্ডবেঽগ্নিমতর্পয়ৎ

35.11

পৃথিবীমজয়ত্কৃত্স্নাং কুন্তীপুত্রো ধনংজয়ঃ
সৈরন্ধ্রী ত্বাং সমাচষ্ট সা হি জানাতি পাণ্ডবান্

35.12

সংয়চ্ছ মামকানশ্বাংস্তথৈব ত্বং বৃহন্নডে
কুরুভির্যোত্স্যমানস্য গোধনানি পরীপ্সতঃ

35.13

অর্জুনস্য কিলাসীস্ত্বং সারথির্দয়িতঃ পুরা
ত্বয়াজয়ত্সহায়েন পৃথিবীং পাণ্ডবর্ষভঃ

35.14

এবমুক্তা প্রত্যুবাচ রাজপুত্রং বৃহন্নডা
কা শক্তির্মম সারথ্যং কর্তুং সংগ্রামমূর্ধনি

35.15

গীতং বা যদি বা নৃত্তং বাদিত্রং বা পৃথগ্বিধম্
তত্করিষ্যামি ভদ্রং তে সারথ্যং তু কুতো ময়ি

35.16

উত্তর উবাচ
বৃহন্নডে গায়নো বা নর্তনো বা পুনর্ভব
ক্ষিপ্রং মে রথমাস্থায় নিগৃহ্ণীষ্ব হয়োত্তমান্

35.17

বৈশংপায়ন উবাচ
স তত্র নর্মসংয়ুক্তমকরোত্পাণ্ডবো বহু
উত্তরায়াঃ প্রমুখতঃ সর্বং জানন্নরিংদম

35.18

ঊর্ধ্বমুত্ক্ষিপ্য কবচং শরীরে প্রত্যমুঞ্চত
কুমার্যস্তত্র তং দৃষ্ট্বা প্রাহসন্পৃথুলোচনাঃ

35.19

স তু দৃষ্ট্বা বিমুহ্যন্তং স্বয়মেবোত্তরস্ততঃ
কবচেন মহার্হেণ সমনহ্যদ্বৃহন্নডাম্

35.20

স বিভ্রত্কবচং চাগ্র্যং স্বয়মপ্যংশুমত্প্রভম্
ধ্বজং চ সিংহমুচ্ছ্রিত্য সারথ্যে সমকল্পয়ৎ

35.21

ধনূংষি চ মহার্হাণি বাণাংশ্চ রুচিরান্বহূন্
আদায় প্রয়য়ৌ বীরঃ স বৃহন্নডসারথিঃ

35.22

অথোত্তরা চ কন্যাশ্চ সখ্যস্তামব্রুবংস্তদা
বৃহন্নডে আনয়েথা বাসাংসি রুচিরাণি নঃ

35.23

পাঞ্চালিকার্থং সূক্ষ্মাণি চিত্রাণি বিবিধানি চ
বিজিত্য সংগ্রামগতান্ভীষ্মদ্রোণমুখান্কুরূন্

35.24

অথ তা ব্রুবতীঃ কন্যাঃ সহিতাঃ পাণ্ডুনন্দনঃ
প্রত্যুবাচ হসন্পার্থো মেঘদুন্দুভিনিঃস্বনঃ

35.25

যদ্যুত্তরোঽয়ং সংগ্রামে বিজেষ্যতি মহারথান্
অথাহরিষ্যে বাসাংসি দিব্যানি রুচিরাণি চ

35.26

এবমুক্ত্বা তু বীভত্সুস্ততঃ প্রাচোদয়দ্ধয়ান্
কুরূনভিমুখাঞ্শূরো নানাধ্বজপতাকিনঃ

Contains text from DharmicData, made available under the Open Database License (ODbL). Simple meanings are written by AI and can contain mistakes.